ഇരിട്ടി ∙ ആറളം ഫാമിൽ കാട്ടാന കുത്തിക്കൊന്ന വാളത്തോട് വടക്കേ തുരുത്തേൽ റെജി എബ്രഹാമിന് നാടിന്റെ കണ്ണീരിൽ കുതിർന്ന അന്ത്യപ്രണാമം. ജനപ്രതിനിധികളും മത- രാഷ്ട്രീയ-സാമൂഹിക രംഗത്തെ പ്രമുഖരും ഉൾപ്പെടെ വൻ ജനാവലി അന്തിമോപചാരം അർപ്പിക്കാൻ എത്തി. നിർധന സാഹചര്യത്തിലുള്ള കുടുംബത്തിന്റെ ഏക ആശ്രയമായിരുന്നു റെജി. ആറളം ഫാമിൽ സ്വകാര്യവ്യക്തി കരാർ എടുത്തു നടത്തുന്ന കൈതച്ചക്ക തോട്ടത്തിൽ മാനേജരായി ജോലിചെയ്യുന്ന റെജി ആ വരുമാനം കൊണ്ടാണ് കുടുംബം പുലർത്തിയിരുന്നത്. കാട്ടാനക്കൂട്ടത്തെ ഓടിക്കുന്നതിനിടയിൽ ആണ് റെജി ദാരുണമായി കൊല്ലപ്പെട്ടത് വനംവകുപ്പ് ആർആർടി ഉൾപ്പെടുന്ന രണ്ട് സ്‌ക്വാഡുകൾ സ്ഥലത്ത് ക്യാംപ് ചെയ്യുകയാണ്. റെജിയുടെ കുടുംബത്തിനു സർക്കാർ ജോലി നൽകണമെന്നും ആവശ്യമുയർന്നിട്ടുണ്ട്.