News

മഞ്ചേശ്വരം:ട്രെയിനിൽ കടത്തുകയായിരുന്ന 13 ലക്ഷത്തിന്റെ കഞ്ചാവ് റെയിൽവേ സംരക്ഷണ സേന പിടികൂടി.തിങ്കളാഴ്ച രാത്രി ചെന്നൈയിൽ നിന്നും മംഗളൂരുവിലേക്ക് പോവുകയായിരുന്ന എഗ്മോർ എക്സ്പ്രസിലെ ജനറൽ കമ്പാർട്മെന്റിൽ വലിയ ബാഗുകളിൽ ആറു ബോക്സുകളിലായി സൂക്ഷിച്ച നിലയിലാണ് 13.7 കിലോ തൂക്കം വരുന്ന കഞ്ചാവ് കണ്ടെത്തിയത്.റെയിൽവേ സംരക്ഷണ സേനയിലെ എസ്.ഐ വി.കെ ബിനോയിയുടെ നേതൃത്വത്തിലായിരുന്നു പരിശോധന.പിടിച്ചെടുത്ത കഞ്ചാവ് പിന്നീട് കാസർകോഡ് എക്‌സൈസിന് കൈമാറി. തമിഴ്‌നാട്ടിൽ നിന്നും മംഗളൂരുവിലേക്കാണ്  കഞ്ചാവ് കടത്താൻ ശ്രമിച്ചതെന്ന് സംശയിക്കുന്നതായി റെയിൽവേ സംരക്ഷണ സേന വ്യക്തമാക്കി.രാത്രികാലങ്ങളിൽ വരുന്ന ട്രെയിനുകളിൽ കാസർകോഡ് ജില്ലയിലേക്ക് കർണാടകയിൽ നിന്നും വൻതോതിൽ കഞ്ചാവ് കടത്തുകയാണെന്ന വിവരത്തിന്റെ അടിസ്ഥാനത്തിലാണ് ട്രെയിനിൽ പരിശോധന നടത്തിയത്.

കൊച്ചി:നടി കാവ്യാമാധവന്റെ  കൊച്ചിയിലുള്ള വില്ലയിലെ സന്ദർശക രജിസ്റ്റർ നശിച്ചു.വില്ലയിലെ സുരക്ഷാ ജീവനക്കാരനാണ് രജിസ്റ്റർ നശിച്ചുവെന്നു വ്യക്തമാക്കിയത്.വെള്ളം വീണു രജിസ്റ്റർ നശിച്ചുവെന്നാണ് ജീവനക്കാരൻ പറഞ്ഞത്.കാവ്യയുടെ വില്ലയിൽ താൻ പോയിട്ടുണ്ടെന്ന് പൾസർ സുനി നേരത്തെ വ്യക്തമാക്കിയിരുന്നു.അവിടുത്തെ സന്ദർശക രെജിസ്റ്ററിൽ താൻ പേരും ഫോൺ നമ്പരും രേഖപ്പെടുത്തിയെന്നും സുനി പോലീസിനെ അറിയിച്ചിരുന്നു.ഇതിനു പിന്നാലെയാണ് രെജിസ്റ്റർ നശിച്ചുവെന്നു ജീവനക്കാരൻ വ്യക്തമാക്കിയത്.സംഭവത്തെ കുറിച്ച് പോലീസ് അന്വേഷണം ആരംഭിച്ചു.രജിസ്റ്റർ മനപ്പൂർവ്വം നശിപ്പിച്ചതാണോ എന്നും പരിശോധിക്കുമെന്നു പോലീസ് വൃത്തങ്ങൾ വ്യക്തമാക്കി.

കൊല്ലം:നീണ്ടകരയിൽ മത്സ്യബന്ധനത്തിന് പോയ വള്ളം മറിഞ്ഞ് ഒരാൾ മരിച്ചു.നീണ്ടകര ചെറുപുഷ്പ്പം യാഡിന് സമീപം പടന്നയിൽ വീട്ടിൽ ജെയിംസ് ആണ് മരിച്ചത്. കൂടെയുണ്ടായിരുന്ന രണ്ടുപേർ രക്ഷപ്പെട്ടു.നീണ്ടകര തീരത്തു നിന്ന് അരനോട്ടിക്കൽ മൈൽ അകലെ കടലിൽ മൽസ്യബന്ധനം നടത്തുന്നതിനിടയിലാണ് വള്ളം മറിഞ്ഞത്.മൂന്നു തൊഴിലാളികളാണ് വള്ളത്തിലുണ്ടായിരുന്നത്.മൂന്നുപേരെയും മറ്റു വള്ളക്കാർ ആശുപത്രിയിൽ എത്തിച്ചെങ്കിലും ജെയിംസിന്റെ ജീവൻ രക്ഷിക്കാനായില്ല. സംഭവത്തിൽ കോസ്റ്റൽപോലീസ് കേസെടുത്തു.

കൊച്ചി:കൊച്ചിയിൽ നടി ആക്രമിക്കപ്പെട്ട കേസുമായി ബന്ധപ്പെട്ട് ചോദ്യം ചെയ്യലിനായി നാദിർഷ പൊലീസിന് മുൻപിൽ ഹാജരാകുന്ന കാര്യത്തിൽ ആശയക്കുഴപ്പം.ചോദ്യം ചെയ്യലിന് ഹാജരാകാനുള്ള സന്നദ്ധത നാദിർഷ നേരത്തെ അന്വേഷണ സംഘത്തെ അറിയിച്ചിരുന്നു. എന്നാൽ ഇതിനായി രേഖാമൂലം നോട്ടീസ് നൽകണമെന്നാണ് നടന്റെ ആവശ്യം.അതേസമയം സെപ്റ്റംബർ ആറിന് ഹാജരാകണമെന്ന് കാട്ടി നോട്ടീസ് നല്കിയിട്ടുള്ളതിനാൽ വീണ്ടും നോട്ടീസ് നൽകാനാവില്ല എന്ന നിലപാടിലാണ് അന്വേഷണ സംഘം.മാത്രമല്ല കോടതിയിൽ നിന്നുള്ള തീരുമാനം അനുസരിച്ചു പ്രവർത്തിക്കാനാണ് അന്വേഷണ സംഘത്തിന്റെ തീരുമാനം.ഈ സാഹചര്യത്തിൽ വീണ്ടും നിയമോപദേശം തേടിയ ശേഷം മാത്രമേ ഹാജരാകുന്ന കാര്യത്തിൽ തീരുമാനമെടുക്കൂ എന്ന് നാദിർഷ പോലീസിനെ അറിയിച്ചു.തിങ്കളാഴ്ച 11.30 ന് ആലുവ പോലീസ് ക്ലബ്ബിൽ ചോദ്യം ചെയ്യലിനായി നാദിർഷ എത്തുമെന്ന പ്രതീക്ഷയിൽ കേസന്വേഷണത്തിന്റെ മുഖ്യ ചുമതല വഹിക്കുന്ന പെരുമ്പാവൂർ സി.ഐ ബിജു പൗലോസ് ഉൾപ്പെടെയുള്ള പോലീസ് ഉദ്യോഗസ്ഥർ എത്തിയിരുന്നു.എന്നാൽ നാദിർഷ വരില്ലെന്ന് ഉറപ്പായതോടെ അന്വേഷണ സംഘം മടങ്ങി.