ചെന്നൈ: പ്രശസ്ത സംവിധായകൻ കെ. എസ് സേതുമാധവൻ(94) അന്തരിച്ചു.ചെന്നൈയിലെ വസതിയിൽ അർദ്ധരാത്രിയോടെയായിരുന്നു മരണം. ഓപ്പോൾ, ചട്ടക്കാരി, അരനാഴിക നേരം, ഓടയിൽ നിന്ന്, പണി തീരാത്ത വീട്, മിണ്ടാപ്പെണ്ണ് എന്നിവയാണ് പ്രധാന മലയാള സിനിമകൾ.മലയാളത്തിന് പുറമേ തമിഴ്, തെലുങ്ക്, കന്നട, ഹിന്ദി എന്നീ ഭാഷകളിലും നിരവധി സിനിമകൾ അദ്ദേഹം സംവിധാനം ചെയ്തു. സിനിമ മേഖലയ്‌ക്ക് നൽകിയ സമഗ്ര സംഭാവനകൾക്ക് 2009 ൽ ജെ.സി ഡാനിയേൽ പുരസ്‌കാരം നൽകിയാണ് സേതുമാധവനെ ആദരിച്ചത്.നിരവധി തവണ ദേശീയ ചലച്ചിത്ര പുരസ്‌കാരവും നേടിയിട്ടുണ്ട്.1931 ൽ സുബ്രഹ്മണ്യം- ലക്ഷ്മി ദമ്പതികളുടെ മകനായി പാലക്കാട് ജില്ലയിൽ ആയിരുന്നു അദ്ദേഹത്തിന്റെ ജനനം. വിക്ടോറിയ കോളേജിൽ ബിരുദ വിദ്യാഭ്യാസം പൂർത്തിയാക്കിയ അദ്ദേഹം സിനിമയെന്ന മോഹവുമായി ചെന്നൈയിലേക്ക് തിരിച്ചു. പ്രശസ്ത സിനിമാ സംവിധായകൻ കെ രാമനാഥിന്റെ അസിസ്റ്റന്റ് ആയായിരുന്നു തുടക്കം. പിന്നീട് എൽ എസ് പ്രസാദ്, എ എസ് എ സ്വാമി, സുന്ദർ റാവു തുടങ്ങിയവരുടെ അസിസ്റ്റന്റായും പ്രവർത്തിച്ചു.1960 ലാണ് സ്വന്തമായി ആദ്യത്തെ സിനിമ സംവിധാനം ചെയ്യുന്നത്. ജ്‌ഞാനസുന്ദരിയാണ് അദ്ദേഹം സംവിധാനം ചെയ്ത ആദ്യ മലയാള ചിത്രം.ഭാര്യ: വല്‍സല സേതുമാധവന്‍. മക്കള്‍: സന്തോഷ്, ഉമ, സോനുകുമാര്‍.