തിരുവനന്തപുരം:പായ്‌ക്കറ്റിലാക്കിയ ഭക്ഷ്യവസ്തുക്കളിൽ അടങ്ങിയിരിക്കുന്ന ഉപ്പ്,പഞ്ചസാര, കൊഴുപ്പ് എന്നിവയുടെ അളവിനനുസരിച്ച് കളർകോഡ് നൽകുന്ന മുന്നറിയിപ്പ് സംവിധാനം വരുന്നു.ഉപ്പ്,പഞ്ചസാര,കൊഴുപ്പ് എന്നിവയുടെ അളവ് അനുവദിക്കപ്പെട്ടിട്ടുള്ളത്തിലും കൂടുതലാണെങ്കിൽ ചുവപ്പ്‌നിറം കൊണ്ട് സൂചന നൽകണമെന്നാണ് കേന്ദ്ര ഭക്ഷ്യസുരക്ഷാ അതോറിട്ടിയുടെ നിർദേശം.പായ്‌ക്കറ്റിന്റെ നിറം നോക്കി ഉപഭോക്താക്കൾക്ക് ഉൽപ്പന്നങ്ങളുടെ സ്വഭാവം മനസ്സിലാക്കാൻ ഈ നീക്കത്തിലൂടെ സാധിക്കും.ജൂലൈ മുതൽ പദ്ധതി നടപ്പിലാക്കാനാണ് ശ്രമം.പൈക്കറ്റിലാക്കിയ ഭക്ഷ്യവസ്തുക്കളിൽ ഉപ്പ്,പഞ്ചസാര,കൊഴുപ്പ് എന്നിവയുടെ നൂറുഗ്രാമിലെ ശരാശരി അളവ് എത്രയെന്നും അനുവദിക്കപ്പെട്ട അളവ് എത്രയെന്നും രേഖപ്പടുത്തിയിരിക്കണം.ഇവ അനുവദിക്കപ്പെട്ട അളവിലും കൂടുതലാണെങ്കിൽ പായ്ക്കറ്റിൽ ചുവന്ന അടയാളമിടണം.നൂറുഗ്രാം ഉൽപ്പന്നത്തിൽ നിന്നും ലഭിക്കുന്ന ഊർജത്തിന്റെ പത്തുശതമാനത്തിൽ കൂടുതൽ പഞ്ചസാരയിൽ നിന്നാണ് ലഭിക്കുന്നതെങ്കിൽ പായ്ക്കറ്റിൽ ചുവപ്പ് നിറത്തിൽ അടയാളമിടണം.ട്രാൻസ് ഫാറ്റിന്റെ അളവ് ഒരുശതമാനത്തിനു മുകളിലായാലും മുന്നറിപ്പ് രേഖപ്പെടുത്തിയിരിക്കണം.അതോടൊപ്പം ഭക്ഷ്യോൽപ്പന്നങ്ങളുടെ പരസ്യങ്ങളിൽ നിർമാതാക്കൾ അവകാശപ്പെടുന്ന കാര്യങ്ങൾക്കും നിയന്ത്രണം വരും.പരസ്യങ്ങളിൽ പ്രകൃതിദത്തം,ശുദ്ധം തുടങ്ങിയ വാക്കുകൾ ഉപയോഗിക്കുമ്പോൾ അതിനായി നിശ്ചയിച്ചിട്ടുള്ള മാനദണ്ഡങ്ങൾ പാലിച്ചിരിക്കണം. അല്ലാത്തപക്ഷം ഇവയ്‌ക്കെതിരെ നിയമനടപടി സ്വീകരിക്കാം.