കണ്ണൂർ:ഇരിക്കൂറിനടുത്ത് പെരുമണ്ണിൽ കക്കൂസ് ടാങ്ക് നിർമാണത്തിനിടെ ഗുഹ കണ്ടെത്തി. പെരുമണ്ണ നാരായണ വിലാസം എ എൽ പി സ്കൂളിന് സമീപത്തെ നാറോത്ത് റിസ്വാനയ്ക്കായി പുതുതായി നിർമിക്കുന്ന വീടിന്റെ പിൻഭാഗത്ത് കക്കൂസ് ടാങ്കിനായി കുഴിയെടുക്കുമ്പോഴാണ് ഗുഹ കണ്ടെത്തിയത്.ജെസിബി കൊണ്ട് കുഴിക്കുമ്പോൾ ഒന്നരമീറ്റർ താഴ്ചയിലെത്തിയപ്പോഴാണ് ഗുഹ ദൃശ്യമായത്.ഗുഹയുടെ കവാടത്തിനു രണ്ടുമീറ്റർ വ്യാസവും പത്തുമീറ്ററിലധികം നീളവുമുണ്ട്.റിസ്വാനയ്ക്കുവേണ്ടി നിർമ്മിക്കുന്ന വീടിന്റെ തറയുടെ അടിഭാഗത്തുകൂടി കടന്നുപോകുന്ന ഗുഹ തൊട്ടടുത്തുള്ള നാറോത്ത് നഫീസയുടെ വീടിന്റെ രണ്ട് കിടപ്പുമുറികൾക്കിടയിലൂടെയാണ് കടന്നു പോകുന്നത്.ഗുഹയ്ക്കുള്ളിൽ ഒരാൾക്ക് നില്ക്കാൻ കഴിയുന്ന ഉയരവുമുണ്ട്.ഗുഹ കണ്ടെത്തിയതോടെ ടാങ്കിന്റെ നിർമാണം നിർത്തിവെച്ചിരിക്കുകയാണ്.വിവരം അറിഞ്ഞ് നിരവധി ആളുകളാണ് ഗുഹ കാണാനായി എത്തുന്നത്.ഇരിക്കൂർ പ്രിൻസിപ്പൽ എസ്‌ഐ വിജേഷിന്റെ നേതൃത്വത്തിൽ പോലീസ് സംഘവും സ്ഥലത്തെത്തി.ജിയോളജി,പുരാവസ്തു വകുപ്പ് അധികൃതർ എന്നിവരെയും വിവരമറിയിച്ചിട്ടുണ്ട്.