കണ്ണൂർ:കണ്ണൂർ അന്താരാഷ്ട്ര വിമാനത്താവളത്തിൽ വിമാനങ്ങളുടെ ഇന്ധന നികുതി ഒരു ശതമാനമായി കുറച്ചത് ഗുണം ചെയ്യുക ആഭ്യന്തര സർവീസിന്. ചെന്നൈ,ബെംഗളൂരു, ഹൈദരാബാദ്, മുംബൈ എന്നിവിടങ്ങളിലേക്ക് സർവീസ് നടത്തുന്ന ഗോ എയറിനാണ് ഇപ്പോൾ നികുതിയളവിന്റെ ഗുണംചെയ്യുക. പുതുതായി തുടങ്ങിയ വിമാനത്താവളത്തിലേക്ക് കൂടുതൽ വിമാന സർവീസുകളെ ആകർഷിക്കാനും വിമാനത്താവളത്തിന്റെ നിലനിൽപ്പ് പരിഗണിച്ചുമാണ് താൽക്കാലികമായി നികുതിയിളവ് നൽകുന്നതെന്ന് സംസ്ഥാന സർക്കാർ വ്യക്തമാക്കി.അന്താരാഷ്ട്ര സർവീസുകൾക്ക് കേന്ദ്രസർക്കാർ തന്നെ ഇന്ധനനികുതി ഒരുശതമാനമായി നിശ്ചയിച്ചതാണ്.ഇത് രാജ്യത്തെ എല്ലാ വിമാനത്താവളങ്ങൾക്കും ബാധകമാണ്.ഉടൻ സർവീസുകൾക്കും ഇന്ധന നികുതി ഒരു ശതമാനമാണ്. ഉടൻ സർവീസ് നടത്തുന്ന വിമാനത്താവളങ്ങൾക്ക് ആ ഇനത്തിൽ വരുമാനമില്ലാത്തതിനാൽ കേന്ദ്ര സർക്കാർ ചില ഇളവുകൾ നൽകുന്നുണ്ട്.കേന്ദ്ര സർക്കാർ ഉടമസ്ഥതയിലല്ലാത്ത വിമാനത്താവളങ്ങൾക്ക് ഉടൻ സർവീസ് കനത്ത ബാധ്യതയാകുന്നതിന് ചെറിയ ആശ്വാസം നല്കുന്നതിനാണിത്. സംസ്ഥാനത്ത് കേന്ദ്രസർക്കാർ ഉടമസ്ഥതയിലല്ലാത്തതും എന്നാൽ സംസ്ഥാന സർക്കാരിനും കേന്ദ്ര പൊതുമേഖലയ്ക്കും കൂടി 65 ശതമാനം ഓഹരിയുള്ളതുമായ വിമാനത്താവളമാണ് കണ്ണൂരിലേത്.
