കാസർകോഡ്:കാസർകോട് നിന്നും രണ്ടുലക്ഷം രൂപ വിലമതിക്കുന്ന വ്യാജ സൗന്ദര്യ വർധക വസ്തുക്കൾ പിടികൂടി.കാസർകോഡ് തായലങ്ങാടിയിലെ ഒരു ഗോഡൗണിൽ ഡ്രഗ്സ് ഇന്റലിജൻസ് വിഭാഗം നടത്തിയ പരിശോധനയിലാണ് അനധികൃതമായി സൂക്ഷിച്ചിരുന്ന വ്യാജ സൗന്ദര്യ വർധക വസ്തുക്കൾ പിടികൂടിയത്.ക്രീം,ലോഷൻ,സോപ്പ്,പൗഡർ തുടങ്ങിയവയാണ് പിടിച്ചെടുത്തത്. യുവാക്കൾക്കിടയിൽ വ്യാജ സൗന്ദര്യ വർധക വസ്തുക്കൾ വിറ്റഴിക്കപ്പെടുന്നുവെന്ന വാർത്തയെ തുടർന്നാണ് പരിശോധന നടത്തിയത്.കമ്പനിയുടെ പേരോ വിലാസമോ ഇവയിലടങ്ങിയിരിക്കുന്ന വസ്തുക്കളുടെ വിവരങ്ങളോ ഒന്നും ഉത്പന്നങ്ങളിൽ രേഖപ്പെടുത്തിയിട്ടില്ല.വിദ്യാനഗർ സ്വദേശി ഇബ്രാഹിം ഖലീലിന്റെ ഉടമസ്ഥതയിലുള്ളതാണ് ഗോഡൗൺ.സംഭവത്തിൽ പോലീസ് ഒരാളെ കസ്റ്റഡിയിലെടുത്തിട്ടുണ്ട്.പിടിച്ചെടുത്ത വസ്തുക്കൾ കാസർകോഡ് ഒന്നാം ക്ലാസ് മജിസ്‌ട്രേറ്റ് കോടതിയിൽ ഹാജരാക്കും.