News

ന്യൂമാഹി : ദേശീയ പാതകളിലെ അപകടങ്ങൾ കുറയ്ക്കുന്നതിനും ഗതാഗതകുരുക്ക്  ഒഴിവാക്കുന്നതിനും ആവശ്യമായ നടപടികൾ കൈക്കൊള്ളുക എന്ന ലക്‌ഷ്യം വെച്ച്  മാഹി പാലം മുതൽ മുഴപ്പിലങ്ങാട് വരെ ദേശീയപാത സംയുക്ത പരിശോധക സംഘം പരിശോധന നടത്തി.  ജില്ലാ ലീഗൽ അതോറിറ്റി  സെക്രട്ടറിയും സബ് ജഡ്ജിയുമായ എം പി ജയരാജന്റെ നേതൃത്വത്തിലാണ് പരിശോധന നടത്തിയത്.  സംഘത്തിന്റെ പരിഹാര നിർദേശമനുസരിച്ച് റോഡ് നവീകരണം,  ബസ് കാത്തിരിപ്പുകേന്ദ്രങ്ങളിൽ ബസ് ബേ, സീബ്രാ ലൈനുകൾ എന്നിവ സ്ഥാപിക്കാൻ നടപടി ഉണ്ടാവും.  തലശ്ശേരി ജോയിന്റ് ആർ ടി ഓ എ കെ രാധാകൃഷ്ണൻ, അസിസ്റ്റന്റ് മോട്ടോർ വെഹിക്കിൾ ഇൻസ്‌പെക്ടർ  എം പി റിയാസ്, പൊതുമരാമത്തു എൻജിനീയർ സുനിൽ , ന്യൂമാഹി ഗ്രാമ പഞ്ചായത്ത് പ്രസിഡന്റ് എ വി ചന്ദ്രദാസൻ തുടങ്ങിയവരാണ് പരിശോധക സംഘത്തിൽ ഉണ്ടായിരുന്നത്.

തിരുവനന്തപുരം : നടിയെ ആക്രമിച്ച കേസിലെ ഗുഢാലോചനക്കാരെ കുറിച്ച് മുഖ്യമന്ത്രിയ്ക് അറിയാമെന്നു ബി ജെ പി ദേശീയ നിർവാഹകസമിതി അംഗം വി മുരളീധരൻ. ആക്രമണം ഒരു സ്ത്രീയുടെ അനുവാദത്തോടെയാണെന്നു പൾസർ സുനി പറഞ്ഞിട്ടും അന്വേഷണം ആ സ്ത്രീയിലേക്ക് തിരിയാത്തത്  പിണറായി പറഞ്ഞിട്ടാണെന്നും അദ്ദേഹം  പറഞ്ഞു.  മുഖ്യ പ്രതിയെ പുറത്തു കൊണ്ടുവരാൻ മുഖ്യമന്ത്രിയ്ക് ധൈര്യമില്ലെന്നും  കേന്ദ്ര ഏജൻസി അന്വേഷിച്ചാൽ മാത്രമേ സത്യം പുറത്തു വരൂ എന്നും അദ്ദേഹം കൂട്ടിച്ചേർത്തു.

ശ്രീകണ്ഠപുരം : ഉളിക്കൽ ഏജന്റ് ടി വി ചാനൽ ലേഖകനും ചെമ്പേരി പ്രെസ്സ്ഫോറം സെക്രട്ടറിയുമായ സാജു ജോസെഫിനാണ് നടുവിൽ മണ്ഡലത്തിന് സമീപം വെച് അക്രമത്തിനിരയാകേണ്ടി വന്നത്. തളിപ്പറമ്പിലെ സ്വകാര്യ ആശുപത്രിയിൽ ചികിത്സയിലാണ്. പുലികുരുംബ സ്വദേശി മാന്തോട്ടത്തിൽ റോബിൻ എന്ന ആളുടെ  നേതൃത്വത്തിൽ ഒരു സംഘം ആളുകൾ ചേർന്നാണ് തന്നെ ആക്രമിച്ചതെന്ന് സാജു കുടിയാന്മല പോലീസിൽ പരാതിപ്പെട്ടു. സാജുവിന്റെ കഴുത്തിലെ രണ്ടര പവന്റെ സ്വർണ മാലയും നഷ്ടപ്പെട്ടിട്ടുണ്ട്.

കണ്ണൂർ : വിനോദ നികുതിയെ ചൊല്ലിയുണ്ടായ തർക്കത്തെ തുടർന്ന് അടച്ചുപൂട്ടിയ പയ്യാമ്പലം പാർക്ക് കണ്ണൂർ കോർപറേഷൻ ഏറ്റെടുത്തേക്കും. ഇതുസംബന്ധിച്ച കാര്യങ്ങൾ ഇന്ന് ഉച്ചയ്ക്ക് രണ്ടുമണിക് ചർച്ച  ചെയ്യും .കഴിഞ്ഞ മാസം ഒൻപതിനാണ് മേയർ ഇ പി ലതയുടെ നേതൃത്വത്തിൽ പാർക്ക് അടച്ചുപൂട്ടിയത്. മൂന്നാഴ്ചയായി തുടരുന്ന അനിശ്ചിതത്വത്തിനു ഇന്ന് തീരുമാനം  ഉണ്ടാകുമെന്നറിയുന്നു.