ബെംഗളൂരു: കര്‍ണാടകയില്‍ കോണ്‍ഗ്രസ് എംഎല്‍എ അഖണ്ഡ ശ്രീനിവാസ മൂര്‍ത്തിയുടെ ബന്ധു ഫേസ്ബുക്കിലൂടെ വിദ്വേഷം പരത്തുന്ന പോസ്റ്റിട്ട സംഭവത്തില്‍ ബംഗളൂരുവില്‍ വന്‍ പ്രതിഷേധം. സംഘര്‍ഷത്തെ തുടര്‍ന്ന് പ്രതിഷേധക്കാര്‍ എംഎല്‍എയുടെ വീട് ആക്രമിച്ചു. നിരവധി വാഹനങ്ങൾ നശിപ്പിച്ചു. ആക്രമികള്‍ക്ക് എതിരെ പോലീസ് നടത്തിയ വെടിവെയ്പില്‍ രണ്ട് പേര്‍ മരിച്ചു. മൂന്ന് പേര്‍ക്ക് പരിക്ക് പറ്റുകയും ചെയ്തു. നിരവധി പോലീസുകാര്‍ക്കും പരിക്ക് പറ്റി.എംഎല്‍എ അഖണ്ഡേ ശ്രീനിവാസ മൂര്‍ത്തിയുടെ ബന്ധുവാണ് വിദ്വേഷം പടര്‍ത്തുന്ന ഫെയ്‌സ്ബുക്ക് പോസ്റ്റിട്ടതെന്നാണ് എംഎല്‍എയുടെ അടുത്ത വൃത്തങ്ങള്‍ പറയുന്നത്. സംഭവത്തെ തുടര്‍ന്ന് ശ്രീനിവാസ മൂര്‍ത്തിയുടെ വീടിനുമുന്നില്‍ ആളുകള്‍ തടിച്ചു കൂടുകയും കല്ലേറ് നടത്തുകയും ചെയ്തിരുന്നു. എംഎല്‍എയുടെ ബന്ധുവായ യുവാവിനേയും പോലീസ് കസ്റ്റഡിയിലെടുത്തിട്ടുണ്ട്. അക്രമ ഈ സംഭവങ്ങളുടെ പശ്ചാത്തലത്തില്‍ ബെംഗളൂരു നഗര പരിധിയില്‍ നിരോധനാജ്ഞ പ്രഖ്യാപിച്ചു.110 പേരെ ഇതിനകം അറസ്റ്റ് ചെയ്തു. ജനങ്ങള്‍ നിയമം കയ്യിലെടുക്കരുതെന്ന് എംഎല്‍എ അഖണ്ഡ ശ്രീനിവാസ മൂർത്തി അഭ്യര്‍ഥിച്ചു.
