കണ്ണൂർ:ഓൺലൈൻ മാർക്കറ്റിംഗിൽ ഒരുകൈ പയറ്റാനൊരുങ്ങി പള്ളിക്കുളത്തെ നാല് വീട്ടമ്മമാർ.പള്ളിക്കുളം ത്രിവേണിയിൽ സ്നേഹ സന്തോഷ്,അഞ്ചാംകുടി ഹൗസിൽ മോനിഷ ഷൈജു,ഷംന നിവാസിൽ നിമ്മി ഷമിൽ,ആരോത്ത് ഹൗസിൽ സുബീഷ് രജീഷ് എന്നിവരാണ് പുതിയ ആശയവുമായി മുന്നിട്ടിറങ്ങിയിരിക്കുന്നത്.നാലുപേരും സുഹൃത്തുക്കളാണ്. ലോക്ഡൌൺ സമയത്തെ മടുപ്പും പ്രത്യേകിച്ച് ഒന്നും ചെയ്യാനില്ലാത്തതിന്റെ നിരാശയുമാണ് ഇവരെ ഇങ്ങനെയൊരു ആശയത്തിലേക്കെത്തിച്ചത്.firstdial.shop എന്ന ബ്രാൻഡ് നെയിമിലാണ് വിതരണം.first.shop ഇൽ നിന്നുള്ള ഡെയിലി ഓഫറുകൾ അറിയാൻ ലിങ്ക് വഴി വാട്സാപ്പ് ഗ്രൂപ്പിൽ ജോയിൻ ചെയ്യാം.പള്ളിക്കുളത്തിന് അഞ്ചു കിലോമീറ്റർ ചുറ്റളവിലാണ് ആദ്യഘട്ടത്തിൽ സേവനം ലഭ്യമാക്കുക. അനാദി,പച്ചക്കറി,പഴവർഗ്ഗങ്ങൾ എന്നിവയാണ് ആദ്യഘട്ടത്തിൽ ലഭ്യമാക്കുക.വാട്സാപ്പ്,ഫോൺ,വെബ്സൈറ്റ് എന്നിവയിലൂടെ ഓർഡർ നൽകാം.കസ്റ്റമർ കെയറിൽ ലഭിക്കുന്ന ഓർഡറുകൾ പിന്നീട് പ്രത്യേക ആപ്പിലൂടെ ഘട്ടംഘട്ടമായി മണിക്കൂറുകൾക്കകം ഉപഭോക്താവിലെത്തും.സംരംഭത്തിന്റെ ഉൽഘാടനം ജില്ലാ പഞ്ചായത്ത് വൈസ് പ്രസിഡണ്ട് പി.പി ദിവ്യ ഓൺലൈനായി നിർവഹിച്ചു.ജില്ലാ പഞ്ചായത്ത് ആരോഗ്യ-വിദ്യാഭ്യാസ സ്ഥിരം സമിതി അധ്യക്ഷൻ കെ.പി ജയബാലൻ ആദ്യ വിൽപ്പന നിർവഹിച്ചു. ചിറക്കൽ പഞ്ചായത്ത് വൈസ് പ്രസിഡന്റ് കെ.സി ജിഷ,ചിറക്കൽ സർവീസ് സഹകരണ ബാങ്ക് പ്രസിഡന്റ് പി.പ്രശാന്ത്,ജെ.സി.ഐ സോൺ ഓഫീസർ വി.രവീന്ദ്രൻ എന്നിവർ പങ്കെടുത്തു.