News

കൊച്ചി: കരിപ്പൂർ വിമാനത്താവളത്തിൽ വൻ ലഹരിമരുന്ന് വേട്ട.32 കോടി വിലമതിക്കുന്ന മയക്കുമരുന്നുമായി ആഫ്രിക്കന്‍ യുവതി പിടിയിലായി.കഴിഞ്ഞ അഞ്ച് വര്‍ഷത്തിനിടെ നടന്ന ഏറ്റവും വലിയ ലഹരിവേട്ടയാണ് ഇന്നലെ കരിപ്പൂരില്‍ നടന്നത്. മീബിയ സ്വദേശിനിയായ സോക്കോ ബിഷാല(41) ജൊഹന്നാസ്ബര്‍ഗില്‍ നിന്നാണ് മയക്കുമരുന്നുമായി കേരളത്തില്‍ എത്തിയത്. ഖത്തര്‍ എയര്‍വേസ് വിമാനത്തില്‍ പുലര്‍ച്ചെ 2.15 ന് ഇവര്‍ കരിപ്പൂരിലെത്തി. അഞ്ച് കിലോഗ്രാം ഹെറോയിന്‍ ഇവരുടെ ട്രോളി ബാഗിനടിയില്‍ ഒട്ടിച്ചു വെച്ച നിലയിലായിരുന്നു ഉണ്ടായിരുന്നത്. ഇവര്‍ പ്രൊഫഷണല്‍ മയക്കുമരുന്ന് കാരിയര്‍ ആണെന്നും ഹെറോയിന്‍ ഏറ്റുവാങ്ങാന്‍ വിമാനത്താവളത്തില്‍ ആളെത്തുമെന്ന് നിര്‍ദ്ദേശം ലഭിച്ചിരുന്നുവെന്നും ഡിആര്‍ഐ അറിയിച്ചു.ബിഷാലയോട് വിവരങ്ങള്‍ ചോദിച്ചറിയാന്‍ ശ്രമിക്കുന്നുണ്ടെങ്കിലും യുവതി അന്വേഷണത്തോട് സഹകരിക്കുന്നില്ല. ആരാണ് ഇവര്‍ക്ക് വേണ്ടി മയക്കുമരുന്ന് വാങ്ങാന്‍ വിമാനത്താവളത്തില്‍ കാത്ത് നിന്നത് എന്നത് സംബന്ധിച്ച വിവരങ്ങളും പോലീസിന് ലഭിച്ചിട്ടില്ല.  ചോദ്യം ചെയ്യലുമായി സഹകരിക്കാതിരിക്കാന്‍ പ്രത്യേകം പരിശീലനം ലഭിച്ചവരാണ് എന്നും സൂചനകളുണ്ട്. സംഘത്തിലെ മറ്റ് കണ്ണികളെ കുറിച്ചുള്ള അന്വേഷണം തുടരുകയാണെന്ന്. ആരാണ് വിമാനത്താവളത്തില്‍ ഇവരില്‍ നിന്നും മയക്കുമരുന്ന് വാങ്ങാനായി എത്താനിരുന്നത് എന്നതിലും അന്വേഷണം നടക്കുന്നുണ്ട്.അതേസമയം  ഗുജറാത്ത് അടക്കമുള്ള രാജ്യത്ത് മറ്റിടങ്ങളില്‍ നടന്ന ലഹരി വേട്ടകളുമായി ഇതിന് ബന്ധമില്ലെന്നും മയക്കുമരുന്ന് സംഘത്തിന്റെ അഫ്ഗാന്‍ ബന്ധം സ്ഥിരീകരിച്ചിട്ടില്ലെന്നുമാണ് ഡിആര്‍ഐ അന്വേഷണ സംഘം അറിയിക്കുന്നത്. കോഴിക്കോട് ഡിആര്‍ഐ ടീം സോക്കോ ബിഷാലയെ ഇന്നലെ രാത്രി കോടതിയില്‍ ഹാജരാക്കി. കോടതി ജയിലിലേക്ക് മാറ്റി.

കൊച്ചി : ഐഎസ്ആർഒ ചാരക്കേസിൽ നഷ്ടപരിഹാരം ആവശ്യപ്പെട്ട് മറിയം റഷീദയും ഫൗസിയ ഹസനും സിബിഐ മുഖേന സുപ്രീം കോടതിയെ സമീപിച്ചു. രണ്ട് കോടി രൂപ വീതം നഷ്ടപരിഹാരം നൽകണമെന്നാണ് ആവശ്യം. ഈ തുക അന്നത്തെ അന്വേഷണ ഉദ്യോഗസ്ഥരിൽ നിന്ന് ഈടാക്കി നൽകണം. ലോഡ്ജ് മുറിയിൽ തന്നെ അപമാനിക്കാൻ ശ്രമിച്ച മുൻ സ്പെഷ്യൽ ബ്രാഞ്ച് ഇൻസ്‌പെക്ടർ പി വിജയനെതിരെ പ്രത്യേകം കേസെടുക്കണമെന്നും മറിയം റഷീദ ആവശ്യപ്പെട്ടിട്ടുണ്ട്.ചാരക്കേസ് കെട്ടിച്ചമച്ചതാണെന്ന് കോടതി കണ്ടെത്തിയിരുന്നു. തുടർന്ന് നമ്പി നാരായണന് അൻപത് ലക്ഷം രൂപ നഷ്ടപരിഹാരം നൽകാനും പ്രതികളെ നിയമത്തിന് മുന്നിൽ കൊണ്ടുവരണമെന്നും സുപ്രീം കോടതി നിർദ്ദേശിച്ചിരുന്നു. പോലീസ്, ഐബി ഉദ്യോഗസ്ഥരടക്കം 18 പേരെ ഗൂഢാലോചന കേസിൽ പ്രതിചേർത്തുകൊണ്ടാണ് സിബിഐ കേസ് രജിസ്റ്റർ ചെയ്തത്. ഈ ഉദ്യോഗസ്ഥരിൽ നിന്നും നഷ്ടപരിഹാരം ഈടാക്കി നൽകണം എന്നാണ് ഇവരുടെ ആവശ്യം.രണ്ട് പേരുടെയും ആവശ്യം സിബിഐ സുപ്രീം കോടതിയെ അറിയിക്കും. മൂന്നരവർഷത്തോളം വിചാരണപോലും ഇല്ലാതെ ജയിൽക്കിടന്നെന്നും തുടർന്നുളള സ്വൈര്യ ജീവിതം വഴിമുട്ടിയെന്നുമാണ് ഇരുവരുടെയും ഹർജിയിലുളളത്.

കോട്ടയം: പ്രതിശ്രുത വരനൊപ്പം ബൈക്കിൽ യാത്ര ചെയ്യുന്നതിനിടെ കെഎസ്ആർടിസി ബസിന് അടിയിൽപ്പെട്ട് യുവതിക്ക് ദാരുണാന്ത്യം. മാമ്മൂട് കരിങ്ങണാമറ്റം സ്വദേശി സുബി ജോസഫാണ് മരിച്ചത്. കോട്ടയം വാഴൂർ റോഡിൽ വച്ചായിരുന്നു അപകടം.ഒരേ ദിശയിലാണ് കെഎസ്ആർടിസി ബസും സ്കൂട്ടറും സഞ്ചരിച്ചിരുന്നത്.കുമളിയിൽനിന്ന് കായംകുളത്തേക്ക് പോവുകയായിരുന്നു ബസ്. സ്കൂട്ടറിനെ ബസ് ഓവർടേക്ക് ചെയ്യുന്നതിനിടെ സ്കൂട്ടർ റോഡിൽനിന്നു തെന്നിമാറുകയും സുബി ബസിനടിയിൽപെടുകയുമായിരുന്നു. യുവാവ് അത്ഭുതകരമായി രക്ഷപെട്ടു.മാമ്മൂട് വളവുകുഴി കരിങ്ങണാമറ്റം സണ്ണി – ബിജി ദമ്പതികളുടെ ഏകമകളാണ് സുബി ജോസഫ്.  മൃതദേഹം കോട്ടയം മെഡിക്കൽ കോളജ് ആശുപത്രി മോർച്ചറിയിൽ.