തൃശൂർ:കൊറോണ വൈറസ് ബാധയുണ്ടെന്ന സംശയത്തെ തുടർന്ന് ഡോക്ടറെയും ഭാര്യയെയും ഫ്ലാറ്റിനുള്ളിൽ പൂട്ടിയിട്ടതായി പരാതി.സംഭവവുമായി ബന്ധപ്പെട്ട് റസിഡന്റ്സ് അസോസിയേഷന്‍ ഭാരവാഹികളെ അറസ്റ്റ് ചെയ്തു.ഡോക്റ്ററേയും ഭാര്യയെയും പൂട്ടിയിട്ടവർ ഫ്ലാറ്റിന്റെ ഡോറിൽ കോറോണയെന്ന ബോർഡ് വെയ്ക്കുകയും ചെയ്തു.ഇവര്‍ സൗദി സന്ദര്‍ശനം കഴിഞ്ഞെത്തിയവരാണെന്നു ചൂണ്ടിക്കാട്ടിയായിരുന്നു നടപടി.തൃശൂര്‍ മുണ്ടുപാലത്താണ് സംഭവം.ഡോക്ടര്‍ ഫോണില്‍ വിളിച്ചറിയിച്ചതനുസരിച്ച്‌ ഈസ്റ്റ് പൊലീസ് എത്തിയാണ് ഇവരെ അറസ്റ്റ് ചെയ്തത്.ഡോക്ടര്‍ക്കോ ഭാര്യയ്ക്കോ കോവിഡ് ലക്ഷണങ്ങളൊന്നും ഇല്ലെന്നാണ് പൊലീസില്‍ നിന്നു ലഭിച്ച വിവരം.
സൗദിയില്‍ ജോലി ചെയ്യുന്ന ഡോക്ട്ടറും ഭാര്യയും കഴിഞ്ഞ ദിവസമാണ് നാട്ടിൽ തിരിച്ചെത്തിയത്.വിമാനത്താവളത്തില്‍ പരിശോധനകള്‍ നടത്തി കുഴപ്പമൊന്നുമില്ലെന്ന് ഉറപ്പാക്കി. ഇക്കാര്യം റെസിഡന്റസ് അസോസിയേഷനെ അറിയിക്കുകയും ചെയ്തു. എന്നാല്‍ ഇവര്‍ ഫ്‌ലാറ്റില്‍ എത്തിയപ്പോള്‍ അസോസിയേഷന്‍കാര്‍ തടയുകയായിരുന്നു. തുടര്‍ന്നു വാക്കുതര്‍ക്കമായി. ഇതിനിടെ അയല്‍ക്കാര്‍ ആരോഗ്യവകുപ്പുമായി ബന്ധപ്പെട്ടെങ്കിലും ലക്ഷണങ്ങള്‍ ഇല്ലാത്തതിനാല്‍ ആശുപത്രിയില്‍ പ്രവേശിപ്പിക്കാനാിവില്ലെന്ന് അറിയിച്ചു. ഫ്ലാറ്റിനുള്ളിൽ കടന്ന ഇവര്‍ സഹായിയെ വിളിച്ച്‌ രണ്ടാഴ്ച കഴിയുന്നതിനു വേണ്ട സാധനങ്ങള്‍ എത്തിക്കാന്‍ ആവശ്യപ്പെട്ടു.അയാള്‍ സാധനങ്ങള്‍ മുറിക്കു പുറത്തുകൊണ്ടുവച്ചു മടങ്ങി.ഇത് എടുക്കാനായി വാതില്‍ തുറക്കാന്‍ ശ്രമിച്ചപ്പോഴാണ് പുറത്തുനിന്നു പൂട്ടിയതായി മനസിലായത്. തുടര്‍ന്ന് പൊലീസിനെ വിവരമറിയിക്കുകയായിരുന്നു.