News

കൽപറ്റ: വിമുക്തഭടന്റെ മകന് വിദേശജോലി വാഗ്ദാനം ചെയ്ത് മൂന്നുലക്ഷം കൈക്കലാക്കി വഞ്ചിച്ച കേസിലെ മുഖ്യപ്രതി പാലക്കാട് സ്വദേശി സ്റ്റാന്‍ലി സൈമണെ (42) കൽപറ്റ പൊലീസ് അറസ്റ്റ് ചെയ്തു.വയനാട്, പാലക്കാട്, ആലപ്പുഴ,പത്തനംതിട്ട ജില്ലകളില്‍ ഇയാൾക്കെതിരെ സമാന കേസുകള്‍ നിലവിലുണ്ട്.കൽപറ്റ ഡിവൈ.എസ്.പി എം.ഡി. സുനില്‍ കുമാറിന്റെ നേതൃത്വത്തിലുള്ള സംഘം പാലക്കാട്, കോഴിക്കോട് ജില്ലകളില്‍ അന്വേഷണം നടത്തിവരവെ വയനാട് സൈബര്‍ സെല്ലിന്റെ സഹായത്തോടെ കോഴിക്കോട്ടു നിന്നാണ് പ്രതിയെ കസ്റ്റഡിയിലെടുത്തത്. കൽപറ്റ ഇന്‍സ്‌പെക്ടര്‍ പി. പ്രമോദിന്റെ നേതൃത്വത്തില്‍ എസ്.ഐ ഷറഫുദ്ദീന്‍, പൊലീസ് ഉദ്യോഗസ്ഥരായ ടി.പി. അബ്ദുറഹ്മാന്‍,കെ.കെ. വിപിന്‍, ജ്യോതിരാജ്, നൗഷാദ് എന്നിവരടങ്ങിയ നൗഷാദ് എന്നിവരടങ്ങിയ സംഘമാണ് പ്രതിയെ പിടികൂടിയത്.

തിരുവനന്തപുരം: സംസ്ഥാനത്തെ സ്‌കൂളുകൾ പൂർണസജ്ജമായി പ്രവർത്തിക്കുന്നതിന് മുന്നോടിയായി വിദ്യാഭ്യാസമന്ത്രി വി ശിവൻകുട്ടി വിളിച്ചുചേർക്കുന്ന ജില്ലാ കളക്ടർമാരുടെ യോഗം ഇന്ന് നടക്കും. ഇന്ന് വൈകീട്ട് നാല് മണിക്ക് ഓണ്‍ലൈന്‍ ആയാണ് യോഗം ചേരുക. സ്കൂള്‍ പൂര്‍ണമായും തുറക്കുന്ന സാഹചര്യത്തില്‍ അതിനായി സ്വീകരിക്കേണ്ട നടപടികളെ സംബന്ധിച്ച്‌ യോഗത്തില്‍ ചര്‍ച്ചയാകും. ജില്ലാ മെഡിക്കല്‍ ഓഫീസര്‍മാര്‍, പൊതുവിദ്യാഭ്യാസ വകുപ്പിലെ ജില്ലാതല ഓഫീസര്‍മാര്‍ തുടങ്ങിയവരും യോഗത്തിൽ പങ്കെടുക്കും. മാത്രമല്ല, സ്‌കൂളുകള്‍ ശൂചീകരിക്കുന്നതും വിദ്യാര്‍ത്ഥികളുടെ യാത്രാ സൗകര്യവും യോഗം ചര്‍ച്ച ചെയ്യും.മുഴുവൻ കുട്ടികളും സ്‌കൂളിൽ എത്തുന്നതിന് മുന്നോടിയായി ഫെബ്രുവരി 19, 20 തീയതികളിൽ സ്‌കൂൾ വൃത്തിയാക്കലും അണുനശീകരണവും നടക്കും. ഇതിനായുള്ള മുന്നൊരുക്കങ്ങളിൽ സമൂഹമാകെ അണിചേരണമെന്ന് മന്ത്രി ഇന്നലെ അഭ്യർത്ഥിച്ചിരുന്നു. ഫർണീച്ചറുകൾക്ക് ക്ഷാമമുള്ള സ്‌കൂളുകളിൽ അവ എത്തിക്കാനും സ്‌കൂൾ ബസുകൾ സജ്ജമാക്കാനും സഹായമുണ്ടാകണം. സ്‌കൂളുകൾ മുഴുവൻ സമയവും പ്രവർത്തിക്കാൻ ആരംഭിക്കുന്നതിന് മുന്നോടിയായി ഒരുക്കങ്ങൾക്ക് സഹായം തേടി മന്ത്രി വിവിധ രാഷ്‌ട്രീയ പ്രസ്ഥാനങ്ങൾക്കും, വിദ്യാർത്ഥി-യുവജന-തൊഴിലാളി സംഘടനകൾക്കും, വിദ്യാഭ്യാസ മേഖലയിലെ സംഘടനകൾക്കും, ജനപ്രതിനിധികൾക്കും കത്തയച്ചു.

കൊച്ചി:കൊവിഡ് പരിശോധന നിരക്ക് കുറച്ചതിനെതിരെ ലാബ് ഉടമകള്‍ നല്‍കിയ ഹര്‍ജി ഹൈക്കോടതി ഇന്ന് പരിഗണിക്കും.ആര്‍ ടി പി സി ആര്‍ പരിശോധന നിരക്ക് 300 രൂപയും ആന്റിജന്‍ പരിശോധന നിരക്ക് 100 രൂപയും ആക്കി കുറച്ച സര്‍ക്കാര്‍ നടപടി ചോദ്യം ചെയ്ത് ലാബ് ഉടമകള്‍ നല്‍കിയ ഹര്‍ജി ആണ് ഹൈക്കോടതി ഇന്ന് പരിഗണിക്കുക.സര്‍ക്കാര്‍ തീരുമാനം ഏകപക്ഷീയമെന്ന് ലാബ് ഉടമകളുടെ സംഘടന പ്രതികരിച്ചു.നിരക്ക് കുറക്കാന്‍ സര്‍ക്കാരിന് അധികാരമുണ്ടെന്നായിരുന്നു അഡ്വക്കറ്റ് ജനറല്‍ ഹൈക്കോടതി അറിയിച്ചത്.വിവിധ പരിശോധനകള്‍ക്ക് ലാബുകള്‍ അമിത ചാര്‍ജ് ഈടാക്കുന്നു എന്ന് കണ്ടെത്തിയാണ് സര്‍ക്കാര്‍ നടപടി. നിരക്ക് വര്‍ധന സംബന്ധിച്ച്‌ ഹൈക്കോടതിയില്‍ നിലനില്‍ക്കുന്ന മറ്റ് കേസുകളുടെ ഒപ്പമാണ് ലാബ് ഉടമകളുടെ ഹര്‍ജി പരിഗണിക്കുക.കൊവിഡ് പരിശോധന നിരക്കുകള്‍ കൂട്ടിയില്ലെങ്കില്‍ അത്തരം പരിശോധന നടത്തുന്ന ലാബുകളിലെ മോളിക്യുലാര്‍ വിഭാഗം അടച്ചിടാനാണ് ലാബുടമകളുടെ നീക്കം.