News

ആലപ്പുഴ:ബ്ലേഡ്  മാഫിയയുടെ ഭീഷണിയെ തുടർന്ന് കായംകുളത്ത് വീട്ടമ്മ ആത്മഹത്യ ചെയ്തു.കായംകുളം പട്ടോളി മാർക്കറ്റ് സ്വദേശിനി രാധാമണി(48) ആണ് വീട്ടിനുള്ളിൽ തൂങ്ങി മരിച്ചത്.സ്ത്രീകളുടെ നേതൃത്വത്തിലുള്ള ബ്ലേഡ് മാഫിയയുടെ ഭീഷണിയെ തുടർന്നാണ് ആത്മഹത്യയെന്നാണ് പരാതി.സ്ഥലത്തെ ബ്ലേഡ് പലിശക്കാരിൽ നിന്നും മകളുടെ വിവാഹാവശ്യങ്ങൾക്കായി രാധാമണി ഒരു ലക്ഷം  രൂപ വായ്പ്പയെടുത്തിരുന്നു.ഇതിന്റെ പലിശയും കൂട്ടുപലിശയും ഉൾപ്പെടെ രണ്ടു ലക്ഷത്തോളം രൂപ തിരിച്ചടക്കാൻ ഉണ്ടായിരുന്നു.ഇതിനു സാവകാശം ചോദിച്ചെങ്കിലും പലിശക്കാർ തയ്യാറായില്ല.ഇതേ തുടർന്ന് ഇന്നലെ വൈകിട്ട് മൂന്നുപേരടങ്ങുന്ന വനിതാ സംഘം രാധാമണിയുടെ വീട്ടിലെത്തി അസഭ്യം പറയുകയും ഭീഷണിപ്പെടുത്തുകയും ചെയ്തിരുന്നു. നാട്ടുകാരുടെയും പെൺമക്കളുടെയും മുൻപിൽ വെച്ച് അപമാനിച്ചതോടെ രാധാമണി മുറിയിൽ കയറി വാതിലടച്ചു.തുടർന്ന് തൂങ്ങി മരിക്കുകയും ചെയ്തു.സംഭവത്തിൽ പുതിയവിള സ്വദേശി ജയ,ഇവരുടെ സഹോദരി എന്നിവർക്കെതിരെ കായംകുളം പോലീസ് കേസെടുത്ത് അന്വേഷണം തുടങ്ങി.

മട്ടന്നൂർ∙ വിമാനത്താവള പ്രദേശത്തു നിന്നു കനത്ത മഴയിൽ മണ്ണൊലിച്ച് താഴെ ഭാഗത്തെ ഒട്ടേറെ കുടുംബങ്ങൾ ദുരിതത്തിലായി. വീടുകളിൽ ചെളിയും മണ്ണും വന്നടിയുകയും വ്യാപകമായി കൃഷി നശിക്കുകയും ചെയ്തു.എളമ്പാറ, പുതുക്കുടി, ആനക്കുനി, കാര എന്നിവിടങ്ങളിലാണ് ഏറെ നാശമുണ്ടായത്. വിമാനത്താവളത്തിൽ നിന്നുള്ള മഴവെള്ളം ഒഴുകിപ്പോകാൻ നിർമിച്ച ചെറിയ കൈത്തോട് നിറഞ്ഞു കവിഞ്ഞതിനെ തുടർന്നാണ് കൃഷിയിടങ്ങളി‍ൽ ചെളി കയറിയത്.വീട്ടുപരിസരത്തു കെട്ടിക്കിടക്കുന്ന ചെളി വിമാനത്താവള തൊഴിലാളികളെ ഉപയോഗിച്ചു നീക്കം ചെയ്യാൻ നടപടിയെടുത്തു.

തിരുവനന്തപുരം:ജിഎസ്‍ടി പ്രാബല്യത്തില്‍ വന്നതോടെ സംസ്ഥാനത്ത് നിത്യോപയോഗ സാധനങ്ങളുടെ വില വര്‍ധിക്കുന്നു. അരി, മൈദ, പഞ്ചസാര തുടങ്ങിയ സാധനങ്ങളുടെ വിലയും ഹോട്ടല്‍ സാധനങ്ങളുടെ വിലയും വര്‍ധിച്ചു. കോഴിക്ക് നികുതി ഒഴിവാക്കിയെങ്കിലും വിപണിയില്‍ വില കുറഞ്ഞിട്ടുമില്ല.ഇതുവരെ നികുതി ഇല്ലാതിരുന്ന അരി, അരിമാവ്, മൈദ, ആട്ട തുടങ്ങിയവയുടെ ബ്രാന്‍ഡഡ് ഇനങ്ങള്‍ക്കെല്ലാം 5 ശതമാനം നികുതി ആയി.കേരളീയര്‍ സാധാരണയായി ഉപയോഗിക്കുന്ന സുരേഖ, ജയ ഉള്‍പ്പെടെ എല്ലാ അരികള്‍ക്കും വില കൂടും. ആശയക്കുഴപ്പം നിലനില്‍ക്കുന്നതിനാല്‍ ഇപ്പോള്‍ ജിഎസ്‍ടി ചുമത്തിയില്ലെങ്കിലും അരിവില 50 രൂപക്ക് മുകളിലായി.നഗരത്തിലെ മിക്കവാറും ഹോട്ടലുകളിലും നികുതി 18 ശതമാനമായി.കെട്ടിട നിര്‍മാണത്തിനാവശ്യമായ അസംസ്കൃത വസ്തുക്കളുടെ നികുതിയിലുണ്ടായ കുറവ് കെട്ടിട നിര്‍മാണ ചെലവ് കുറക്കുമെന്നാണ് ഈ മേഖലയില്‍ പ്രവര്‍ത്തിക്കുന്നവരുടെ പ്രതീക്ഷ. നികുതിയിലുണ്ടായ കുറവിന്റെ അടിസ്ഥാനത്തില്‍ സാധനങ്ങളുടെ വില ഉല്പാദകര്‍ കുറക്കുന്നുണ്ടെന്ന് അധികൃതര്‍ ഉറപ്പ് വരുത്തണമെന്ന ആവശ്യവും ഈ മേഖലയില്‍ നിന്നുയരുന്നു.ജിഎസ്ടി നിരക്കുകള്‍ പ്രാബലത്തിലാകുന്നതോടെ നിത്യവും ഉപയോഗിക്കുന്ന പല മരുന്നുകളുടെയും വില കുറയും. എന്നാല്‍ കോസ്മെറ്റിക്സ്, ഹെല്‍ത്ത് സപ്ലിമെന്റ് വിഭാഗത്തിലെ മരുന്നുകള്‍ക്ക് വില കൂടും.ജിഎസ്ടി പ്രകാരം ഇന്‍സുലിന്‍ പോലെ അവശ്യ മരുന്നുകള്‍ക്ക് 5 ശതമാനമാണ് നികുതി. നേരത്തെ ഇത് 6 മുതല്‍ 8 ശതമാനം വരെയായിരുന്നു. എന്നാല്‍ ജീവന്‍ രക്ഷാവിഭാഗത്തില്‍ പെടാത്തവയുടെ നികുതി  17ല്‍ നിന്ന് 18 ശതമാനമായി.