News

കണ്ണൂര്‍: കടല്‍ക്ഷോഭ സമയത്ത് കടലിലെ പാറയില്‍ ധ്യാനമിരിക്കാന്‍ പോയ യുവാവിനെ ബലമായി കരയില്‍ എത്തിച്ച് അഗ്‌നിരക്ഷാ സേന. കണ്ണൂര്‍ എടക്കാട് കിഴുന്ന സ്വദേശി കെകെ രാജേഷിനെയാണ് അഗ്നി രക്ഷ സേനയും നാട്ടുകാരും രക്ഷിച്ച്‌ കരയ്ക്ക് എത്തിച്ചത്.ഞായറാഴ്ച രാവിലെ ഏഴു മണിയോടെയാണ് നടകീയ സംഭവങ്ങള്‍. തോട്ടട കിഴുന്ന കടപ്പുറത്ത് നിന്നും 200 മീറ്റര്‍ അകലെയാണ് കടലില്‍ ഉയര്‍ന്ന് നില്‍ക്കുന്ന പാറ. ആ പാറയിലേക്കാണ് രാജേഷ് നീന്തി ചെന്നത്.പിന്നീട് അവിടെ ധ്യാനമിരിക്കുകയായിരുന്നു. കടപ്പുറത്ത് നടക്കാനിറങ്ങിയവര്‍ ഈ കാഴ്ച കണ്ടിരുന്നു. കടല്‍ ക്ഷോഭം മനസിലാക്കിയ ഇവര്‍ രാജേഷ് അഗ്നിരക്ഷ സേനയെ വിവരം അറിയിക്കുകയായിരുന്നു.കടല്‍ക്ഷോഭത്തെ തുടര്‍ന്ന് കൂറ്റന്‍ തിരമാലകള്‍ പാറയിലേക്ക് ആഞ്ഞടിക്കുന്നുണ്ടായിരുന്നുവെന്ന് ഇവര്‍ പറഞ്ഞു. കണ്ണൂരില്‍ നിന്നും എത്തിയ അഗ്നി രക്ഷ സേന നാട്ടുകാരുടെ സഹായത്തോടെ രാജേഷിനെ കരയ്ക്ക് എത്തിക്കുകയായിരുന്നു. കരയിലേക്ക് എത്തിക്കാനുള്ള ശ്രമത്തെ രാജേഷ് ബലം പ്രയോഗിച്ച്‌ ചെറുത്തെങ്കിലും നാട്ടുകാരും സേനയും ഇതേ രീതിയില്‍ ബലം പ്രയോഗിച്ച്‌ യുവാവിനെ കരയ്ക്ക് എത്തിച്ചു.

തിരുവനന്തപുരം : സംസ്ഥാന ചലച്ചിത്ര പുരസ്‌കാരങ്ങൾ പ്രഖ്യാപിച്ചു. ജയസൂര്യയാണ് മികച്ച നടൻ. ചിത്രം വെള്ളം.കപ്പേളയിലെ അഭിനയത്തിന് അന്ന ബെൻ മികച്ച നടിയ്‌ക്കുള്ള പുരസ്‌കാരം സ്വന്തമാക്കി.ദി ഗ്രേറ്റ് ഇന്ത്യൻ കിച്ചണാണ് മികച്ച സിനിമ.ശ്രീരേഖയാണ് മികച്ച സ്വഭാവ നടി. ചിത്രം വെയിൽ. മികച്ച സ്വഭാവനടനുള്ള പുരസ്‌കാരം നടൻ സുധീഷും സ്വന്തമാക്കി. അയ്യപ്പനും കോശിയുമാണ് ജനപ്രിയ ചിത്രം.മികച്ച ഗായികയ്‌ക്കുള്ള പുരസ്‌കാരം നിത്യാ മാമന് ലഭിച്ചു. അഭിനയത്തിന് പ്രത്യേക ജൂറി അവാർഡ് സിജി പ്രദീപിന് ലഭിച്ചു. മികച്ച മേക്കപ്പ് ആർട്ടിസ്റ്റിനുള്ള പുരസ്‌കാരം റഷീദ് അഹമ്മദ് സ്വന്തമാക്കി. എ ജയചന്ദ്രനാണ് മികച്ച സംഗീത സംവിധായകൻ. ചിത്രം സൂഫിയും സുജാതയും. ജിയോ ബേബിയാണ് മികച്ച തിരക്കഥാകൃത്ത്.നടിയും സംവിധായികയുമായ സുഹാസിനി മണിരത്‌നം അധ്യക്ഷയായ ജൂറിയാണ് പുരസ്‌കാരം പ്രഖ്യാപിച്ചത്.

കണ്ണൂര്‍: ഒന്നര വയസ്സുകാരിയെ പുഴയില്‍ എറിഞ്ഞു കൊലപ്പെടുത്തിയ കേസിലെ പ്രതി പിടിയിലായി.സംഭവത്തിന് ശേഷം രക്ഷപ്പെട്ട കുട്ടിയുടെ പിതാവ് കെ.പി ഷിജുവിനെയാണ് മട്ടന്നൂരിൽ വെച്ച്‌ മട്ടന്നൂര്‍ സിഐ പിടികൂടിയത്.പ്രതിയെ ശനിയാഴ്‌ച്ച ഉച്ചയോടെ കതിരൂർ പൊലിസിന് കൈമാറി. ഇനിയുള്ള ചോദ്യം ചെയ്യലില്‍ മാത്രമേ കൊലപാതകത്തിന്റെ കാരണം വ്യക്തമാവുകയുള്ളുമെന്ന് പൊലിസ് പറഞ്ഞു. കൊലപാതകത്തിനുശേഷം പ്രതി തലശ്ശേരിയില്‍നിന്ന് കോഴിക്കോട് മാനന്തവാടി ഇരിട്ടി വഴിയാണ് മട്ടന്നൂരില്‍ എത്തിയത്. അന്‍വിതയെ കൊലപ്പെടുത്തിയതിനും സോനയെ കൊല്ലാന്‍ ശ്രമിച്ചതിനും കേസെടുത്തിട്ടുണ്ടെന്നും, ഭാര്യ സോനയെയും ഒന്നര വയസുള്ള മകള്‍ അന്‍വിതയെയും ഷിനു പുഴയില്‍ തള്ളിയിടുകയായിരുന്നുവെന്നും പോലീസ് പറഞ്ഞു. പാനൂര്‍ പാത്തിപ്പാലത്ത് ദുരൂഹസാഹചര്യത്തില്‍ അമ്മയെയും കുഞ്ഞിനെയും പുഴയില്‍ വീണ നിലയില്‍ കണ്ടെത്തിയ സംഭവം കൊലപാതകമാണെന്ന് സിറ്റി പൊലിസ് കമ്മിഷണര്‍ ആര്‍.ഇളങ്കോവന്‍ നേരത്തെ അറിയിച്ചിരുന്നു ഈ കേസ് അന്വേഷിക്കാനായി എസ്‌പിയുടെ നിര്‍ദ്ദേശപ്രകാരം പ്രത്യേക അന്വേഷണ സംഘം രൂപീകരിച്ചിരുന്നു.സംഭവത്തില്‍ പെണ്‍കുഞ്ഞ് മരിച്ചിരുന്നു. അമ്മയെ നാട്ടുകാര്‍ രക്ഷപ്പെടുത്തുകയായിരുന്നു. തന്നെയും മകളേയും ഭര്‍ത്താവ് തള്ളിയിട്ടതാണെന്ന് യുവതി മൊഴി നല്‍കിയതോടെയാണ് ഭര്‍ത്താവ് ഷിജുവിനായി പൊലിസ് തെരച്ചില്‍ തുടങ്ങിയത്.തലശ്ശേരി കുടുംബകോടതി ജീവനക്കാരന്‍ പത്തായക്കുന്ന് കുപ്പ്യാട്ട് കെ.പി.ഷിജുവിന്റെ ഭാര്യയും ഈസ്റ്റ് കതിരൂര്‍ എല്‍.പി. സ്‌കൂള്‍ അദ്ധ്യാപികയുമായ സോന (25) യും മകള്‍ ഒന്നരവയസ്സുകാരി അന്‍വിതയുമാണ് പുഴയില്‍ വീണത്. വെള്ളിയാഴ്ച വൈകിട്ട് ആറോടെയാണ് സംഭവം.

പാലക്കാട്: ശക്തമായ മഴയിൽ ജലനിരപ്പുയർന്നതിനെ തുടർന്ന്  മലമ്പുഴ ഡാമിന്റെ ഷട്ടറുകള്‍ തുറന്നു.ഡാമിന്റെ ജലനിരപ്പ് 114.10 അടി പിന്നിട്ടതോടെ റൂള്‍ കര്‍വ് പ്രകാരം ഷട്ടറുകള്‍ തുറക്കുമെന്ന് ജില്ലാ കലക്‌ടര്‍ വ്യക്തമാക്കിയിരുന്നു.കല്പാത്തി പുഴയുടെയും ഭാരതപ്പുഴയുടെയും തീരത്തുള്ളവര്‍ ജാഗ്രത പുലര്‍ത്തണമെന്നും കലക്‌ടര്‍ നിര്‍ദേശിച്ചു.117.06 അടി ആണ് ഡാമിന്റെ പരമാവധി സംഭരണ ശേഷി. 114 അടി പിന്നിടുമ്പോൾ തന്നെ ഡാമിന്റെ ജലനിരപ്പ് ക്രമീകരിക്കണമെന്ന് നേരത്തെ തന്നെ നിര്‍ദ്ദേശം ഉണ്ടായിരുന്നു. ഇതിനെ തുടര്‍ന്ന് ഷട്ടറുകള്‍ അഞ്ച് സെന്റീമീറ്റര്‍ വീതം തുറന്ന് ജലനിരപ്പ് ക്രമീകരിക്കാന്‍ ഇറിഗേഷന്‍ വകുപ്പ് തീരുമാനിക്കുകയായിരുന്നു.