കണ്ണൂര്‍: ബഹ്‌റിനില്‍ നിന്നും മടങ്ങി വരുന്നതിനിടെ കാണാതായ നാറാത്ത് സ്വദേശിയുടെ മൃതദേഹം പഴയങ്ങാടി പുഴയില്‍ കണ്ടെത്തി. പാമ്പുരുത്തി മേലേ പാത്ത് വീട്ടില്‍ അബ്ദുല്‍ ഹമീദിന്റെ (42) മൃതദേഹമാണ് ഞായറാഴ്‌ച്ച വൈകുന്നേരത്തോടെ പഴയങ്ങാടി പുഴയില്‍ നിന്നും കണ്ടെത്തിയത്. ശനിയാഴ്‌ച്ച ബഹ്‌റിനില്‍ നിന്നും കരിപ്പൂരില്‍ വിമാനമിറങ്ങി നാട്ടിലേക്ക് വരികയായിരുന്നു. കോഴിക്കോട് നിന്നും കണ്ണൂരിലേക്ക് ട്രെയിനിലാണ് വന്നിരുന്നത്.എന്നാല്‍ ഇയാള്‍ വീട്ടിലെത്താത്തതിനെ തുടര്‍ന്ന് വീട്ടുകാര്‍ വിവരം പൊലിസില്‍ അറിയിക്കുകയായിരുന്നു. റെയില്‍വേ പൊലിസ് സി.സി.ടി.വി ക്യാമറകള്‍ പരിശോധിച്ചപ്പോഴാണ് ഇയാള്‍ കണ്ണൂരില്‍ ട്രെയിനിറങ്ങിയില്ലെന്ന് വ്യക്തമായത്. ഇതിനിടെ അബ്ദുല്‍ ഹമീദിന്റെ പാസ്‌പോര്‍ട്ട് ഉള്‍പെടെയുള്ള ലഗേജുകള്‍ മംഗലൂരിൽ നിര്‍ത്തിയിട്ട ട്രെയിനില്‍ നിന്നും കണ്ടെത്തുകയും ചെയ്തു. ഇയാൾക്കായി പൊലിസ് പരിശോധന നടത്തി വരുന്നതിനിടെയാണ് മൃതദേഹം പഴയങ്ങാടി പുഴയില്‍ നിന്നും കണ്ടെത്തിയത്.മൃതദേഹം പരിയാരത്തെ കണ്ണൂര്‍ ഗവ. മെഡിക്കല്‍ കോളേജില്‍ പോസ്റ്റുമോര്‍ട്ടം നടത്തിയതിന് ശേഷം ഇന്ന് കബറടക്കും. ഏറെ ക്കാലമായി വിദേശത്തു ജോലി ചെയ്തു വരികയായിരുന്നു അബ്ദുല്‍ ഹമീദ്. പെരുമാച്ചേരി കൊട്ടപ്പൊയില്‍ സ്വദേശിനി റാബിയ്യയാണ് ഭാര്യ. റസല്‍, റയ, സബ,സൈബ എന്നിവരാണ് മക്കള്‍.