News

കണ്ണൂർ:നിരോധിത ലഹരി ഉല്‌പന്നങ്ങളുമായി നാറാത്ത് സ്വദേശി പിടിയിൽ.സ്റ്റേഷനറി സ്റ്റോർ കേന്ദ്രീകരിച്ച് ലഹരി ഉത്പന്നങ്ങൾ വിതരണം ചെയ്യുന്ന മുഹമ്മദ് കുഞ്ഞിയാണ്(39) അറസ്റ്റിലായത്.10,000 പാക്കറ്റ് ഹാൻസുമായാണ് ഇയാളെ പിടികൂടിയത്.ബംഗളൂരിൽ നിന്നുമാണ് ഇയാൾ ഇവ കൊണ്ടുവന്നു കണ്ണൂരിൽ വിൽപ്പന നടത്തുന്നത്.സ്കൂൾ വിദ്യാർത്ഥികൾക്കും അന്യസംസ്ഥാന തൊഴിലാളികൾക്കുമാണ് ഇയാൾ ലഹരി ഉത്പന്നങ്ങൾ വിതരണം ചെയ്യുന്നതെന്ന് പോലീസ് പറഞ്ഞു.

കൊച്ചി:ജാമ്യം തേടി ദിലീപ് വീണ്ടും ഹൈക്കോടതിയെ സമീപിക്കാനൊരുങ്ങുന്നു.ഇത് മൂന്നാം തവണയാണ് ദിലീപ് ജാമ്യത്തിനായി ഹൈക്കോടതിയെ സമീപിക്കാനൊരുങ്ങുന്നത്.ഇന്നലെ അങ്കമാലി മജിസ്‌ട്രേറ്റ് കോടതി രണ്ടാം തവണയും ദിലീപിന്റെ ജാമ്യാപേക്ഷ തള്ളിയിരുന്നു. രണ്ടുതവണ ഹൈക്കോടതിയും ഒരു തവണ അങ്കമാലി മജിസ്‌ട്രേറ്റ് കോടതിയും ജാമ്യം തള്ളിയിട്ടും സോപാധിക ജാമ്യത്തിന് അവകാശമുണ്ടെന്ന് കാണിച്ചാണ് ദിലീപ് വീണ്ടും ഹൈക്കോടതിയെ സമീപിക്കുന്നത്.എന്നാൽ 90 ദിവസത്തിനുള്ളിൽ  കുറ്റപത്രം സമർപ്പിക്കപ്പെട്ടിട്ടില്ലെങ്കിൽ മാത്രമേ സോപാധിക ജാമ്യത്തിന് അർഹതയുള്ളൂ എന്നാണ് കോടതിയുടെ നിലപാട്.20 വർഷം വരെ വിലക്കുലഭിക്കാവുന്ന കുറ്റമാണ് ദിലീപിനെതിരെ സമർപ്പിച്ചിരിക്കുന്നത്.കേസിലെ അന്വേഷണം പൂർത്തിയാകുന്നതായാണ് റിപ്പോർട്ട്.90 ദിവസം തികയുന്നതിനു മുമ്പ്തന്നെ കുറ്റപത്രം നൽകിയേക്കും.

കണ്ണൂർ:കണ്ണൂർ കളക്റ്ററേറ്റിൽ കള്ളൻ കയറി.കളക്റ്ററുടെ ഓഫീസിനു താഴത്തെ നിലയിൽ പ്രവർത്തിക്കുന്ന ഭാഗ്യക്കുറി ക്ഷേമനിധി,ഗ്രാമവികസന,ദാരിദ്ര്യ ലഘൂകരണ ഓഫീസുകളിലും കാന്റീനിലുമാണ് കള്ളൻ കയറിയത്.കാന്റീനിലെ മേശയിൽ നിന്നും 20000 രൂപയും ഭാഗ്യക്കുറി ക്ഷേമനിധി ഓഫീസിൽ നിന്നും 1500 രൂപയും മോഷ്ടിച്ചു.ദരിദ്ര ലഘൂകരണ ഓഫീസിന്റെ കമ്പ്യൂട്ടർ മുറിയുടെ പൂട്ട് തകർത്തിട്ടുണ്ട്.ഗ്രാമ വികസന വകുപ്പ് ഓഫീസിലെ ഫയലുകളും മറ്റ് ഉപകരണങ്ങളും വാരിവലിച്ചിട്ട നിലയിലാണ്.ഞായറാഴ്ച പുലർച്ചയോ ഇന്നലെ പുലർച്ചയോ ആയിരിക്കാം കള്ളൻ കയറിയത് എന്നാണ് പോലീസിന്റെ നിഗമനം.ഉത്തരമേഖലാ ഐ ജിയുടെയും മറ്റും ഓഫീസുകൾ പ്രവർത്തിക്കുന്നതിന് 100 മീറ്റർ പരിധിക്കുള്ളിലാണ് കള്ളൻ എത്തിയത്.ആർ.ടി ഓഫീസിനടുത്തുള്ള മിൽമ ബൂത്തിലും കവർച്ചാശ്രമമുണ്ടായി.കള്ളന്റെ ദൃശ്യം സിസിടിവി ക്യാമറയിൽ പതിഞ്ഞതായി സൂചനയുണ്ട്.പോലീസ് അന്വേഷണം ആരംഭിച്ചു.