പത്തനംതിട്ട:സന്നിധാനത്ത് യുവതികൾ പ്രവേശിച്ചാൽ നട അടച്ചിടുമെന്ന തന്ത്രിയുടെ പ്രസ്താവനയ്‌ക്കെതിരെ വിമർശനവുമായി ദേവസ്വം ബോർഡ് അംഗം കെ.പി ശങ്കരദാസ്.യുവതികള്‍ വന്നാല്‍ നട അടയ്ക്കുമെന്ന സമീപനത്തോട് ദേവസ്വം ബോര്‍ഡിന് യോജിപ്പില്ല. പരികര്‍മികളുടെ പ്രതിഷേധം ക്ഷേത്രത്തിന് കളങ്കംവരുത്തിയെന്നും അദ്ദേഹം പറഞ്ഞു.പന്തളം കൊട്ടാരം പറയുന്നത് തന്ത്രി അനുസരിക്കണമെന്നില്ലെന്നും ശങ്കരദാസ് കൂട്ടിച്ചേര്‍ത്തു.സന്നിധാനത്ത് പരികര്‍മികള്‍ പ്രതിഷേധിച്ച സംഭവത്തില്‍ മേല്‍ശാന്തിമാര്‍ക്ക് ദേവസ്വം ബോര്‍ഡ് കഴിഞ്ഞ ദിവസം നോട്ടീസ് നല്‍കിയിരുന്നു. പ്രതിഷേധത്തില്‍ പങ്കെടുത്ത പരികര്‍മികളുടെ വിവരങ്ങള്‍ നല്‍കണമെന്ന് ആവശ്യപ്പെട്ടാണ് നോട്ടീസ് അയച്ചിരിക്കുന്നത്. യുവതി പ്രവേശനത്തിനെതിരെ വെള്ളിയാഴ്ച രാവിലെയാണ് പരികര്‍മികള്‍ പൂജകള്‍ നിര്‍ത്തിവച്ച്‌ പതിനെട്ടാം പടിക്കുതാഴെ പ്രതിഷേധം സംഘടിപ്പിച്ചത്.