ആഗ്ര:യമുനാ എക്സ്പ്രസ് വേയില് ടോള് പ്ലാസയ്ക്ക് സമീപം കണ്ടെയ്നര് ലോറിയില് കാര് ഇടിച്ച് മുതിര്ന്ന മാധ്യമ പ്രവര്ത്തകനടക്കം അഞ്ച് പേര് വെന്തു മരിച്ചു.മാധ്യമപ്രവർത്തകനായ മുരളി മനോഹർ സരോജ്, ഭാര്യ, ഭാര്യയുടെ അമ്മ, ഭാര്യയുടെ സഹോദരി, സുഹൃത്ത് സന്ദീപ് എന്നിവരാണ് മരിച്ചത്.ചൊവ്വാഴ്ച പുലര്ച്ചെ 4.15ഓടെയായിരുന്നു അപകടം. ലഖ്നൗവ്വില് നിന്ന് ഡെല്ഹിയിലേക്ക് പുറപ്പെട്ട വാഹനമാണ് അപകടത്തില്പ്പെട്ടത്. യു ടേണ് എടുക്കുന്ന കണ്ടെയ്നര് ലോറിയിലേക്ക് കാര് ഇടിച്ചുകയറുകയായിരുന്നു. ഇടിയുടെ ആഘാതത്തില് കണ്ടെയ്നറിന്റെ ഡിസല് ടാങ്ക് തകര്ന്ന് ഇന്ധനം കാറിന്റെ ബോണറ്റിലേക്ക് വീണതായിരുന്നു പെട്ടന്നുള്ള തീ പിടുത്തത്തിന് കാരണമായതെന്നാണ് നിരീക്ഷണം.കാറിന് വെളിയില് ഇറങ്ങാനാവാതെ കത്തുന്ന വാഹനത്തില് ഉള്ളിൽ കുടുങ്ങുകയായിരുന്നു ഇവർ.ചികിത്സാ ആവശ്യത്തിനായി ഡെല്ഹിയിലേക്ക് പോവുകയായിരുന്നു സരോജും ബന്ധുക്കളും. കാറിന് വളരെ വേഗത്തില് തീപിടിച്ചത് ഇവരെ പുറത്തെത്തിക്കുന്നതിന് വെല്ലുവിളിയാവുകയായിരുന്നു. വാഹനം കൂട്ടിയിടിച്ചതിന്റെ വലിയ ശബ്ദം കേട്ട് സ്ഥലത്തേക്ക് നിരവധിപ്പേര് എത്തിയെങ്കിലും രക്ഷാപ്രവര്ത്തനം നടത്താനായില്ല.