കോട്ടയം: മകന്റെ അമിത മദ്യപാനം മൂലം പൊറുതി മുട്ടിയ പിതാവ് കുടുംബ വഴക്കിനിടെ മകനെ കുത്തിക്കൊന്നു. കുറവിലങ്ങാട് കാണില്‍ക്കുളം കോളനിക്കു സമീപം ഇഞ്ചിക്കുടിലില്‍ ദീപുവാണ് (37) പിതാവിന്റെ കുത്തേറ്റ് മരിച്ചത്.
ഞായറാഴ്ച രാത്രി എട്ടേമുക്കാലോടെയാണ് സംഭവം. സംഭവത്തില്‍ പിതാവ് ദേവനെ (67) പോലീസ് കസ്റ്റഡിയിലെടുത്തു. അവിവാഹിതനായ ദീപു മദ്യത്തിന് അടിമയാണെന്ന് നാട്ടുകാര്‍ പറയുന്നു. മദ്യപിച്ചെത്തുന്ന ദീപു സ്ഥിരമായി വീട്ടില്‍ വഴക്കുണ്ടാക്കാറുണ്ടെന്നും ഇവര്‍ പോലീസിനോട് പറഞ്ഞു.
അവിവാഹിതനായ ദീപുവിന് രണ്ടു സഹോദരിമാരാണുള്ളത്. വിവാഹപ്രായം കഴിഞ്ഞെങ്കിലും ഇരുവരുടെയും വിവാഹം ഇതുവരെ നടന്നില്ല. ദീപുവിന്റെ അമിത മദ്യപാനമാണ് പെണ്‍മക്കളെ കെട്ടിച്ചയക്കാന്‍ കഴിയാത്തതെന്ന് പിതാവ് ബന്ധുക്കളോട് പറയാറുണ്ട്. കഴിഞ്ഞദിവസവും മദ്യപിച്ചെത്തിയ മകനും പിതാവും തമ്മില്‍ ഇതേചൊല്ലിയാണ് വാക്കുതര്‍ക്കമുണ്ടായത്.