News

കോഴിക്കോട്: കണ്ണൂരില്‍ കൊവിഡ് 19 വൈറസ് ബാധ സ്ഥിരീകരിച്ച വ്യക്തി രാത്രി ഭക്ഷണം കഴിച്ചത് വൈദ്യരങ്ങാടി മലബാര്‍ പ്ലാസയില്‍ നിന്ന്. രാത്രി 9.30 നും 10.30 നും ഇടയിലാണ് ഇയാള്‍ ഇവിടെ നിന്ന് ഭക്ഷണം കഴിച്ചത്. ഈ സമയത്ത് ഹോട്ടലില്‍ ഉണ്ടായിരുന്നവര്‍ എത്രയും പെട്ടെന്ന് ജില്ലയിലെ കണ്‍ട്രോള്‍ റൂമിലെ 0495 2371002, 2376063, 2371451 എന്നീ നമ്പറുകളിൽ ബന്ധപ്പെടേണ്ടതാണെന്ന് ജില്ലാ കളക്ടര്‍. ഫേസ്ബുക്ക് പേജിലൂടെയാണ് കളക്ടര്‍ ഈ കാര്യം അറിയിച്ചത്. sg54 സ്‌പൈസ്‌ജെറ്റ് വിമാനത്തിലാണ് ഇയാള്‍ യാത്ര ചെയ്തത്.

കളക്ടറുടെ ഫേസ്ബുക്ക് പോസ്റ്റിന്റെ പൂര്‍ണ്ണരൂപം:

ഇന്നലെ കോവിഡ് 19 രോഗബാധ സ്ഥിരീകരിച്ച കണ്ണൂര്‍ ജില്ലയിലെ ഒരു വ്യക്തി കഴിഞ്ഞ മാര്‍ച്ച്‌ 5 ന് ദുബായില്‍ നിന്നും #SG54 # സ്‌പൈസ്‌ജെറ്റ് ഫ്‌ലൈറ്റില്‍ കോഴിക്കോട് അന്താരാഷ്ട്ര വിമാന താവളത്തിലെത്തിയ യാത്രക്കാരനാണ്. പ്രസ്തുത യാത്രക്കാരാന്‍ അന്നേ ദിവസം രാത്രി 9.30 നും 10.30 നും ഇടയില്‍ വൈദ്യരങ്ങാടി, മലബാര്‍ പ്ലാസ ഹോട്ടലില്‍ നിന്നും ഭക്ഷണം കഴിച്ചിരുന്നു. ഈ സമയത്ത് ഹോട്ടലിലുള്ളവര്‍ ആരെങ്കിലുമുണ്ടെങ്കില്‍ എത്രയും പെട്ടെന്ന് ജില്ലയിലെ കണ്‍ട്രോള്‍ റൂമിലെ 0495 2371002, 2376063, 2371451 എന്നീ നമ്ബറുകളില്‍ ബന്ധപ്പെടേണ്ടതാണ്. രാമനാട്ടുകര മുന്‍സിപ്പാലിറ്റി റാപ്പിഡ് റസ്‌പ്പോണ്‍സ് ടീമിന് (RRT ) ഇത് സംബന്ധിച്ച വിവരമുണ്ടെങ്കില്‍ ആയത് ഉടന്‍ തന്നെ ജില്ലാ തല RRTക്ക് കൈമാറേണ്ടതാണ്.

തിരുവനന്തപുരം: സംസ്ഥാനത്ത് കൊവിഡ് ജാഗ്രതയുടെ പശ്ചാത്തലത്തില്‍ നിയമസഭാ സമ്മേളനം വെട്ടിച്ചുരുക്കി.കാര്യോപദേശക സമിതിയാണ് തീരുമാനം എടുത്തത്. ഇതോടെ ഏപ്രില്‍ എട്ട് വരെ നടത്താനിരുന്ന സമ്മേളനം ഇന്ന് അവസാനിക്കും. എന്നാല്‍ സഭാനടപടികള്‍ വെട്ടിചുരുക്കുന്നതില്‍ പ്രതിപക്ഷം ഔദ്യോഗികമായി എതിര്‍പ്പ് അറിയിച്ചു. സഭാ സമ്മേളനം വെട്ടിച്ചുരുക്കുമെന്നത് അനാവശ്യ ഭീതിയുണ്ടാക്കുമെന്നാണ് പ്രതിപക്ഷ വാദം.സമ്മേളനം വെട്ടിച്ചുരുക്കാനുള്ള നടപടിയില്‍ സഭയിലും പ്രതിഷേധിക്കാനാണ് പ്രതിപക്ഷത്തിന്റെ തീരുമാനം.കാര്യോപദേശക സമിതിയില്‍ മുഖ്യമന്ത്രി നിര്‍ദ്ദേശിച്ചത് കൊവിഡ് ജാഗ്രതയില്‍ നില്‍ക്കുന്ന സമയത്ത് നിയമസഭാ സമ്മേളനവുമായി മുന്നോട്ടുപോകുന്നത് ശരിയല്ല എന്നായിരുന്നു. എന്നാല്‍ രാജ്യസഭയും ലോക്‌സഭയും തുടരുന്നുണ്ട്, വിവിധ നിയമസഭകള്‍ ചേരുന്നുണ്ട്. അതിനാല്‍ നിയമസഭാ സമ്മേളനം വെട്ടിച്ചുരുക്കേണ്ടതില്ലെന്നായിരുന്നു പ്രതിപക്ഷം നിലപാടെടുത്തത്.വിവിധ വകുപ്പുകളുടെ ധനാഭ്യര്‍ത്ഥനയില്‍ വിശദമായ ചര്‍ച്ച നടക്കേണ്ടതുണ്ട്. ഈ സര്‍ക്കാരിന്റെ അവസാനത്തേതാണ് ഇത്തരമൊരു ചര്‍ച്ച.ചര്‍ച്ചയില്‍ നിന്ന് ഒളിച്ചോടാനുള്ള സര്‍ക്കാരിന്റെ നീക്കമാണ് എന്ന ആക്ഷേപമാണ് പ്രതിപക്ഷം പ്രധാനമായും ഉന്നയിച്ചത്.ഇത് സംബന്ധിച്ച്‌ പ്രതിപക്ഷം സ്പീക്കര്‍ക്ക് ഇന്നലെ കത്ത് നല്‍കിയിരുന്നു. എന്നാല്‍ ഇത് സര്‍ക്കാര്‍ അംഗീകരിച്ചില്ല. അതേസമയം, കൊറോണ വൈറസുമായി ബന്ധപ്പെട്ട് സഭയെ തെറ്റിദ്ധരിപ്പിച്ചുവെന്ന് കാട്ടി ആരോഗ്യമന്ത്രി കെ.കെ ശൈലജയ്ക്കെതിരെ പ്രതിപക്ഷം അവകാശ ലംഘനത്തിന് നോട്ടീസ് നല്‍കി.ഇറ്റലിയില്‍ നിന്ന് വരുന്നരെ നിരീക്ഷിക്കണമെന്ന് കാട്ടി മാര്‍ച്ച്‌ മൂന്നിനാണ് കേന്ദ്രം നോട്ടീസ് നല്‍കിയതെന്നാണ് മന്ത്രി നിയമസഭയില്‍ പറഞ്ഞത്. എന്നാല്‍ ഫെബ്രുവരി 26ന് കേന്ദ്രം നിര്‍ദേശം നല്‍കിയിരുന്നെന്ന് കാട്ടിയാണ് പ്രതിപക്ഷം നോട്ടീസ് നല്‍കിയത്. പി.ടി തോമസാണ് ആരോഗ്യമന്ത്രിക്കെതിരെ അവകാശ ലംഘനത്തിന് നോട്ടീസ് നല്‍കിയത്.

കർണാടക:രാജ്യത്ത് ആദ്യകോവിഡ് 19 മരണം സ്ഥിരീകരിച്ചു. കഴിഞ്ഞദിവസം മരിച്ച കര്‍ണാടകയിലെ കല്‍ബുര്‍ഗി സ്വദേശി മുഹമ്മദ് ഹുസ്സൈൻ സിദ്ദിഖി(76)ക്കാണ് കോവിഡ് ബാധ സ്ഥിരീകരിച്ചത്.സൗദി അറേബ്യയില്‍ നിന്ന് ഉംറ കഴിഞ്ഞ് ഫെബ്രുവരി 29നാണ് ഇദ്ദേഹം തിരിച്ചെത്തിയത്.സൗദിയിൽ നിന്നും ഹൈദരാബാദ് വഴിയാണ് സിദ്ദിഖി മടങ്ങിയെത്തിയത്. അന്ന് അദ്ദേഹത്തെ വിമാനത്താവളത്തിൽ പരിശോധനയ്ക്ക് വിധേയനാക്കിയിരുന്നെങ്കിലും കൊറോണ ലക്ഷണങ്ങളൊന്നും കണ്ടെത്തിയിരുന്നില്ല.പിന്നീട് മാർച്ച് അഞ്ചാം തീയതി കൽബുർഗിയിലുള്ള സ്വകാര്യ ആശുപത്രിയിൽ ചികിത്സ തേടി.അവിടെ നിന്നാണ് കൊറോണ സ്ഥിതീകരിക്കുന്നതിനുള്ള പരിശോധന നടത്തിയത്.മൂന്നുദിവസത്തിനു ശേഷം ഹൈദരാബാദിലും ഇദ്ദേഹം ചികിത്സ തേടിയിരുന്നു.ആശുപത്രി വിട്ടശേഷമാണ് ഇദ്ദേഹം മരണപ്പെട്ടത്.വൈറസ് ബാധ സ്ഥിരീകരിച്ച സാഹചര്യത്തിൽ സിദ്ദിഖിയുമായി സമ്പർക്കത്തിൽ ഉണ്ടായിരുന്നവരെ കണ്ടെത്തുന്നതിനും ഐസൊലേറ്റ് ചെയ്യുന്നതിനുമുള്ള നടപടികൾ ആരംഭിച്ചതായി കർണാടക ആരോഗ്യവിഭാഗം കമ്മിഷണർ അറിയിച്ചു.