കൊച്ചി: അങ്കമാലി ജോസ്‌പുരത്ത് അച്ഛന്‍ കട്ടിലിലെറിഞ്ഞ് കൊലപ്പെടുത്താന്‍ ശ്രമിച്ച രണ്ടുമാസമായ കുഞ്ഞ് രോഗം ഭേദമായി ആശുപത്രി വിട്ടു.വനിത കമ്മീഷന്‍ നിര്‍ദ്ദേശത്തെ തുടർന്ന് അമ്മേയയും കുഞ്ഞിനെയും പുല്ലുവഴിയിലെ മാതൃശിശു കേന്ദ്രത്തിലേക്കാണ് മാറ്റിയത്.ഭര്‍ത്താവിന്റെ ജോസ്‌പുരത്തെ വീട്ടിലേക്ക് പോകാനില്ലെന്ന് കുഞ്ഞിന്റെ അമ്മ പൊലീസിനെ അറിയിക്കുകയായിരുന്നു.കേസിന്റെ നടപടികള്‍ തീരുന്നത് വരെ അമ്മയും കുഞ്ഞും മാതൃശിശു കേന്ദ്രത്തില്‍ താമസിക്കും.ഭര്‍ത്താവിനോടൊപ്പം കഴിയാനാകില്ലെന്നും സ്വദേശമായ നേപ്പാളിലേക്ക് മടങ്ങണമെന്നുമാണ് കുഞ്ഞിന്റെ അമ്മ പറയുന്നത്. കഴിഞ്ഞ മാസം 18നാണ് അച്ഛന്‍ ഷൈജു കട്ടിലിലേക്ക് വലിച്ചെറിഞ്ഞതിനെ തുടര്‍ന്ന് കുഞ്ഞിന് ഗുരുതര പരിക്കേറ്റത്. ഇയാള്‍ റിമാന്‍ഡിലാണ്. കേസില്‍ ഒരുമാസത്തിനകം ചാര്‍ജ് ഷീറ്റ് നല്‍കുമെന്ന് ആങ്കമാലി സി.ഐ ബാബു അറിയിച്ചു.അച്ഛന്‍റെ മർദ്ദനത്തിൽ കുട്ടിയുടെ തലയ്ക്കാണ് ഗുരുതരമായി പരിക്കേറ്റത്. തലയോട്ടിയിലും തലച്ചോറിലും രക്തസ്രാവം ഉണ്ടായതിനെ തുടർന്ന് ശസ്ത്രക്രിയയും വേണ്ടി വന്നു. കോലഞ്ചേരി മെഡിക്കൽ കോളേജിലെ മുന്നാഴ്ചത്തെ ചികിത്സ ഫലം കണ്ടതോടെയാണ് കുട്ടി ജീവിതത്തിലേക്ക് തിരിച്ച് വന്നത്. രണ്ട് മാസം പ്രായമായ കുഞ്ഞ് പൂര്‍ണ ആരോഗ്യത്തോടെയാണ് ആശുപത്രി വിടുന്നത്. എന്നാല്‍ ഓരോ മാസവും കുട്ടിക്ക് പരിശോധന നടത്തേണ്ടതുണ്ടെന്ന് ആശുപത്രിയിലെ ഡോക്‌ടര്‍മാര്‍ അറിയിച്ചു.