കണ്ണൂർ:ജില്ലയിൽ ഇന്നലെയുണ്ടായ രൂക്ഷമായ കടൽക്ഷോഭത്തിൽ തലശ്ശേരി മൽസ്യമാർക്കറ്റിനു സമീപത്തുള്ള തീരദേശ റോഡ് തകർന്നു.തിങ്കളാഴ്ച ഉച്ചയോടെയാണ് കടൽക്ഷോഭം രൂക്ഷമായത്. തിരണ്ടി,സ്രാവ് എന്നിവയുടെ മൊത്ത വ്യാപാരം നടക്കുന്ന മൽസ്യമാർക്കറ്റിന്‌ 20 മീറ്റർ അകലെയുള്ള തീരദേശ റോഡാണ് തകർന്നത്.ഇതോടെ നൂറുകണക്കിന് മൽസ്യത്തൊഴിലാളികൾ ആശ്രയിക്കുന്ന ചെറുകിട-മൊത്തവ്യാപാരം താറുമാറായി.കടലേറ്റം ഇന്നും തുടർന്നാൽ റോഡ് പൂർണ്ണമായും തകരുമെന്ന ആശങ്കയിലാണ് മൽസ്യത്തൊഴിലാളികൾ. റോഡ് തകർന്നതോടെ മൽസ്യം ഇറക്കാനെത്തുന്ന ലോറികൾക്ക് ഇവിടേക്ക് എത്തിച്ചേരാനാകില്ല. ഇവിടെ കരിങ്കൽ ഭിത്തി കെട്ടി റോഡ് പൂർവ്വസ്ഥിതിയിലാക്കിയാൽ മാത്രമേ മൽസ്യ വ്യാപാരം പൂർവസ്ഥിതിയിലാകൂ.അതിന് ഇനിയും മാസങ്ങളെടുക്കും.റോഡ് തകർച്ചയെ തുടർന്ന് സമീപത്തുള്ള വൈദ്യുത തൂണുകൾ ഏതു സമയവും നിലംപൊത്താറായിരിക്കുകയാണ്. അടിയന്തിരമായി കടൽഭിത്തി കെട്ടിയില്ലെങ്കിൽ തലശ്ശേരിയിലെ മത്സ്യവ്യാപാരം പൂർണ്ണമായും തകർച്ചയിലാകുമെന്ന് മൽസ്യ മൊത്തവ്യാപാരിയായ ഫൈസൽ പറഞ്ഞു. കടൽഭിത്തി കെട്ടി മത്സ്യമാർക്കറ്റ് സംരക്ഷിക്കാത്ത പക്ഷം തൊഴിലാളികൾ ഒറ്റക്കെട്ടായി പ്രക്ഷോഭവുമായി തെരുവിലിറങ്ങുമെന്നും അദ്ദേഹം പറഞ്ഞു.