തലശ്ശേരി:ഗവ.ബ്രെണ്ണൻ കോളേജിൽ സ്പോർട്സ് അതോറിറ്റി ഓഫ് ഇന്ത്യ നിർമിക്കുന്ന സിന്തെറ്റിക് സ്റ്റേഡിയത്തിന്റെ ശിലാസ്ഥാപനം മുഖ്യമന്ത്രി പിണറായി വിജയൻ നിർവഹിച്ചു.ധർമ്മടത്തെ വിവിധ കായിക സംഘടനകളിലെ അംഗങ്ങളും സ്പോർട്സ് ഡിവിഷൻ,സായ് എന്നിവിടങ്ങളിലെ വിദ്യാർത്ഥികളും കായിക വേഷത്തിലാണ് ഉൽഘാടന ചടങ്ങിനെത്തിയത്.ഉത്തര മലബാറിന്റെ കായിക പ്രതീക്ഷകൾക്ക് ഉണർവേകാൻ പോകുന്ന കായിക പരിശീലന കേന്ദ്രമാണ് സ്ഥാപിതമാകുന്നതെന്ന് മുഖ്യമന്ത്രി പറഞ്ഞു.സിന്തെറ്റിക് ട്രാക്കുകൾ ഇല്ലാത്തത് കാരണം ദേശീയ അന്തർദേശീയ മത്സരങ്ങൾക്ക് വേദിയാകുവാൻ ഉത്തരമലബാറിന്‌ കഴിഞ്ഞിട്ടില്ല.ഈ പ്രശ്‌നത്തിന് പരിഹാരമാണ് ബ്രെണ്ണനിലെ സിന്തെറ്റിക് ട്രാക്ക്.കോളേജിനെ സ്നേഹിക്കുന്നവരുടെ സന്തോഷത്തിൽ പൂർവ വിദ്യാർത്ഥി എന്ന നിലയിൽ താനും പങ്കുചേരുകയാണെന്നും മുഖ്യമന്ത്രി പറഞ്ഞു.മന്ത്രി പ്രൊ.സി.രവീന്ദ്രനാഥ് ചടങ്ങിൽ അധ്യക്ഷത വഹിച്ചു.മന്ത്രി എ.സി മൊയ്‌ദീൻ മുഖ്യപ്രഭാഷണം നടത്തി.സിന്തറ്റിക് സ്റ്റേഡിയം പൂർത്തിയാകുകയാണെങ്കിൽ 2018 ലെ സ്കൂൾ കായിക മേള ബ്രെണ്ണൻ കോളേജ് സിന്തറ്റിക് സ്റ്റേഡിയത്തിൽ നടത്തുമെന്ന് മന്ത്രി സി.രവീന്ദ്രനാഥ് പറഞ്ഞു.