ന്യൂഡൽഹി:പ്രമുഖ പൊതുമേഖല എണ്ണ വിതരണ കമ്പനിയായ ഇന്ത്യൻ ഓയിൽ കോർപറേഷന്റെ എണ്ണക്കപ്പലിൽ തീപിടുത്തം.ശ്രീലങ്കന്‍ തീരത്ത് നിന്നും 20 നോട്ടിക്കല്‍ മൈല്‍ അകലെയാണ് അപകടം.കുവൈത്തില്‍ നിന്ന് ഇന്ത്യയിലെ പാരാദ്വീപിലേക്കുളള യാത്രയ്ക്കിടെയാണ് അപകടം ഉണ്ടായത്.ന്യൂ ഡയമണ്ട് എന്ന കപ്പലാണ് അപകടത്തില്‍പ്പെട്ടത്. കുവൈത്തിലെ മിനാ അല്‍ അഹമ്മദിയില്‍ നിന്നാണ് കപ്പല്‍ പുറപ്പെട്ടത്.2,70,0000 ടണ്‍ എണ്ണ വഹിച്ച്‌ കൊണ്ട് ഇന്ത്യ ലക്ഷ്യമാക്കി നീങ്ങിയിരുന്ന കപ്പലാണ് അപകടത്തില്‍പ്പെട്ടത്. എണ്ണ ചോര്‍ച്ച ഒഴിവാക്കാനുളള നടപടികള്‍ ആരംഭിച്ചതായി ശ്രീലങ്കന്‍ അധികൃതര്‍ അറിയിച്ചു. രക്ഷാപ്രവര്‍ത്തനത്തിനായി രണ്ട് നാവിക കപ്പലുകളും വിമാനവും വിന്യസിച്ചതായി ശ്രീലങ്കന്‍ നാവികസേന പ്രതിനിധി കമാന്‍ഡര്‍ രഞ്ജിത് രാജ്പക്‌സെ പറഞ്ഞു. ആര്‍ക്കെങ്കിലും ജീവഹാനി ഉണ്ടായോ എന്ന് വ്യക്തമല്ല. തീപിടിത്തത്തിന്റെ കാരണമെന്തെന്നുള്ള വിവരവും അറിവായിട്ടില്ല. അപകടത്തെക്കുറിച്ച്‌ ഐ ഒ സി അധികൃതരുടെ പ്രതികരണവും ലഭിച്ചിട്ടില്ല.