മാങ്ങാട്ടുപറമ്പ്: കണ്ണൂര്‍ സര്‍വകലാശാലയുടെ ധര്‍മശാല ബി.എഡ് സെന്‍റര്‍ കമ്പ്യൂട്ടർ ലാബില്‍ തീപിടിത്തം.വെള്ളിയാഴ്ച ഉച്ചക്ക് 12 ഓടെയാണ് തീപിടുത്തമുണ്ടായത്.പൂട്ടിയിട്ട ലാബില്‍നിന്ന് പുക ഉയര്‍ന്നതോടെയാണ് തീപിടിച്ചത് ബി.എഡ് സെന്‍ററിലെ ജീവനക്കാരുടെ ശ്രദ്ധയില്‍പെട്ടത്. തുടര്‍ന്ന് കോളജ് അധികൃതര്‍ സ്ഥലത്തെത്തി തീയണക്കാന്‍ ശ്രമിച്ചെങ്കിലും സാധിച്ചില്ല.തുടർന്ന് തളിപ്പറമ്പിൽ നിന്ന് അഗ്നിശമനസേനയെത്തി കമ്പ്യൂട്ടർ ലാബിന്റെ പൂട്ടുപൊളിച്ചാണ് അകത്തുകടന്നത്. ശക്തമായ പുക കാരണവും വെള്ളം ഉപയോഗിക്കാന്‍ പാടില്ലാത്ത സ്ഥലമായതിനാലും ഫയര്‍ എക്സ്റ്റിങ്ഗ്യുഷര്‍ ഉപയോഗിച്ചാണ് തീ നിയന്ത്രണവിധേയമാക്കിയത്.ലാബിലെ വൈദ്യുതി വയറിങ് സംവിധാനം പൂര്‍ണമായും കത്തിനശിച്ചു. 14ഓളം കംപ്യൂട്ടറുകളും ഇലക്‌ട്രിക്കല്‍ ഉപകരണങ്ങളും കരിപുരണ്ട അവസ്ഥയിലാണ്. ഷോര്‍ട്ട് സര്‍ക്യൂട്ടാണ് അപകടകാരണമെന്നാണ് പ്രാഥമിക നിഗമനം.ക്രിസ്മസ് അവധി ആയതിനാല്‍ ലാബില്‍ വിദ്യാര്‍ഥികള്‍ ഉണ്ടായിരുന്നില്ല. എല്ലാ കംപ്യൂട്ടറുകളുടെയും വൈദ്യുതിബന്ധവും വിച്ഛേദിച്ചിരുന്നു. അതിനാല്‍ കമ്പ്യൂട്ടറുകൾക്ക് കാര്യമായ തകരാറു സംഭവിച്ചിട്ടില്ലെന്നാണ് കണക്കാക്കുന്നത്. കൂടുതല്‍ പരിശോധനകള്‍ നടത്തിയാലേ നഷ്ടം കണക്കാക്കാന്‍ സാധ്യമാകൂവെന്ന് സര്‍വകാല അധികൃതര്‍ വ്യക്തമാക്കി.