News

കൊച്ചി: കരിപ്പൂര്‍ സ്വര്‍ണക്കടത്തില്‍ അറസ്റ്റിലായ മുഖ്യപ്രതി അര്‍ജുന്‍ ആയങ്കിയുടെ ഭാര്യ അമലയെ ചോദ്യം ചെയ്യാനൊരുങ്ങി കസ്റ്റംസ്.കേസുമായി ബന്ധപ്പെട്ട കാര്യങ്ങള്‍ ചോദിച്ചറിയുവാന്‍ ചൊവ്വാഴ്ച കൊച്ചിയിലെ ഓഫീസില്‍ ഹാജരാകാനാണു അമലയ്ക്ക് നല്‍കിയിരിക്കുന്ന നിര്‍ദേശം.കൊല്ലം സ്വദേശിനിയാണ് എല്‍.എല്‍.ബി ബിരുദ വിദ്യാര്‍ത്ഥിനിയായ അമല. അഴീക്കല്‍ കപ്പക്കടവില്‍ അര്‍ജുന്‍ പുതുതായി എടുത്ത വീട്ടിലാണ് ഇവര്‍ താമസിച്ചു വരുന്നത്. നീണ്ട നാളത്തെ പ്രണയത്തിനൊടുവിൽ കഴിഞ്ഞ ഏപ്രില്‍ എട്ടിനാണ് ഇവര്‍ തമ്മില്‍  വിവാഹിതരായത്. ഈ വിവാഹത്തിന് ആകാശ് തില്ലങ്കേരി ഉള്‍പ്പെടെയുള്ളവര്‍ പങ്കെടുത്തിരുന്നു. അര്‍ജുന് വരവില്‍ കവിഞ്ഞ് ചിലവുണ്ടായിരുന്നെന്നും വരുമാനമില്ലാതിരുന്നിട്ടും ആര്‍ഭാടജീവിതമായിരുന്നു നയിച്ചതെന്നും റിപ്പോര്‍ട്ടുകളുണ്ടായിരുന്നു. പുതിയ വീട് ഭാര്യയുടെ അമ്മ സമ്മാനം നല്കിയതാണെന്നായിരുന്നു അര്‍ജുന്‍ മൊഴി നല്‍കിയത്. ഇതും കസ്റ്റംസ് അന്വേഷിക്കും.

വയനാട്:നിരവധി ആളുകൾക്ക് വ്യാജ ആർടിപിസിആർ സർട്ടിഫിക്കേറ്റ് നിർമ്മിച്ചു നൽകിയ ഇന്റർനെറ്റ് കഫേ ഉടമ പോലീസ് പിടിയിൽ. മാനന്തവാടി വ്യൂ ടവറിൽ പ്രവർത്തിക്കുന്ന ഡോട്ട് കോം ഇന്റർനെറ്റ് കഫേ ഉടമ അഞ്ചുകുന്ന് കണക്കശ്ശേരി റിയാസ് (33) ആണ് പിടിയിലായത്. ഒരു വ്യാജ സർട്ടിഫിക്കേറ്റ് നിർമ്മിച്ചു നൽകുന്നതിന് 200 രൂപയാണ് ഇയാൾ ഇടാക്കിയിരുന്നത്. ഇത്തരത്തിൽ ഒട്ടേറെ പേർക്ക് കള്ള സർട്ടിഫിക്കറ്റ് നിർമ്മിച്ച് നൽകിയതായി ഇയാൾ വെളിപ്പെടുത്തി. ജില്ലാ പോലീസ് മേധാവിയ്ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് പ്രതി പിടിയിലായത്. ബാർകോഡ് ഉൾപ്പെടെ രേഖപ്പെടുത്തിയായിരുന്നു സർട്ടിഫിക്കറ്റ് തയ്യാറാക്കിയിരുന്നത്. ഇതിനായി ഉപയോഗിച്ച കമ്പ്യൂട്ടർ പ്രിന്റർ ഉൾപ്പെടെയുള്ള ഉപകരണങ്ങൾ പോലീസ് പിടിച്ചെടുത്തു. കഫേ അടച്ചു പൂട്ടി സീൽ ചെയ്തു. കേരളത്തിൽ നിന്നും മറ്റ് സംസ്ഥാനങ്ങളിലേയ്ക്ക് യാത്ര ചെയ്യാൻ ആർടിപിസിആർ നെഗറ്റീവ് സർട്ടിഫിക്കേറ്റ് നിർബന്ധമാക്കിയിരുന്നു. ഇത് മുതലെടുത്താണ് പ്രതി വ്യാജ സർട്ടിഫിക്കേറ്റ് നിർമ്മിക്കാൻ ആരംഭിച്ചത് എന്ന് പോലീസ് സംശയിക്കുന്നു.കുട്ട, ബാവലി, തോൽപ്പെട്ടി ചെക്‌പോസ്റ്റുകൾ വഴി നിരവധി പേരാണ് ദിവസവും കർണാടകയിലേക്ക് യാത്ര ചെയ്യുന്നത്. എത്രപേർക്ക് വ്യാജ സർട്ടിഫിക്കറ്റ് നിർമ്മിച്ച് നൽകിയിട്ടുണ്ട് എന്ന കാര്യം പോലീസ് അന്വേഷിച്ച് വരികയാണ്.

തിരുവനന്തപുരം : സംസ്ഥാനത്ത് കൊറോണ ബാധിച്ച് മരിച്ചവരുടെ പേര് വിവരങ്ങൾ പ്രതിദിന കൊറോണ വിവര പട്ടികയിൽ സർക്കാർ ഇന്ന് മുതൽ പ്രസിദ്ധീകരിക്കും.കൊറോണ ബാധിച്ച് മരിച്ചവരുടെ പേരും വയസും സ്ഥലവും ജില്ലാ അടിസ്ഥാനത്തിലാണ് വെബ്‌സൈറ്റിൽ പ്രസിദ്ധീകരിക്കുക. കൊറോണ മരണം റിപ്പോർട്ട് ചെയ്തതിൽ വ്യാപക ക്രമക്കേട് നടനെന്ന വിമർശനങ്ങൾ ഉയരുന്ന സാഹചര്യത്തിലാണ് സർക്കാർ പേരുകൾ പ്രസിദ്ധീകരിക്കുന്നത് പുനരാരംഭിക്കാൻ തീരുമാനിച്ചത്.കഴിഞ്ഞ വർഷം ഡിസംബറിലാണ് പേരുകൾ പുറത്തുവിടുന്നത് ആരോഗ്യ വകുപ്പ് നിർത്തിയത്. അതിന് ശേഷം മരിച്ചവരുടെ പട്ടികയിൽ നിന്നും അർഹരായവരെപ്പോലും പുറത്താക്കി എന്നാണ് ആരോപണം. ഇതോടെ കൊറോണ ബാധിച്ച് മരിച്ചവർക്ക് നഷ്ടപരിഹരം നൽകണമെന്ന സുപ്രീം കോടതി നിർദ്ദേശം സർക്കാരിന് വൻ തിരിച്ചടിയാവുകയായിരുന്നു.കൊറോണ മരണക്കണക്കിൽ ക്രമക്കേട് നടന്നുവെന്ന് ആരോപിച്ച് പ്രതിപക്ഷം രംഗത്തെത്തി. സർക്കാരിനെതിരെ ആക്ഷേപം ശക്തമായതോടെയാണ് കണക്കുകൾ പ്രസിദ്ധീകരിക്കാൻ തീരുമാനിച്ചത്. എന്നാൽ ക്രക്കേട് നടന്നതുമായി ബന്ധപ്പെട്ട് സമഗ്രമായ പുനഃപരിശോധന നടത്തില്ല എന്ന നിലപാടിലായിരുന്നു സംസ്ഥാന സർക്കാർ. പട്ടികയിൽ നിന്ന് പുറത്തായ മരണങ്ങളെക്കുറിച്ച് പരാതികളുയർന്നാൽ പരിശോധിക്കാമെന്ന് ആരോഗ്യമന്ത്രി വീണാ ജോർജ് പറഞ്ഞിരുന്നു.