കാസർകോഡ്:ഒൻപതാം ക്ലാസുകാരന്റെ ബാഗിൽ നിന്നും ലഹരിവസ്തുക്കളും ലഹരി വലിക്കാനുള്ള ഹുക്കയും പിടികൂടി.കുട്ടിയുടെ രക്ഷിതാവിന്റെ സഹകരണത്തോടെ ബേക്കൽ എസ്‌ഐ കെ.പി വിനോദ് കുമാറും സംഘവും ചേർന്നാണ് ഇവ പിടികൂടിയത്.പള്ളിക്കര പഞ്ചായത്തിലെ ഒരു സർക്കാർ സ്കൂളിലാണ് ഈ വിദ്യാർത്ഥി പഠിക്കുന്നത്.കുട്ടിക്കെതിരെ ജുവനൈൽ ആക്ട് അനുസരിച്ച് കേസെടുത്തതായി എസ്‌ഐ അറിയിച്ചു. പിടികൂടിയ വിദേശ നിർമിത ഹുക്ക ആര് നല്കിയതാണെന്ന് വിദ്യാർത്ഥി ഇനിയും പോലീസിനോട് വെളിപ്പെടുത്തിയിട്ടില്ല. ബേക്കൽ പോലീസ് കഞ്ചാവിനെതിരെ നടത്തുന്ന ശക്തമായ പരിശോധനയിൽ കഴിഞ്ഞ ദിവസം പള്ളിക്കര സ്കൂളിന് പിൻവശത്തു നിർമിക്കുന്ന ആശുപത്രികെട്ടിടത്തിന്റെ ആളൊഴിഞ്ഞ സ്ഥലത്തു നിന്നും കഞ്ചാവും കഞ്ചാവ് നിറച്ച സിഗററ്റുമായി മുഹമ്മദ് ഹാരിസ് എന്നയാളെ പിടികൂടിയിരുന്നു.ഇവിടെ കഞ്ചാവുവലിക്കാരുടെ താവളമാണെന്ന് രഹസ്യ വിവരം ലഭിച്ചതിനെ തുടർന്നാണ് പോലീസ് പരിശോധന നടത്തിയത്.