കൊച്ചി: മുന്‍ മിസ് കേരള അടക്കം മൂന്നുപേരുടെ അപകട മരണവുമായി ബന്ധപ്പെട്ട് കൂടുതല്‍ വ്യക്തത തേടാന്‍ പൊലീസ്.മോഡലുകള്‍ പങ്കെടുത്ത ഡിജെ പാര്‍ട്ടി നടന്ന ഹോട്ടലിന്റെ ഉടമ റോയി ജെ വയലാറ്റിനെ ഇന്ന് വീണ്ടും ചോദ്യം ചെയ്യും. ഇന്നലെ മണിക്കൂറുകളോളം ഇയാളെ ചോദ്യം ചെയ്തിരുന്നത്.ഹോട്ടല്‍ ദൃശ്യങ്ങള്‍ അടങ്ങുന്ന രണ്ടാമത്തെ ഡിവിആര്‍ പാലാരിവട്ടം പൊലീസ് സ്റ്റേഷനില്‍ ഹാജരാക്കണമെന്ന് ഇയാളോട് നിര്‍ദേശിച്ചിട്ടുണ്ട്. ഡിവിആറില്‍ നിര്‍ണായക വിവരം ഉണ്ടന്നാണ് സൂചന. മോഡലുകളുടെ അപകട മരണവുമായി ബന്ധപ്പെട്ട് പൊലീസ് ചോദ്യം ചെയ്യലിന് നോട്ടീസ് നല്‍കിയിരുന്നെങ്കിലും റോയ് ഹാജരായിരുന്നില്ല. ഇതോടെ അറസ്റ്റ് നടപടിയിലേക്ക് കടക്കുമെന്ന പൊലീസിന്റെ മുന്നറിയിപ്പിനെ തുടര്‍ന്നാണ് ഇയാള്‍ ഇന്നലെ ഹാജരായത്.ഡിജെ പാര്‍ട്ടിയില്‍ പങ്കെടുത്ത് മടങ്ങുന്നതിനിടെയായിരുന്നു മിസ് കേരള അന്‍സി കബീറും റണ്ണറപ് അഞ്ജന ഷാജനും വാഹനാപകടത്തില്‍ മരിച്ചത്. സംഭവദിവസം രാത്രി ഹോട്ടലിൽനിന്നു കാറിൽ അമിതവേഗത്തിൽ യുവതികൾ പോകാനിടയാക്കിയ സംഭവത്തെ കുറിച്ചു ഹോട്ടൽ ഉടമയ്‌ക്കു വ്യക്തമായ അറിവുണ്ടെന്നാണ് റിപ്പോർട്ട്.