News

കണ്ണൂർ:ജില്ലയിൽ  സമൂഹവ്യാപന സാധ്യത കണക്കിലെടുത്ത് മൂന്ന് കോവിഡ് ആശുപത്രികള്‍ കൂടി സജ്ജമാക്കുന്നു.പരിയാരം ഗവ. ആയുര്‍വേദ കോളജ് ആശുപത്രി,തളിപ്പറമ്പ് കരിമ്പത്തെ പഴയ സഹകരണ ആശുപത്രി കെട്ടിടം, പാലയാട് ഡയറ്റ് ഹോസ്റ്റല്‍ എന്നിവയാണ് ദുരന്തനിവാരണ നിയമപ്രകാരം അടിയന്തരമായി ഏറ്റെടുത്ത് ആശുപത്രികളാക്കുക. ആവശ്യമായ സജ്ജീകരണങ്ങള്‍ യുദ്ധകാലാടിസ്ഥാനത്തില്‍ പൂര്‍ത്തിയാക്കാന്‍ ജില്ലാ ദുരന്തനിവാരണ അതോറിറ്റി ചെയര്‍മാന്‍കൂടിയായ കലക്ടര്‍ ടി വി സുഭാഷ് ഉദ്യോഗസ്ഥര്‍ക്കു നിര്‍ദേശം നല്‍കി.160 ബെഡുകളാണ് പരിയാരം ഗവ. ആയുര്‍വേദ കോളജില്‍ ഉള്ളത്.ഇവിടെ ചികിത്സയില്‍ കഴിയുന്ന രോഗികളെ ഉടന്‍ ഡിസ്ചാര്‍ജ് ചെയ്യാന്‍ നിര്‍ദേശം ലഭിച്ചതായി മെഡിക്കല്‍ സൂപ്രണ്ട് ഡോ. കെ എന്‍ അജിത്കുമാര്‍ പറഞ്ഞു. ആരോഗ്യവകുപ്പ് അധികൃതർ ഈ ആവശ്യത്തിനായി കഴിഞ്ഞ ദിവസം മെഡിക്കല്‍ കോളജ് സന്ദര്‍ശിച്ചിരുന്നു.കരിമ്പത്തെ പഴയ സഹകരണ ആശുപത്രി കെട്ടിടം എയ്റോസിസ് കോളേജായി പ്രവർത്തിച്ചു വരികയായിരുന്നു. ഇവിടെ നൂറിലേറെ ബെഡുകള്‍ സജ്ജീകരിക്കും.പാലയാട് ഡയറ്റ് ഹോസ്റ്റല്‍ തലശേരി മേഖലയിലെ പ്രത്യേക കോവിഡ് ചികിത്സാ കേന്ദ്രമാക്കി മാറ്റും. ആവശ്യമായ സൗകര്യങ്ങള്‍ ഒരുക്കുന്നതിനുള്ള ഫണ്ട് ദേശീയ ആരോഗ്യദൗത്യത്തില്‍ (എന്‍എച്ച്‌എം) നിന്ന് ഉപയോഗപ്പെടുത്തും. ഇതിനായി ഡിപിഎമ്മിനെ ചുമതലപ്പെടുത്തി.പരിയാരത്തെ കണ്ണൂര്‍ ഗവ. മെഡിക്കല്‍ കോളജ്, കണ്ണൂര്‍ ജില്ലാ ആശുപത്രി, തലശേരി ജനറല്‍ ആശുപത്രി, അഞ്ചരക്കണ്ടി കോവിഡ് ആശുപത്രി എന്നിവിടങ്ങളിലാണ് നിലവിൽ ജില്ലയില്‍ കോവിഡ് രോഗികളെ ചികിത്സിക്കുന്നത്.

കണ്ണൂർ:സമ്പർക്കത്തിലൂടെ കോവിഡ് രോഗികൾ വർദ്ധിച്ചുവരുന്ന സാഹചര്യത്തിൽ കണ്ണൂർ നഗരത്തിൽ പോലീസ് നിയന്ത്രണം കർശനമാക്കി.ജനങ്ങളുടെ സുരക്ഷക്കായാണ് പൊലീസ് നഗരത്തില്‍ കടുത്ത നിയന്ത്രണവും ജാഗ്രതയും ഏര്‍പ്പെടുത്തിയതെന്നാണ് ജില്ല ഭരണകൂടം വ്യക്തമാക്കുന്നത്. സാമൂഹിക വ്യാപനം തടയാന്‍ ലക്ഷ്യമിട്ടാണ് നഗരം അടച്ചിട്ടതെന്ന് ജില്ല പൊലീസ് മേധാവി യതീഷ് ചന്ദ്രയും വ്യക്തമാക്കി. കണ്ണൂര്‍ കോര്‍പറേഷനിലെ കണ്ണൂര്‍ നഗരത്തില്‍നിന്നും തലശ്ശേരി റോഡില്‍ താണ വരെയും തളിപ്പറമ്പ് റോഡില്‍ പള്ളിക്കുന്നുവരെയും ചാലാട് ഭാഗത്തേക്ക് കുഴിക്കുന്നുവരെയും കക്കാട് ഭാഗത്തേക്ക് കോര്‍ജാന്‍ സ്‌കൂള്‍ വരെയും തായത്തെരു ഭാഗത്ത് റെയില്‍വേ അണ്ടര്‍ പാസ് വരെയുമുള്ള പ്രദേശങ്ങള്‍ ഉൾക്കൊള്ളുന്ന ഭാഗമാണ് ജില്ല കലക്ടര്‍ കണ്ടെയ്‌ൻമെൻറ് സോണായി പ്രഖ്യാപിച്ചത്.ഇതിെൻറ ഭാഗമായി കോര്‍പറേഷനിലെ 11 ഡിവിഷനുകളില്‍ കര്‍ശന നിയന്ത്രണങ്ങളാണ് വരുത്തിയിട്ടുള്ളത്. ഒരറിയിപ്പ് ഉണ്ടാകുന്നതുവരെ നിയന്ത്രണം തുടരുമെന്നും എന്നാല്‍ ദേശീയപാതയില്‍ ഗതാഗത തടസ്സം ഉണ്ടാകില്ലെന്നും ജില്ല പൊലീസ് മേധാവി പറഞ്ഞു.വ്യാപാര സ്ഥാപനങ്ങള്‍ അടച്ചിടുന്നതുമായി ബന്ധപ്പെട്ട് കണ്ടെയ്ൻമെൻറ് മേഖലയിലെ വ്യാപാരി പ്രതിനിധികളുമായി ജില്ല പൊലീസ് മേധാവി ആശയ വിനിമയം നടത്തി.കണ്ണൂരിലെ സ്ഥിതിഗതികള്‍ സങ്കീര്‍ണമാണെന്നാണ് മന്ത്രി ഇ.പി. ജയരാജനും വെള്ളിയാഴ്ച പ്രതികരിച്ചത്.വ്യാഴാഴ്ച കോവിഡ് ബാധിച്ച് മരിച്ച മട്ടന്നൂര്‍ എക്‌സൈസ് ഡ്രൈവര്‍ കെ. സുനില്‍ കുമാര്‍, കണ്ണൂരില്‍ കോവിഡ് പോസിറ്റിവ് സ്ഥിരീകരിച്ച 14 കാരന്‍ എന്നിവര്‍ക്ക് രോഗം ബാധിച്ചതിന്റെ ഉറവിടം കണ്ടെത്താന്‍ ഇതുവരെ കഴിഞ്ഞിട്ടില്ല.കണ്ണൂരിനു പുറമെ മട്ടന്നൂര്‍ നഗരസഭയും ഈമാസം 30വരെ അടച്ചിടാന്‍ തീരുമാനിച്ചിട്ടുണ്ട്. കണ്ണൂര്‍ നഗരവുമായി ബന്ധപ്പെട്ട  20 റോഡുകളാണ് അടച്ചത്. ദീര്‍ഘദൂര ബസുകളെ മാത്രമേ പുതിയ ബസ്‌സ്റ്റാന്‍ഡിലേക്കും പഴയ ബസ്‌സ്റ്റാന്‍ഡിലേക്കും പോകാന്‍ അനുവദിക്കുന്നുള്ളു. മറ്റ് വാഹനങ്ങളെ അത്യാവശ്യമാണെന്ന് ബോധ്യപ്പെട്ടാല്‍ മാത്രമേ നഗരത്തില്‍ പ്രവേശിക്കാന്‍ അനുവദിക്കുന്നുള്ളൂ.

തിരുവനന്തപുരം:പ്രവാസികള്‍ക്ക് കോവിഡ് നെഗറ്റീവ് സര്‍ട്ടിഫിക്കറ്റ് നിര്‍ബന്ധമാക്കുമെന്ന നിബന്ധനയിൽ ഇളവ് നൽകി സംസ്ഥാനസർക്കാർ.ഈ മാസം 24 വരെ ഗള്‍ഫില്‍നിന്ന് എത്തുന്നവര്‍ക്ക് കോവിഡ് നെഗറ്റീവ് സര്‍ട്ടിഫിക്കറ്റ് ആവശ്യമില്ല.എന്നാല്‍ 25 മുതല്‍ കേരളത്തിലേക്ക് എത്തുന്ന പ്രവാസികള്‍ക്ക് സര്‍ട്ടിഫിക്കറ്റ് സര്‍ക്കാര്‍ നിര്‍ബന്ധമാക്കി.നേരത്തെ ശനിയാഴ്ച മുതല്‍ സര്‍ട്ടിഫിക്കറ്റ് നിര്‍ബന്ധമാക്കാനായിരുന്നു സര്‍ക്കാരിന്റെ തീരുമാനം. നേരത്തെ പ്രവാസികളുടെ കോവിഡ് ടെസ്റ്റില്‍ തീരുമാനമെടുക്കാൻ അ‌ധികാരമുണ്ടെന്ന് സർക്കാർ ഹൈക്കോടതിയിൽ അറിയിച്ചിരുന്നു. രോഗവ്യാപനം തടയാനാണ് തീരുമാനമെന്ന് സർക്കാർ സത്യവാങ്മൂലത്തിൽ ചൂണ്ടിക്കാണിക്കുന്നു. രോഗമുള്ളവരും രോഗമില്ലാത്തവരും ഒന്നിച്ച് വിമാനത്തിൽ സഞ്ചരിക്കുന്നത് രോഗത്തിന്റെ വ്യാപ്തി കൂടാൻ കാരണമാകുന്നു. അ‌തിനാലാണ് ടെസ്റ്റ് നിർബന്ധമാക്കുന്നത്. എന്നാൽ, ആർടിപിസിആർ ടെസ്റ്റ് നടത്തണമെന്ന് നിർബന്ധമില്ലെന്നും റാപ്പിഡ് ടെസ്റ്റെങ്കിലും നടത്തിയാൽ മതിയെന്നും സത്യവാങ്മൂലത്തിൽ പറയുന്നു.പുറത്തുനിന്ന് വരുന്നവരിലെ രോഗവ്യാപനത്തിന്റെ കണക്ക് ഉൾപ്പെടെയാണ് സർക്കാർ സത്യവാങ്മൂലം നൽകിയിരിക്കുന്നത്.കേരളത്തിലേക്ക് ചാര്‍ട്ടേര്‍ഡ് വിമാനത്തില്‍ വരുന്നവര്‍ക്ക് കോവിഡ് നെഗറ്റീവ് സര്‍ട്ടിഫിക്കറ്റ് നിര്‍ബന്ധമാക്കിയത് ചോദ്യം ചെയ്തുള്ള ഹര്‍ജിയില്‍ ഇടപെടാന്‍ സുപ്രീം കോടതി വിസമ്മതിച്ചിരുന്നു. സംസ്ഥാന സര്‍ക്കാരിന്റെ നയത്തില്‍ തങ്ങള്‍ ഇടപെടുന്നില്ലെന്ന് ജസ്റ്റിസ് അശോക് ഭൂഷന്റെ അധ്യക്ഷതയിലുള്ള ബെഞ്ച് വ്യക്തമാക്കി.ചാര്‍ട്ടേര്‍ഡ് വിമാനത്തില്‍ വരുന്നവര്‍ക്ക് മാത്രം കോവിഡ് നെഗറ്റീവ് സര്‍ട്ടിഫിക്കറ്റ് നിര്‍ബന്ധമാക്കുന്നത് രണ്ടു തരം പൗരന്മാരെ സൃഷ്ടിക്കുന്നതിന് തുല്യമാണെന്ന് ഹര്‍ജിക്കാരനായ കെ.എസ്.ആര്‍. മേനോന്റെ അഭിഭാഷകന്‍ കോടതിയില്‍ ചൂണ്ടിക്കാട്ടി. ഇക്കാര്യം ചൂണ്ടിക്കാട്ടി ഹര്‍ജിക്കാരന് കേന്ദ്ര വിദേശകാര്യ മന്ത്രാലയത്തിനെയും സംസ്ഥാന സര്‍ക്കാരിനെയും സമീപിക്കാവുന്നതാണെന്ന് സുപ്രീം കോടതി ചൂണ്ടിക്കാട്ടി.

കണ്ണൂർ:കഴിഞ്ഞ ദിവസം കോവിഡ് ബാധിച്ച്‌ മരിച്ച ബ്ലാത്തൂര്‍ സ്വദേശിയായ എക്സൈസ് ഡ്രൈവര്‍ സുനില്‍ കുമാറിെന്‍റ സമ്പർക്കപ്പട്ടിക അതിസങ്കീര്‍ണം.ഇദ്ദേഹവുമായി അടുത്തിടപഴകിയ നൂറോളം പേരുടെ പ്രാഥമിക സമ്പർക്കപ്പട്ടിക  ആരോഗ്യ വകുപ്പ് തയാറാക്കിയിട്ടുണ്ട്. എന്നാല്‍ എണ്ണം വര്‍ധിക്കാനാണ് സാധ്യതയെന്ന് ഡി.എം.ഒ ഡോ. നാരായണ നായ്ക് പറഞ്ഞു. മട്ടന്നൂര്‍ എക്സൈസ് റേഞ്ച് ഓഫിസിലെ സഹപ്രവര്‍ത്തകരായ 18 പേര്‍, ബ്ലാത്തൂരിലെ കുടുംബത്തിലെ 10 പേര്‍, ഇദ്ദേഹവുമായി അടുത്തിടപഴകിയ ബന്ധുക്കളും സുഹൃത്തുക്കളും നാട്ടുകാരുമായ 69 പേര്‍ എന്നിങ്ങനെയാണ് പ്രാഥമിക പട്ടികയിൽ ഉൾപ്പെട്ടിരിക്കുന്നത്.ബ്ലാത്തൂർ മേഖലയിൽ കൂടുതൽ പേർ നിരീക്ഷണത്തിലായേക്കുമെന്നാണ് കരുതുന്നത്. സുനിൽ കുമാർ ഒരാഴ്ച മുൻപ് നാട്ടുകാരോടൊപ്പം ഫുട്ബോൾ കളിച്ചിരുന്നു.നാട്ടിൽ നടന്ന ഒരു കല്യാണത്തിൽ പങ്കെടുത്തതായും വിവരമുണ്ട്.ഇദ്ദേഹത്തിന്റെ പ്രൈമറി, സെക്കണ്ടറി സമ്പർക്കപ്പട്ടികയിൽ ഏകദേശം 500 ഓളം പേർ ഉൾപ്പെടുമെന്നാണ്  പടിയൂർ പഞ്ചായത്തിന്റെ കണ്ടെത്തൽ.കഴിഞ്ഞ ഞായറാഴ്ച സുനിൽ കുമാർ ചികിത്സ തേടിയ ഇരിക്കൂറിലെ ആശുപത്രി ജീവനക്കാരും അദ്ദേഹം ഇടപഴകിയ കടകളിലുള്ളവരും നിരീക്ഷണത്തിലാണ്.തൊഴിലുറപ്പ് തൊഴിലാളിയായ ഇദ്ദേഹത്തിന്റെ അമ്മയും കൂലിത്തൊഴിലാളിയായ സഹോദരനും ഒരുപാടുപേരുമായി ബന്ധപ്പെട്ടിട്ടുണ്ട്.ഇവരുടെയെല്ലാം വിവരങ്ങൾ ശേഖരിച്ച് ആവശ്യമായവരുടെയെല്ലാം സാമ്പിളുകൾ ആരോഗ്യവകുപ്പ് പരിശോധനയ്ക്കായി എടുക്കും.മട്ടന്നൂർ എക്‌സൈസ് റേഞ്ച് ഓഫീസിലെ സഹപ്രവർത്തകരായ 18  പേരുടെ സാമ്പിൾ പരിശോധന വ്യാഴാഴ്ച പൂർത്തിയായി.