മട്ടന്നൂർ:തില്ലങ്കേരി പഞ്ചായത്തിലെ ഉളിയിൽ ചാളപറമ്പിൽ നിന്നും വൻ ബോംബ് ശേഖരം കണ്ടെത്തി.ആളൊഴിഞ്ഞ പറമ്പിൽ നിന്നും 11 ഐസ്ക്രീം ബോളുകളും 14 ബോംബ് നിർമിക്കുന്നതിനുള്ള കണ്ടെയിനറുകളുമാണ് കണ്ടെത്തിയത്.കണ്ണൂരിൽ നിന്നും എത്തിയ ബോംബ് സ്‌ക്വാഡിന്റെ പരിശോധനയിലാണ് പടിയൂർ സ്വദേശിയുടെ ഉടമസ്ഥതയിലുള്ള തെങ്ങിൻ തോട്ടത്തിൽ നിന്നും ബോംബുകൾ കണ്ടെത്തിയത്.കാടിനുള്ളിൽ ബക്കറ്റിൽ ഒളിപ്പിച്ചുവെച്ച നിലയിലാണ് ബോബുകൾ കണ്ടെത്തിയത്.പിടികൂടിയ ബോംബുകൾ പോലീസ് സ്റ്റേഷനിലേക്ക് മാറ്റി.കഴിഞ്ഞ ദിവസം തില്ലങ്കേരി കാർക്കോട് അമ്മു അമ്മ സ്‌മൃതി മന്ദിരത്തിനു സമീപത്തു നിന്നും ആളൊഴിഞ്ഞ പറമ്പിൽ മൺപൊത്തിനകത്ത് സൂക്ഷിച്ച നിലയിൽ അഞ്ചു സ്റ്റീൽ ബോംബുകൾ കണ്ടെടുത്തിരുന്നു. ഇതേ തുടർന്ന് പോലീസ് പരിശോധന ശക്തമാക്കിയിരുന്നു.ഈ പരിശോധനയിലാണ് വീണ്ടും ബോംബുകൾ കണ്ടെടുത്തത്.