( ശ്രീഗുരുവിനെ തെളിവെടുപ്പിനായി കൊണ്ടുവന്നപ്പോൾ)
കണ്ണൂർ:പയ്യാമ്പലത്ത് യുവാവ് തലയ്ക്കടിയേറ്റ് മരിച്ച സംഭവത്തിൽ എറണാകുളം സ്വദേശി പിടിയിൽ.എറണാകുളം ഞാറയ്ക്കല്‍ പുതുവൈപ്പിലെ ശ്രീഗുരു (33) അറസ്റ്റിലായത്. കോയമ്പത്തൂരിൽ നിന്നാണ് ഇയാൾ പിടിയിലായത്.ചാലാട് ഊരത്താന്‍കണ്ടിയിലെ ഷൈജു (42) തലയ്ക്കടിയേറ്റ് മരിച്ച സംഭവത്തിലാണ് ഇയാൾ അറസ്റ്റിലായത്.ഇക്കഴിഞ്ഞ 13ന് പുലര്‍ച്ചെ പ്രഭാതസവാരിക്കിറങ്ങിയവരാണ് ഷൈജുവിനെ തലയ്ക്കടിയേറ്റ് അവശനിലയില്‍ കാണുന്നത്. തുടര്‍ന്ന് അഗ്‌നിശമനസേനയെയും പോലീസിനെയും വിവരമറിയിക്കുകയായിരുന്നു. കണ്ണൂര്‍ ജില്ലാ ആശുപത്രിയില്‍ പ്രവേശിപ്പിച്ച ഷൈജുവിനെ നില ഗുരുതരമായതിനാല്‍ കോഴിക്കോട് മെഡിക്കല്‍ കോളജില്‍ എത്തിച്ചെങ്കിലും മരിക്കുകയായിരുന്നു.14 വര്‍ഷമായി പള്ളിയാംമൂലയില്‍ ഒരു സ്വകാര്യ വ്യക്തിയുടെ സ്ഥലംനോക്കി നടത്തിവരികയായിരുന്നു അറസ്റ്റിലായ ശ്രീഗുരു. 12ന് രാത്രി ശ്രീഗുരുവും ഷൈജുവും ഉള്‍പ്പെടെയുള്ള ആറംഗസംഘം മദ്യപിച്ചിരുന്നു. മദ്യപാനത്തിനുശേഷം ഷൈജു ഒഴികെ മറ്റുള്ളവര്‍ പോവുകയും ചെയ്തു. ഇതിനിടയില്‍ ശ്രീഗുരു പ്രകൃതിവിരുദ്ധ ബന്ധത്തിന് ഷൈജുവിനെ പ്രേരിപ്പിക്കുകയും ചെയ്തു. ഇതിനെ ചെറുത്ത ഷൈജുവിനെ കല്ലിന് തലയ്ക്കടിക്കുകയായിരുന്നു. ഷൈജു ബോധംകെട്ടതിനെ തുടര്‍ന്ന് ശ്രീഗുരു കോയന്പത്തൂരിലേക്ക് കടന്നുകളയുകയും ചെയ്തു. അന്വേഷണം തുടരുന്നതിനിടെ കോയമ്പത്തൂരില്‍ നിന്ന് വീണ്ടും ഇയാള്‍ തിരികെ കണ്ണൂരിലെത്തുകയും ഷൈജു മരിച്ചുവെന്ന് അറിയുകയും ചെയ്തു.ഇതറിഞ്ഞ പോലീസ് ശ്രീഗുരുവിനെ പിന്തുടര്‍ന്നെങ്കിലും ഇയാള്‍ വീണ്ടും കോയമ്പത്തൂരിലേക്ക് കടന്നുകളയുകയായിരുന്നു. കോയമ്പത്തൂരില്‍വച്ച് ഇന്നലെ രാത്രിയാണ് ഇയാള്‍ അറസ്റ്റിലായത്. സവിത തിയേറ്ററിനു സമീപം ഒരാളെ തലയ്ക്കടിച്ച സംഭവം ഉള്‍പ്പെടെ നിരവധി കളവുകേസുകളിലെ പ്രതിയാണ് അറസ്റ്റിലായ ശ്രീഗുരുവെന്ന് പോലീസ് പറഞ്ഞു.