News

മട്ടന്നൂർ: നഗരസഭാ തെരഞ്ഞെടുപ്പിൽ കേരളത്തിന് മാതൃകയാകുകയാണ് മട്ടന്നൂർ. മട്ടന്നൂരിനെ പരിസ്ഥിതി സൗഹാർദമാക്കുവാൻ ഗ്രീൻ പ്രോട്ടോക്കോൾ പാലിച്ചുള്ള ഇലക്‌ഷ‌ൻ പ്രചാരണ തീരുമാനത്തിന് ഐക്യദാർഢ്യം പ്രഖ്യാപിച്ച രാഷ്ട്രീയ പാർട്ടികൾക്കൊപ്പം സൈൻ പ്രിന്‍റിംഗ് ഇൻഡസ്ട്രീസ് അസോസിയേഷന്‍റെ പിന്തുണയും. പരിസ്ഥിതി സൗഹാർദമായ തെരഞ്ഞെടുപ്പ് യാഥാർഥ്യമാക്കാനുള്ള നഗരസഭയുടെയും രാഷ്ട്രീയ പാർട്ടികളുടെയും പരിശ്രമത്തിന്‌ കണ്ണൂർ ജില്ലാ കമ്മിറ്റി പിന്തുണയുമായി രംഗത്തു വന്നതോടെയാണ് ഗ്രീൻ പ്രോട്ടോക്കോൾ പ്രചാരണം യാഥാർഥ്യമാകുന്നത്. പ്രചാരണ പ്രവർത്തനങ്ങൾക്ക് പിവിസി ഫ്ളക്സ് പൂർണമായും ഒഴിവാക്കിയാണ് മട്ടന്നൂരിൽ രാഷ്ട്രീയ പാർട്ടികളുടെ പരിസ്ഥിതി സൗഹാർദ വിപ്ലവം. ഫ്ളക്സിന് പകരം പൂർണമായും റീസൈക്കിൾ ചെയ്യാവുന്നതും അതേ പ്രിന്‍റിംഗ് ക്വാളിറ്റിയുള്ളതുമായ ഇക്കോസൈൻ ഉപയോഗിച്ചാണ് പ്രചാരണ ബോർഡുകളും ബാനറുകളും ഒരുക്കുന്നത്.സർക്കാർ അംഗീകരിച്ചതും ഉപയോഗശേഷം റീസൈക്കിൾ ചെയ്യാവുന്നതുമായ പ്രകൃതി സൗഹാർദ ഇക്കോസൈൻ പ്രിന്‍റ് പ്രചാരണശേഷം റീസൈക്കിളിംഗിനായി സമ്മാനങ്ങൾ നൽകി തിരിച്ചെടുക്കുവാനുള്ള സംവിധാനവും ഒരുക്കിയിട്ടുണ്ടെന്ന് ഫ്ളെക്സ് പ്രിന്‍റിംഗ് യൂണിറ്റുകളുടെ സംഘടനയായ സൈൻ പ്രിന്‍റിംഗ് ഇൻഡസ്ട്രീസ് അസോസിയേഷൻ അറിയിച്ചു.

തിരുവനന്തപുരം:സംസ്ഥാനത്ത് ഇന്ന് രാത്രിയും വൈദ്യുതി നിയന്ത്രണം.വൈകുന്നേരം 6.45 മുതൽ രാത്രി 10.45 വരെയാണ് നിയന്ത്രണം.15 മിനിറ്റ് വീതമാണ് ലോഡ് ഷെഡിങ്.കേന്ദ്ര വിഹിതത്തിൽ കുറവുണ്ടായതിനെ തുടർന്നാണ് നിയന്ത്രണം.

തിരുവനന്തപുരം:ആക്രമിക്കപ്പെട്ട നടിക്കെതിരെ മോശം പരാമർശം നടത്തിയെന്ന പരാതിയിൽ മുൻ ഡിജിപി സെന്കുമാറിനെതിരെ അന്വേഷണം ആരംഭിച്ചു.എ.ഡി.ജി.പി ബി.സന്ധ്യക്കാണ്‌ അന്വേഷണ ചുമതല.ഓൺലൈൻ വാരികയ്ക്ക് നൽകിയ അഭിമുഖത്തിനിടെ മൊബൈൽ ഫോണിൽ വിളിച്ചയാളോടാണ് നടിയെ കുറിച്ച് സെൻകുമാർ മോശം പരാമർശം നടത്തിയത്.സെൻകുമാറിനെ കുറിച്ച്  ഗുരുതര പരാമർശങ്ങൾ അടങ്ങുന്ന റിപ്പോർട് സന്ധ്യ നേരത്തെ സർക്കാരിന് സമർപ്പിച്ചിരുന്നു.സ്ത്രീത്വത്തിനു നേരെയുള്ള കടന്നുകയറ്റമാണ് ഡിജിപിയുടേതെന്നാണ് റിപ്പോർട്ടിൽ ചൂണ്ടിക്കാണിക്കുന്നത്.