ന്യൂഡൽഹി:പൊലീസ് ബാരിക്കേഡ് മറികടന്ന് സിംഗുവില്‍ നിന്ന് കര്‍ഷകരുടെ ട്രാക്ടര്‍ റാലി ഡല്‍ഹിയിലേക്ക് പ്രവേശിച്ചതായി റിപ്പോര്‍ട്ട്. സിംഗുവില്‍ പൊലീസ് സ്ഥാപിച്ച ബാരിക്കേഡുകളാണ് കര്‍ഷകര്‍ നീക്കിയത്. കൂടാതെ ഡല്‍ഹി – ഹരിയാന അതിര്‍ത്തിയായ തിക്രിയിലും കര്‍ഷകര്‍ ബാരിക്കേഡുകള്‍ മറികടന്ന് ഡല്‍ഹിയിലേക്ക് പ്രവേശിച്ചു. കര്‍ഷകരെ പിന്തിരിപ്പിക്കാനുള്ള പൊലീസ് ശ്രമം പരാജയപ്പെട്ടുവെന്നാണ് വിവരം.ഒരേസമയം ഡല്‍ഹിയിലും ഹരിയാനയിലുമായി ആറ് മേഖലകളിലാണ് ട്രാക്ടറുകള്‍ റാലി നടത്തുക. അയ്യായിരം ട്രാക്ടറുകള്‍ക്കാണ് റാലിയില്‍ പൊലീസ് അനുമതി എന്നാല്‍ ഒരു ലക്ഷം ട്രാക്ടറുകള്‍ പങ്കെടുക്കുമെന്നാണ് കര്‍ഷകസംഘടനകളുടെ പ്രഖ്യാപനം.ഒരു ലക്ഷം ട്രാക്ടറുകളിലായി സ്ത്രീകള്‍ അടക്കം 4 ലക്ഷത്തില്‍ അധികം കര്‍ഷകര്‍ പങ്കെടുക്കും. സിങ്കു, തിക്രി, ഗാസിപുര്‍ എന്നിവടങ്ങളില്‍ നിന്നാണ് പരേഡ് ആരംഭിക്കുക. നിലവില്‍ നല്‍കിയിരിക്കുന്ന റൂട്ട് മാപ്പ് അനുസരിച്ച്‌ റാലി തീരാന്‍ 48 മണിക്കൂര്‍ വേണ്ടി വരുമെന്നാണ് വിലയിരുത്തല്‍.പുറത്ത് നിന്ന് ആളുകള്‍ നുഴഞ്ഞു കയറിയെന്ന സംശയമുള്ളതിനാല്‍ കടുത്ത നിയന്ത്രണത്തിലായിരിക്കും റാലി നടക്കുക. ഡല്‍ഹി പിടിച്ചടക്കുകയല്ല, കാര്‍ഷിക നിയമങ്ങള്‍ പിന്‍വലിക്കാന്‍ രാജ്യത്തെ ജനങ്ങളുടെ പിന്തുണ ആര്‍ജ്ജിക്കുകയാണ് ട്രാക്ടര്‍ പരേഡിന്റെ ലക്ഷ്യമെന്ന് കര്‍ഷകര്‍ പറഞ്ഞു.