കണ്ണൂർ:പാനൂരിൽ നാലാം ക്ലാസ് വിദ്യാര്‍ഥിനിയെ സ്കൂളിലെ ശുചിമുറിയിൽ വെച്ച് പീഡിപ്പിച്ചതായി പരാതി.സംഭവത്തിൽ പാലത്തായി യുപി സ്കൂള്‍ അധ്യാപകനും ബിജെപി തൃപ്പങ്ങോട്ടൂര്‍ പഞ്ചായത്ത് പ്രസിഡന്റും അധ്യാപക സംഘടനയായ എന്‍ടിയുവിന്റെ ജില്ലാ നേതാവുമായ കടവത്തൂര്‍ മുണ്ടത്തോടില്‍ കുറുങ്ങാട്ട് കുനിയില്‍ പത്മരാജ (പപ്പന്‍–- 45) നെതിരെ പോക്സോ നിയമപ്രകാരം പാനൂര്‍ പൊലീസ് കേസെടുത്തു.ഇയാള്‍ ഒളിവിലാണ്. വിദ്യാര്‍ഥിനിയുടെ ബന്ധുക്കളുടെ പരാതിയിലാണ് തലശേരി ഡിവൈഎസ്പി കെ വി വേണുഗോപാലിന്റെ നിര്‍ദേശത്തെ തുടര്‍ന്ന് പാനൂര്‍ സിഐ ടി പി ശ്രീജിത്ത് കേസെടുത്തത്. ചൈല്‍ഡ് ലൈന്‍ പ്രവര്‍ത്തകരും പാനൂര്‍ പൊലീസും വിദ്യാര്‍ഥിനിയുടെ മൊഴി രേഖപ്പെടുത്തി. കഴിഞ്ഞ ജനുവരി 15ന് സ്കൂളില്‍വച്ചാണ് കേസിനാസ്പദമായ സംഭവത്തിന്റെ തുടക്കം.പിന്നീട് മൂന്നു തവണ കുട്ടിയെ പീഡിപ്പിച്ചെന്നും മൊഴിയുണ്ട്. സംഭവം പുറത്തുപറഞ്ഞാല്‍ കൊന്നുകളയുമെന്നും അധ്യാപകന്‍ ഭീഷണിപ്പെടുത്തി. വിദ്യാര്‍ഥിനി സ്കൂളില്‍ പോകാന്‍ മടിക്കുന്നത് ശ്രദ്ധയില്‍പ്പെട്ട ബന്ധുക്കള്‍ ചോദിച്ചപ്പോഴാണ് സംഭവം അറിയുന്നത്.കുട്ടിയെ തലശേരി ജനറല്‍ ആശുപത്രിയില്‍ പരിശോധിച്ചപ്പോള്‍ ആന്തരികമായി പരിക്കുപറ്റിയെന്ന് കണ്ടെത്തി. മട്ടന്നൂര്‍ മജിസ്ട്രേട്ട് വിദ്യാര്‍ഥിനിയുടെ മൊഴിയെടുത്തു.പ്രതിക്കായി തെരച്ചില്‍ ഊര്‍ജിതമാക്കിയെന്നും ഉടന്‍ അറസ്റ്റുചെയ്യുമെന്നും സിഐ ടിപി ശ്രീജിത്ത് പറഞ്ഞു. അധ്യാപകനെ സസ്പെന്‍ഡു ചെയ്തതതായി സ്കൂള്‍ മാനേജ്മെന്റ് അറിയിച്ചു