News

കണ്ണൂര്‍: ഹിമാചല്‍ പ്രദേശില്‍ പതിനായിരം അടി ഉയരത്തില്‍ ലോകത്തിലെ ഏറ്റവും നീളം കൂടിയ അടല്‍ ടണല്‍ നി‌ര്‍മ്മാണം അവസാന ഘട്ടത്തിലേക്ക് കടക്കുമ്പോൾ മലയാളികൾക്കും ഇത് അഭിമാന നിമിഷം.കണ്ണൂർ മുണ്ടേരി പഞ്ചായത്ത് മുന്‍ വൈസ് പ്രസിഡന്റായ കേളമ്പേത്ത് കണ്ണന്റെയും കുന്നിപ്പറമ്പിൽ യശോദയുടെയും മകനായ കെ.പി. പുരുഷോത്തമന്‍ ചീഫ് എന്‍ജിനീയറായ ബോര്‍ഡര്‍ റോഡ് ഓര്‍ഗനൈസേഷനാണ് ലോകത്തിലെ തന്നെ ഏറ്റവും വലിയ എന്‍ജിനീയറിംഗ് വിസ്മയത്തിന് ചുക്കാന്‍ പിടിക്കുന്നത്.ഒക്ടോബര്‍ ആദ്യ വാരം ഗതാഗതത്തിന് തുറന്നു കൊടുക്കുന്ന ടണല്‍ പുരുഷോത്തമന്റെ ജീവിതത്തിലെ വെല്ലുവിളികള്‍ നിറഞ്ഞ സംരംഭമായിരുന്നു. പുരുഷോത്തമന്റെ നേതൃത്വത്തിലുള്ള 750 സാങ്കേതിക വിദഗ്ധരും മൂവായിരത്തോളം തൊഴിലാളികളും ചേര്‍ന്ന് പത്ത് വര്‍ഷം കൊണ്ടാണ് ഇതു പൂര്‍ത്തിയാക്കിയത്. മണാലിയിലെ ലേയുമായി ബന്ധിപ്പിക്കുന്ന അടല്‍ ടണല്‍ രാജ്യത്തിന്റെ പ്രതിരോധ, വിനോദ സഞ്ചാരമേഖലയില്‍ നിര്‍ണായക സ്ഥാനം നേടാന്‍ പോകുകയാണ്.1987 ലാണ് പുരുഷോത്തമന്‍ ബോര്‍ഡര്‍ റോഡ് ഓര്‍ഗനൈസേഷനില്‍ എന്‍ജിനീയറായി ജോലിയില്‍ പ്രവേശിക്കുന്നത്. പ്രതികൂല കാലാവസ്ഥയോടും മറ്റും പൊരുതിയാണ് ഈ രംഗത്ത് നിരവധി പദ്ധതികള്‍ പുരുഷോത്തമന്‍ പൂര്‍ത്തിയാക്കിയത്. മൂന്നു വര്‍ഷം ഈ പ്രോജക്ടിനൊപ്പം തന്നെയായിരുന്നു പുരുഷോത്തമന്‍. അരുണാചലിലെ ചേലാ ടണല്‍, സിക്കിമിലെ ടണല്‍ എന്നിവ അവയില്‍ ചിലത് മാത്രമാണ്.അടല്‍ ടണല്‍ പൂർത്തിയാകുമ്പോൾ മണാലിയില്‍ നിന്ന് ലേയിലേക്കുള്ള യാത്രയില്‍ 46 കിലോ മീറ്ററും നാല് മണിക്കൂറും ലാഭിക്കാന്‍ കഴിയും. മഞ്ഞുകാലത്ത് ആറു മാസത്തോളം അടഞ്ഞ് കിടക്കുന്ന റോഹ് താംഗ് ചുരം ഒഴിവാക്കി യാത്ര ചെയ്യാനും കഴിയും. മാനം മുട്ടെ ഉയര്‍ന്നു നില്‍ക്കുന്ന പര്‍വ്വതത്തെ തുരന്ന് ടണല്‍ നിര്‍മ്മിക്കുകയെന്നത് പുരുഷോത്തമനും സഹപ്രവര്‍ത്തകരും വെല്ലുവിളിയായി ഏറ്റെടുത്തപ്പോള്‍ ചരിത്ര വിസ്മയം അഭിമാനമായി മാറുകയായിരുന്നു.രാജ്യത്തെ ഏറ്റവും നീളമുള്ള പര്‍വത തുരങ്കപാത ന്യൂ ഓസ്ട്രിയന്‍ ടണലിംഗ് നിര്‍മ്മാണ രീതിയിലാണ് പൂര്‍ത്തിയാക്കിയത്.രക്ഷാമാര്‍ഗമായ എസ്കേപ് ടണല്‍ തുരങ്കത്തിന്റെ അടിയിലൂടെയാണ്. അവിടേക്ക് അഞ്ഞൂറു മീറ്റര്‍ ഇടവിട്ട് എമര്‍ജന്‍സി കവാടകങ്ങളുണ്ട്. അപകടമുണ്ടായാല്‍ വാതിലുകളും വെന്റലേഷനുകളും ഓട്ടോമാറ്റിക്കായി തുറക്കും.കണ്ണൂര്‍ പോളിടെക്നിലെ പഠനത്തിനു ശേഷം ഡല്‍ഹിയില്‍ നിന്നും കണ്‍സ്ട്രക്ഷന്‍ മാനേജ്മെന്റില്‍ ഡിപ്ളോമ നേടി. മികച്ച പ്രവര്‍ത്തനത്തിന് വിശിഷ്ട സേവാ മെഡലും മറ്റും നേടിയിരുന്നു.1987ലാണ് ബോര്‍ഡര്‍ റോഡ്സ് ഓര്‍ഗനൈസേഷനില്‍ ചേര്‍ന്നത്. അസി എക്സിക്യൂട്ടീവ് എന്‍ജിനിയറായി ആന്‍ഡമാന്‍ നിക്കോബാര്‍ ദ്വീപിലായിരുന്നു ആദ്യ നിയമനം. നാഗാലാന്‍ഡ്, രാജസ്ഥാന്‍, മിസോറാം, ജമ്മു കാശ്‌മീര്‍, ഉത്തരാഖണ്ഡ് എന്നിവിടങ്ങളിലും സേവനം അനുഷ്ഠിച്ചു.ഏതാനും വര്‍ഷം മുൻപ് കേരളത്തിലെ റോഡുകളുടെ ഗുണനിലവാരം പരിശോധിക്കാനുള്ള കമ്മിറ്റിയുടെ മേല്‍നോട്ടവും പുരുഷോത്തമനായിരുന്നു. തലശേരി ഇല്ലത്ത്താഴെ സ്വദേശി സിന്ധുവാണ് ഭാര്യ. ഡോ. വരുണ്‍, അമേരിക്കയില്‍ എന്‍ജിനീയറായ യുവിഗ എന്നിവര്‍ മക്കളാണ്.

തിരുവനന്തപുരം:സംസ്ഥാനത്ത് ഇന്നും അതിതീവ്രമഴക്ക് സാധ്യതയെന്ന് കേന്ദ്രകാലാവസ്ഥാ നിരീക്ഷണ കേന്ദ്രം. ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദമാണ് മഴക്ക് കാരണം. മഴക്കൊപ്പം ശക്തമായ കാറ്റിനും സാധ്യതയുണ്ട്. മഴ കനക്കുന്ന പശ്ചാത്തലത്തില്‍ സംസ്ഥാനത്ത് 10 ജില്ലകളില്‍ ഇന്ന് ഓറഞ്ച് അലര്‍ട്ട് പ്രഖ്യാപിച്ചു.ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദത്തിന്റെ സ്വാധീനത്താല്‍ സംസ്ഥാനത്ത് ഇന്നും വ്യാപകമഴക്കാണ് സാധ്യത. വടക്കന്‍കേരളത്തിലും മദ്ധ്യകേരളത്തിലും ഇന്ന് അതിതീവ്രമഴ ലഭിക്കും. കോട്ടയം മുതല്‍ കാസര്‍കോഡ് വരെയുള്ള ജില്ലകളില്‍ അതിശക്തമായ മഴ ലഭിക്കുമെന്നാണ് കേന്ദ്ര കാലാവസ്ഥാ നിരീക്ഷണകേന്ദ്രത്തിന്റെ മുന്നറിയിപ്പ്. കൊല്ലം, പത്തനംതിട്ട, ആലപ്പുഴ ജില്ലകളില്‍ യെല്ലോ അലര്‍ട്ടാണ്.നാളെ വരെ സംസ്ഥാനത്ത് ശക്തമായ മഴ തുടരുമെന്നാണ് പ്രവചനം. രാത്രി കാലങ്ങളിൽ മഴ ശക്തമാകുമെന്നതിനാല്‍ ഉരുള്‍പൊട്ടല്‍, മണ്ണിടിച്ചില്‍ സാധ്യതയുള്ള പ്രദേശങ്ങളില്‍ താമസിക്കുന്നവര്‍ മുന്‍കരുതലെടുക്കണം. മലയോര പ്രദേശങ്ങളില്‍ വൈകുന്നേരം ഏഴ് മുതല്‍ രാവിലെ ഏഴ് വരെ ഗതാഗതം നിരോധിച്ചു. ഉയര്‍ന്ന തിരമാലക്ക് സാധ്യതയുള്ളതിനാല്‍ തീരദേശവാസികള്‍ ജാഗ്രത പാലിക്കണമെന്നും മീന്‍പിടുത്തത്തൊഴിലാളികള്‍ കടലില്‍ പോകരുതെന്നും നിര്‍ദ്ദേശമുണ്ട്.അടിയന്തിര സാഹചര്യങ്ങള്‍ നേരിടാന്‍ ദുരന്ത നിവാരണ അതോറിറ്റിയുടെ അഞ്ച് സംഘങ്ങള്‍ സംസ്ഥാനത്തെത്തിയിട്ടുണ്ട്.