ന്യൂഡൽഹി: 15 വയസിന്‌ മുകളിലുള്ള കുട്ടികള്‍ക്കുള്ള കോവിഡ് വാക്‌സിന്‍ രജിസ്ട്രേഷന് ജനുവരി 1 മുതല്‍ ആരംഭിക്കും.കോവിൻ രജിസ്ട്രേഷൻ പോർട്ടൽ മേധാവിയായ ഡോ ആർ എസ് ശർമയാണ് ഇക്കാര്യം അറിയിച്ചത്.വിദ്യാര്‍ഥികളില്‍ ചിലർക്ക് ആധാർ കാർഡ് ഇല്ലാത്ത പശ്ചാത്തലത്തില്‍ വിദ്യാർത്ഥി തിരിച്ചയൽ കാർഡ് ഉപയോഗിച്ചു രജിസ്ട്രേഷന് നടത്താം.കോവിൻ പ്ലാറ്റ് ഫോമിൽ ആ സൗകര്യവും കൂട്ടിചേര്‍ത്തിട്ടുണ്ട്.15-നും 18- നും ഇടയിലുള്ള കുട്ടികൾക്ക് വാക്സിൻ നൽകുമെന്ന് പ്രധാനമന്ത്രി മോദി ശനിയാഴ്ചയാണ് പ്രഖ്യാപിച്ചത്.കൗമാരക്കാര്‍ക്ക് നല്‍കാവുന്ന രണ്ടു വാക്സീനുകള്‍ക്ക് രാജ്യത്ത് അനുമതി ഉണ്ടെങ്കിലും ഭാരത് ബയോട്ടെക്കിന്‍റെ കോവാക്സീന്‍ മാത്രമാകും തുടക്കത്തില്‍ നല്‍കുക. നാലാഴ്ച്ച ഇടവേളയില്‍ രണ്ട് ഡോസ് നല്‍കും. നല്‍കുന്ന വാക്സീന്‍റെ അളവില്‍ വ്യത്യാസം ഉണ്ടാകില്ല. ജനുവരി 10 മുതൽ കോവിഡ് മുന്നണി പോരാളികൾക്കും 60 വയസ്സിന് മുകളിലുള്ള രോഗികൾക്കും ബൂസ്റ്റർ ഡോസ് വാക്സിൻ നല്കുമെന്നും പ്രഖ്യാപിച്ചിരുന്നു. ആരോഗ്യപ്രവര്‍ത്തകര്‍ക്ക് ബൂസ്റ്റർ ഡോസായി നേരത്തെ സ്വീകരിച്ച അതേ വാക്സീന്‍ തന്നെ നല്‍കിയാല്‍ മതിയെന്നും തീരുമാനമായി. രണ്ടാം ഡോസ് കിട്ടി ഒന്‍പത് മാസത്തിന് ശേഷമാകും ആരോഗ്യ പ്രവര്‍ത്തകര്‍ക്ക് ബൂസ്റ്റർ ഡോസ് നല്‍കുക. ഐസിഎംആര്‍ ഉള്‍പ്പടെ വിദഗ്ധ സമിതികള്‍ നടത്തിയ പഠനങ്ങളുടെ അടിസ്ഥാനത്തിലാണ് ഈ ഇടവേള. ഏപ്രില്‍ ആദ്യ വാരത്തിനുള്ളില്‍ രണ്ടാമത്തെ ഡോസ് സ്വീകരിച്ചവര്‍ക്കാകും ബൂസ്റ്റർ ഡോസ് ആദ്യം ലഭിക്കുക. ബൂസ്റ്റർ ഡോസായി വ്യത്യസ്ത വാക്സീന്‍ നല്‍കാന്‍ നേരത്തെ കേന്ദ്രം ആലോചിച്ചിരുന്നു. എന്നാല്‍ ആദ്യ രണ്ട് ഡോസായി സ്വീകരിച്ച അതേ വാക്സീന്‍ തന്നെ നല്‍കിയാല്‍ മതിയെന്നാണ് ഇപ്പോഴത്തെ തീരുമാനം.