കണ്ണൂർ: കോവിഡ് പ്രതിസന്ധിയിൽ വീണ്ടും ദുരിതത്തിലായി സ്വകാര്യ ബസ് ജീവനക്കാർ. കോവിഡ് വ്യാപനം മൂലം യാത്രക്കാരുടെ കുറവും നിലവിലെ സാഹചര്യത്തിൽ നിയന്ത്രണങ്ങൾ പാലിക്കുന്നില്ലെന്ന കാരണത്താൽ വൻ തുക പിഴ അടയ്‌ക്കേണ്ടി വരുന്നതുമാണ് സർവീസ് നിർത്തിവെയ്ക്കാൻ കാരണമാകുന്നതെന്ന് ബസ് തൊഴിലാളി സംഘടനയായ ഓൾ കേരള പ്രൈവറ്റ് ബസ് മെംബേർസ് സംഘടനാ പ്രസിഡണ്ട് സി പി മണിലാൽ പറഞ്ഞു.ലോക്ക് ഡൗണിനു ശേഷം 9000 ബസ്സുകളാണ് ഇപ്പോൾ സർവീസ് നടത്തുന്നത്.സർവീസ് നിലയ്ക്കാതിരിക്കാൻ ജീവനക്കാർ ശമ്പളം കുറച്ചാണ് ഇപ്പോൾ ജോലി ചെയ്യുന്നത്.ലോക്ക് ഡൗണിനു ശേഷം താൽക്കാലികമായി വർധിപ്പിച്ച മിനിമം ചാർജ് 12 രൂപയിലേക്ക് മാറ്റണമെന്നാണ് ജീവനക്കാരുടെ പ്രധാന ആവശ്യം.നിയന്ത്രണം നിലനിൽക്കുന്നിടത്തോളം റോഡ് ടാക്സ് പൂർണ്ണമായും ഒഴിവാക്കുക, ഡീസൽ സബ്‌സിഡി അനുവദിക്കുക തുടങ്ങിയ ആവശ്യങ്ങൾ ഉന്നയിച്ച് എ കെ പി ബി എം ചീഫ് സെക്രെട്ടറിക്ക് നിവേദനം നൽകി.