ന്യൂഡല്‍ഹി:കര്‍ഷക പ്രക്ഷോഭം ഒത്തുതീർപ്പാക്കാൻ കേന്ദ്രസര്‍ക്കാരും കര്‍ഷക സംഘടനകളും തമ്മിലുളള ഏഴാംഘട്ട ചര്‍ച്ച ഇന്ന് നടക്കും.വിജ്ഞാന്‍ ഭവനില്‍ ഉച്ചയ്‌ക്ക് രണ്ട് മണിക്കാണ് ചര്‍ച്ച നിശ്‌ചയിച്ചിരിക്കുന്നത്. കേന്ദ്രകൃഷിമന്ത്രി നരേന്ദ്രസിംഗ് തോമറും റെയില്‍വേ മന്ത്രി പിയൂഷ് ഗോയലും കേന്ദ്ര സര്‍ക്കാരിനെ പ്രതിനിധീകരിച്ച് ചർച്ചയിൽ പങ്കെടുക്കും.പ്രക്ഷോഭം മുപ്പത്തിയഞ്ചാം ദിവസത്തില്‍ എത്തി നിൽക്കുമ്പോഴും വിവാദമായ മൂന്ന് കാര്‍ഷിക നിയമങ്ങളും പിന്‍വലിക്കണമെന്ന നിലപാടില്‍ സംയുക്ത സമരസമിതി ഉറച്ചുനില്‍ക്കുകയാണ്. സമരത്തിന് ലഭിച്ചു കൊണ്ടിരിക്കുന്ന ബഹുജന പിന്തുണ കര്‍ഷകര്‍ക്ക് കരുത്ത് പകരുകയാണ്. എന്നാല്‍, നിയമങ്ങള്‍ പൂര്‍ണമായി പിന്‍വലിക്കാനാവില്ലെന്നും ഭേദഗതികളിന്മേല്‍ ചര്‍ച്ചയാകാമെന്നുമുളള നിലപാടിലാണ് കേന്ദ്രം.ഈ പശ്ചാത്തലത്തിലാണ് ഏഴാംഘട്ട ചര്‍ച്ച ഇന്ന് നടക്കുന്നത്. കര്‍ഷകരെ ഒത്തുതീര്‍പ്പിന്റെ പാതയിലേക്ക് എത്തിക്കുന്നതിന്റെ ഭാഗമായി കുറേക്കൂടി ദേദഗതികള്‍ കേന്ദ്രം മുന്നോട്ടുവച്ചേക്കുമെന്നും സൂചനയുണ്ട്.