മട്ടന്നൂർ: നെല്ലൂന്നിയിൽ സിപിഎം പ്രവർത്തകന് വെട്ടേറ്റു. ആർഎസ്എസ് നിയന്ത്രണത്തിലുള്ള സേവാ കേന്ദ്രത്തിനും ബസ് വെയിറ്റിംഗ് ഷെൽട്ടറിനു നേരേയും ആക്രമണം. വെട്ടേറ്റ സിപിഎം പ്രവർത്തകനായ നെല്ലൂന്നിയിലെ വിശാലയിൽ പി. ജിജീഷി (30)നെ കണ്ണൂർ എകെജി ആശുപത്രിയിൽ പ്രവേശിപ്പിച്ചു. ഞായറാഴ്ച രാത്രി 10 ഓടെ നെല്ലൂന്നിയിൽ നിന്നു വീട്ടിലേക്ക് നടന്നു പോകുന്നതിനിടെ കാറിലെത്തിയ സംഘമാണ് ജിജീഷിനെ വെട്ടിപ്പരിക്കേൽപ്പിച്ചത്. വലതു കൈയ്ക്കാണ് വെട്ടേറ്റത്.ഇതിന്‍റെ തുടർച്ചയായാണ് തിങ്കളാഴ്ച രാവിലെ നെല്ലൂന്നിയിൽ ടൗണിലെ സേവാ കേന്ദ്രത്തിനും ബസ് വെയിറ്റിംഗ് ഷെൽട്ടറിനു നേരെയും ആക്രമണമുണ്ടായി. സേവാ കേന്ദ്രത്തിലെ ഫർണിച്ചറുകൾ അടിച്ചു തകർക്കുകയും പി.കെ.ചന്തുക്കുട്ടിയുടെ സ്മരണയ്ക്കായി നിർമിച്ച ഷെൽട്ടറുമാണ് തകർത്തത്. ശ്രീകൃഷ്ണ ജയന്തി ഘോഷയാത്രയുടെ ഭാഗമായി കെട്ടിയ ഫ്ളക്സ് ബോർഡുകളും കൊടിതോരണങ്ങളും കത്തിച്ചതായും പരാതിയുണ്ട്. സംഘർഷ സ്ഥലത്ത് പോലീസുകാരെ നിയോഗിച്ചിട്ടുണ്ട്.