കണ്ണൂർ:45 ദിവസം പ്രായമായ കുഞ്ഞിന് കാലാവധി കഴിഞ്ഞ മരുന്ന് കുത്തിവെച്ചതായി പരാതി.സംഭവത്തിൽ ആശുപത്രിക്കെതിരെ കേസെടുത്തു.മട്ടന്നൂരിലെ ആശ്രയ ആശുപത്രിക്കെതിരെയാണ് കേസ്.ഡിസംബർ പതിനെട്ടിനാണ് മട്ടന്നൂർ സ്വദേശിയായ യുവാവ് കുഞ്ഞിന് കുത്തിവയ്പ്പ് എടുക്കാൻ ആശുപത്രിയിൽ എത്തിയത്. നവംബറിൽ കാലാവധി കഴിഞ്ഞ പോളിയോ മരുന്നാണ് കുഞ്ഞിന് ആശുപത്രിയിൽ നിന്നും നൽകിയത്. കുഞ്ഞിന് ആശുപത്രിയിൽ നിന്ന് നൽകുന്ന കാർഡിലെ സ്റ്റിക്കറിലും ഇക്കാര്യം രേഖപ്പെടുത്തിയിട്ടുണ്ട്. വീട്ടില്‍ എത്തി കാര്‍ഡ് പരിശോധിച്ചപ്പോഴാണ് കാലാവധി കഴിഞ്ഞ മരുന്നാണെന്ന് വീട്ടുകാരും അറിയുന്നത്. സംഭവത്തിൽ ഡിഎംഒ ഉൾപ്പെടെയുള്ള ഉദ്യോഗസ്ഥർക്ക് ഇവർ പരാതി നൽകിയിരുന്നു. ആശുപത്രി അധികൃതരോട് ഇക്കാര്യം ചൂണ്ടിക്കാട്ടിയപ്പോൾ അവർ മോശമായാണ് സംസാരിച്ചതെന്നും, അതിന് ശേഷമാണ് പരാതി നൽകിയതെന്നും കുട്ടിയുടെ രക്ഷിതാവ് വ്യക്തമാക്കി.പരാതിയുടെ അടിസ്ഥാനത്തിൽ ഡ്രഗ് കൺട്രോൾ ഉദ്യോഗസ്ഥർ ഉൾപ്പെടെയുള്ളവർ ആശുപത്രിയിൽ പരിശോധന നടത്തിയിരുന്നു. പരിശോധനയിൽ ക്രമക്കേട് നടന്നതായി സ്ഥിരീകരിച്ചു. ഇതിന് ശേഷമാണ് പോലീസ് കേസെടുത്തത്.