ന്യൂഡല്ഹി: നിയമത്തിന് ഇരുപത്തിരണ്ടുകാരിയെന്നോ അന്പതുകാരിയെന്നോ ഇല്ലെന്ന് ഡല്ഹി പൊലീസ് കമ്മിഷണര് എസ്എന് ശ്രീവാസ്തവ.ഗ്രെറ്റ ടൂള് കിറ്റ് കേസില് പരിസ്ഥിതി പ്രവര്ത്തക ദിഷ രവിയെ അറസ്റ്റ് ചെയ്ത സംഭവത്തില് പ്രതികരിക്കുകയായിരുന്നു അദ്ദഹം.ഇരുപത്തിരണ്ടുകാരിയെ അറസ്റ്റ് ചെയ്തതില് പൊലീസിനു വീഴ്ച പറ്റിയെന്നൊക്കെ ആളുകള് പറയുന്നതില് ഒരു കാര്യവുമില്ല.ദിഷ രവിയെ അഞ്ചു ദിവസത്തെ കസ്റ്റഡിയില് വാങ്ങിയിരിക്കുകയാണ്. കേസ് അന്വേഷണ ഘട്ടത്തിലാണെന്നും അദ്ദേഹം പറഞ്ഞു.കര്ഷക സമരവുമായി ബന്ധപ്പെട്ട, പരിസ്ഥിതി പ്രവര്ത്തകയായ ഗ്രെറ്റ തുന്ബെര്ഗിന്റെ ട്വീറ്റാണ് ദിഷയ്ക്കെതിരായ കേസിന് ആധാരം. ജനുവരി 26ന് നടന്ന കര്ഷക പ്രക്ഷോഭങ്ങള്ക്ക് പിന്തുണ അറിയിച്ച് ഗ്രെറ്റ ട്വീറ്റ് ചെയ്ത ടൂള്കിറ്റ് രേഖയില് കര്ഷകസമരങ്ങളെ പിന്തുണയ്ക്കാന് ആഗ്രഹിക്കുന്നവര് അറിയേണ്ടതും അവര് ചെയ്യേണ്ടതുമായ കാര്യങ്ങള് സംബന്ധിച്ച വിവരങ്ങളായിരുന്നു ഉണ്ടായിരുന്നത്.വിവാദമായ ഈ കിറ്റിന് പിന്നില് ഖാലിസ്ഥാനി അനുകൂല സംഘടനയാണെന്നാണ് കേന്ദ്രത്തിന്റെയും പൊലീസിന്റെയും വാദം. ഇന്ത്യയെയും കേന്ദ്ര സര്ക്കാരിനെയും അന്താരാഷ്ട്രതലത്തില് ആക്ഷേപിക്കുന്നതിനുള്ള ഗൂഢാലോചനയുടെ തെളിവാണ് ഇതെന്നും പൊലീസ് പറയുന്നു.ഇതേത്തുടര്ന്നുള്ള അന്വേഷണത്തിന്റെ ഭാഗമായാണ് ദിഷ രവിയെ അറസ്റ്റ് ചെയ്തത്. സമൂഹ മാധ്യമങ്ങളില് ദിഷ ടൂള്കിറ്റ് സമര പരിപാടികള് പ്രചരിപ്പിച്ചു എന്നാണ് പൊലീസ് പറയുന്നത്. ടൂള്കിറ്റ് എഡിറ്റ് ചെയ്തുവെന്നതും അറസ്റ്റിന് കാരണമായി പൊലീസ് ചൂണ്ടിക്കാട്ടുന്നു.