പഴയങ്ങാടി: പഴയങ്ങാടി കുളങ്ങരത്തുപള്ളിക്കു സമീപം ബസ്സുകൾ കൂട്ടിയിടിച്ച് നൂറോളം പേർക്ക് പരിക്കേറ്റു. ബുധനാഴ്ച രാവിലെ എട്ടോടെയാണ് സംഭവം. തളിപ്പറമ്പിൽനിന്നു പുതിയങ്ങാടിയിലേക്കു പോവുകയായിരുന്ന സൽസബീർ ബസ്സും പഴയങ്ങാടിയിൽനിന്നു മുട്ടത്തേക്ക് പോവുകയായിരുന്ന ശ്രേയ ബസ്സുമാണ് കൂട്ടിയിടിച്ചത്. പരിക്കേറ്റവരെ ആദ്യം പഴയങ്ങാടി താലൂക്ക് ആസ്പത്രിയിലും പിന്നീട് പരിയാരം, തളിപ്പറമ്പ് ആസ്പത്രികളിലും പ്രവേശിപ്പിക്കുകയായിരുന്നു. പോലീസും നാട്ടുകാരും ചേർന്ന് രക്ഷാപ്രവർത്തനങ്ങൾക്ക് നേതൃത്വം നൽകി.രാവിലെ ആയതിനാൽ സ്കൂൾ വിദ്യാർഥികളും തൊഴിലാളികളും ഉൾപ്പെടെ നിരവധിപേർ ഇരുബസ്സുകളിലും ഉണ്ടായിരുന്നു.അപകടത്തെ തുടർന്ന് മണിക്കൂറോളം പഴയങ്ങാടിയിൽ ഗതാഗതതടസ്സമുണ്ടായി.പഴയങ്ങാടി പോലീസ് സ്റ്റേഷനിൽനിന്നു തൊണ്ടിവാഹനങ്ങൾ കൊണ്ടുപോകാനായി കൊണ്ടുവന്ന ക്രെയിൻ ഉപയോഗിച്ചാണ് അപകടത്തിൽപ്പെട്ട ബസ്സുകൾ നീക്കംചെയ്തത്.
