കണ്ണൂർ:അഴിമതി നടക്കുന്നത് നിമിഷങ്ങള്‍ക്കകം തന്നെ കലക്ടറെ അറിയിക്കാനുള്ള ‘വി ആര്‍ കണ്ണൂര്‍’ ആപ്പുമായി കണ്ണൂർ ജില്ലാ ഭരണകൂടം.കണ്ണൂര്‍ ജില്ലയിലെ ഏതു സര്‍ക്കാര്‍ സ്ഥാപനവുമായി ബന്ധപ്പെട്ട പരാതിയും ഇതുവഴി അയയ്ക്കാം. ഇത്തരത്തില്‍ അയയ്ക്കുന്ന പരാതികള്‍ കലക്ടര്‍ക്ക് നേരിട്ട് ലഭിക്കും. ആരാണ് പരാതി അയയ്ക്കുന്നത് എന്നതുള്‍പ്പടെയുള്ള വിവരങ്ങള്‍ കലക്ടര്‍ക്കു മാത്രമേ അറിയാന്‍ സാധിക്കൂ. വരുന്ന പരാതികള്‍ കൃത്യമായി പരിശോധിച്ചു കലക്ടര്‍ ബന്ധപ്പെട്ട വകുപ്പുകള്‍ വഴി ആവശ്യമായ നടപടി ഉറപ്പാക്കും.ജില്ലയിലെ സര്‍ക്കാര്‍ ഓഫിസുകളുടെ പ്രവര്‍ത്തനത്തെക്കുറിച്ച്‌ പൊതു ജനങ്ങള്‍ക്ക് അഭിപ്രായം രേഖപ്പെടുത്താനുള്ള റേറ്റ് ആന്‍ഡ് റിവ്യൂ സൗകര്യം നേരത്തേ ‘വീആര്‍ കണ്ണൂര്‍’ ആപ്പില്‍ ഏര്‍പ്പെടുത്തിയിരുന്നു. നന്നായി പ്രവര്‍ത്തിക്കുന്ന ഓഫിസുകള്‍ക്ക് അഭിനന്ദനങ്ങളും പ്രശ്‌നങ്ങളുള്ള ഓഫിസുകള്‍ക്കു വിമര്‍ശനവുമെല്ലാം ഇതുവഴി ലഭിക്കുന്നുണ്ട്. അഭിപ്രായങ്ങള്‍ എല്ലാവര്‍ക്കും വായിക്കാനും കഴിയും.