ന്യൂഡൽഹി:ഓള്‍ഡ് സീമാപുരിയിൽ വീടിന് തീപിടിച്ച്‌ ഒരു കുടുംബത്തിലെ 4 പേര്‍ മരിച്ചു.ചൊവ്വാഴ്ച പുലര്‍ചെ നാല് മണിയോടെയാണ് തീപിടിത്തമുണ്ടായതെന്ന് അധികൃതര്‍ അറിയിച്ചു.കെട്ടിടത്തിന്റെ മൂന്നാം നിലയിലെ ഒരു മുറിയിലാണ് തീപിടിത്തമുണ്ടായത്. ഹരിലാല്‍ (56), ഭാര്യ റീന (55), ഇവരുടെ മകന്‍ ആഷു(24), മകള്‍ രോഹിണി(18) എന്നിവരാണ് മരിച്ചത്. വന്‍ തീപിടിത്തത്തെ തുടര്‍ന്ന് ശ്വാസംമുട്ടിയാണ് നാലുപേരും മരിച്ചത്. എല്ലാ മൃതദേഹങ്ങളും പോസ്റ്റ് മോര്‍ടെത്തിനായി ആശുപത്രിയിലേക്ക് അയച്ചു.പുലര്‍ച്ചെ 4.07നാണ് അഗ്‌നിശമനസേനയ്ക്ക് സന്ദേശം ലഭിച്ചത്. വിവരമറിയിച്ചതിനെ തുടര്‍ന്ന് നാല് ഫയര്‍ എഞ്ചിനുകള്‍ സ്ഥലത്തെത്തി തീ നിയന്ത്രണ വിധേയമാക്കി. കൊതുകിനെ കൊല്ലാനുള്ള മൊസ്‌കിറ്റോ കോയിലിന് തീപിടിച്ചതാണ് അപകടകാരണമെന്നാണ് പ്രാഥമിക നിഗമനം.