ബെയ്‌ജിങ്‌:കൊറോണ വൈറസ് ബാധയെ തുടർന്ന് ചൈനയിൽ മരിച്ചവരുടെ എണ്ണം 425 ആയി. തിങ്കളാഴ്ച മാത്രം 64പേരാണ് ചൈനയില്‍ മരണമടഞ്ഞിട്ടുള്ളതെന്നാണ് നാഷണല്‍ ഹെല്‍ത്ത് കമ്മീഷന്‍ അറിയിച്ചിട്ടുള്ളത്. കൊറോണ വൈറസിന്റെ പ്രഭവ കേന്ദ്രമായ ഹുബെയില്‍ നിന്നാണ് ഇവ റിപ്പോര്‍ട്ട് ചെയ്തിട്ടുള്ളത്.20,400 പേര്‍ക്കു രോഗബാധ സ്ഥിരീകരിച്ചു.24 രാജ്യങ്ങളിലേക്ക് വൈറസ് പടര്‍ന്നിട്ടുണ്ടെന്നാണ് റിപ്പോര്‍ട്ട്. വൈറസ് പടരുന്നതു സംബന്ധിച്ച്‌ ബെയ്ജിംഗ് നല്‍കിയ നിര്‍ദേശങ്ങള്‍ പാലിക്കാത്ത ഉദ്യോഗസ്ഥര്‍ കഠിന ശിക്ഷ നേരിടേണ്ടി വരുമെന്ന് പ്രസിഡന്റ് ഷി ചിന്‍പിംഗ് മുന്നറിയിപ്പ് നല്‍കി.ചൈനയ്ക്ക് പുറത്ത് 150 പേര്‍ക്കാണ് രോഗം സ്ഥിരീകരിച്ചത്.അതേസമയം രോഗം പടർന്നുപിടിക്കുന്ന സാഹചര്യത്തിൽ യുഎസ് സഹായം സ്വീകരിക്കാന്‍ ചൈന തയ്യാറായി.വാഷിംഗ്ടണ്‍ ലോകത്തെ ഭയപ്പെടുത്തുകയാണെന്ന് ആരോപിച്ച്‌ ഒരു ദിവസം പിന്നിട്ടപ്പോഴാണ് ചൈനയുടെ നിലപാട് മാറ്റം.അമേരിക്ക ഭയപ്പെടുത്തല്‍ നടത്തിയത് മൂലമാണ് തങ്ങളുടെ വിപണി 8% തകര്‍ന്നതെന്നാണ് ചൈന നേരത്തെ പരാതിപ്പെട്ടത്. ചൈനയില്‍ നിന്നും യാത്ര ചെയ്യുന്ന എല്ലാ സന്ദര്‍ശകര്‍ക്കും ട്രംപ് ഭരണകൂടം വിലക്ക് ഏര്‍പ്പെടുത്തിയതാണ് ചൈനയെ ചൊടിപ്പിച്ചത്. എന്നാല്‍ വൈറസ് ബാധ പടര്‍ന്നതോടെ സഹായം സ്വീകരിക്കാന്‍ തയ്യാറാണെന്ന നിലപാടിലേക്ക് അവര്‍ മാറി. ‘സഹായം നല്‍കാന്‍ തയ്യാറാണെന്ന യുഎസിന്റെ നിലപാട് അനുസരിച്ച്‌ അത് ഉടന്‍ ലഭ്യമാക്കുമെന്നാണ് പ്രതീക്ഷ’, വിദേശമന്ത്രാലയ വക്താവ് ഹവാ ചുന്‍യിംഗ് അറിയിച്ചു.