തിരുവനന്തപുരം:സ്കൂളുകളില് ഉച്ചഭക്ഷണം കുട്ടികളെ കൊണ്ട് വിളമ്പിക്കാൻ പാടില്ലെന്ന് വിദ്യാഭ്യാസ വകുപ്പിന്റെ കർശന നിർദേശം.സ്കൂളുകളില് പാചകം ചെയ്ത ഭക്ഷണം സ്റ്റീല് ബക്കറ്റുകളിലാക്കി ക്ലാസ് മുറികളിലേക്കും ഭക്ഷണം വിതരണം ചെയ്യുന്ന സ്ഥലത്തും എത്തിക്കുന്നതിനായി കുട്ടികളെ ഉപയോഗപ്പെടുത്തുന്നതായി പരാതി ലഭിച്ചതിനെ തുടര്ന്നാണ് ഡി.പി.ഐയുടെ ഉത്തരവ്.ഉച്ചഭക്ഷണ പദ്ധതിപ്രകാരം സ്കൂളുകളില് ഭക്ഷണം പാചകം ചെയ്യുന്നതിനും തുടര്ന്ന് ഭക്ഷണം കുട്ടികള്ക്ക് വിളമ്പി നല്കുന്നതിനും എസ് എം സി, പിടിഎ, എംപിടിഎ എന്നിവയിലെ അംഗങ്ങളുടെ സഹായവും മേല്നോട്ടവും ഉറപ്പു വരുത്തണമെന്ന് നേരത്തെ നിര്ദേശിച്ചിരുന്നു.എന്നാല്, ചില സ്കൂളുകളില് പാചകം ചെയ്ത ഭക്ഷണം ബക്കറ്റുകളിലാക്കി ക്ലാസ് മുറികളിലേക്കും ഭക്ഷണം വിതരണം ചെയ്യുന്ന സ്ഥലത്തേക്കും എത്തിക്കുന്നത് കുട്ടികളാണ്. ഇക്കാര്യം ശ്രദ്ധയില്പ്പെട്ടതിനെ തുടര്ന്നാണ് കുട്ടികളെ ഉപയോഗിച്ച് ഭക്ഷണവിതരണം നടത്തരുതെന്നാവശ്യപ്പെട്ട് പൊതുവിദ്യാഭ്യാസ ഡയറക്ടര്ക്ക് വേണ്ടി പൊതുവിദ്യാഭ്യാസ അഡീഷണല് ഡയറക്ടര് സര്ക്കുലര് പുറപ്പെടുവിച്ചത്.ഉച്ചഭക്ഷണ പദ്ധതി നടത്തിപ്പു സംബന്ധിച്ച് കേന്ദ്ര സംസ്ഥാന സര്ക്കാരുകള് പുറപ്പെടുവിച്ചിട്ടുളള മാര്ഗ നിര്ദേശങ്ങള്ക്കും ചട്ടങ്ങള്ക്കും നിയമങ്ങള്ക്കും വിരുദ്ധമായി കുട്ടികളെ ഉപയോഗിച്ച് ഇത്തരം പ്രവര്ത്തികള് ചെയ്യിക്കുന്നത് അങ്ങേയറ്റം അപലപനീയമാണെന്നും ഉത്തരവില് ചൂണ്ടിക്കാട്ടുന്നു.