News

തിരുവനന്തപുരം:ഓഖി ദുരിതാശ്വാസത്തിനായി 7340 കോടി രൂപയുടെ പ്രത്യേക പാക്കേജ് കേരളം കേന്ദ്രത്തോട് ആവശ്യപ്പെട്ടു.കേരളത്തിന്റെ ഈ ആവശ്യം അനുഭാവപൂർവം പരിഗണിക്കാമെന്നും പ്രധാനമന്ത്രി ഉറപ്പുനൽകി.ഗവ.ഗസ്റ്റ് ഹൗസിൽ മുഖ്യമന്ത്രി പിണറായി വിജയൻ ഉൾപ്പെടെയുള്ളവരുമായി കൂടിക്കാഴ്ച നടത്തുന്നതിനിടെയാണ് പ്രധാനമന്ത്രി സഹായം ഉറപ്പുനൽകിയത്.ഓഖി ദുരന്തം വിലയിരുത്തുന്നതിനായി തിരുവനന്തപുരത്തെത്തിയതായിരുന്നു പ്രധാനമന്ത്രി.ദുരിതബാധിതരെ പുനരധിവസിപ്പിക്കുന്നതിനും തീരദേശ പ്രദേശങ്ങൾ പുനർനിർമ്മിക്കുന്നതിനുമായിട്ടാണ് പ്രത്യേക പാക്കേജ് ആവശ്യപ്പെട്ടിരിക്കുന്നത്.ഓഖി ദുരന്തത്തെ ദേശീയ ദുരന്തമായി കണക്കാക്കി സഹായം അനുവദിക്കണമെന്ന് മുഖ്യമന്തി ആവശ്യപ്പെട്ടെങ്കിലും ഇക്കാര്യത്തിൽ പ്രധാനമന്ത്രി പ്രത്യേക മറുപടി നൽകിയില്ല.ദുരിത ബാധിതരെ രക്ഷിക്കാനും പുനരധിവസിപ്പിക്കാനും സാധ്യമായതെല്ലാം സംസ്ഥാന ഗവണ്മെന്റ് ചെയ്തിട്ടുണ്ടെന്ന് മുഖ്യമന്ത്രി പ്രധാനമന്ത്രിയെ അറിയിച്ചു.ദേശീയ ദുരന്ത നിവാരണ ഫണ്ടിന്റെ മാർഗരേഖ പ്രകാരം കണക്കാക്കിയ നഷ്ട്ടം 422 കോടി രൂപയാണ്.എന്നാൽ ഈ തുക തീർത്തും അപര്യാപ്തമായതു കൊണ്ടാണ് പ്രത്യേക പാക്കേജ് ആവശ്യപ്പെടുന്നതെന്നും മുഖ്യമന്ത്രി വിശദീകരിച്ചു.

കൊച്ചി:കൊച്ചിയിൽ നടി ആക്രമിക്കപ്പെട്ട കേസുമായി ബന്ധപ്പെട്ട് നടിമാരായ മഞ്ജു വാര്യരുടെയും സംയുക്ത വർമ്മയുടെയും മൊഴികൾ പുറത്ത്.കേസിലെ പ്രതിയായ ദിലീപും കാവ്യാമാധവനും  തമ്മിൽ അവിഹിത ബന്ധമുണ്ടായിരുന്നതായി മഞ്ജു വാര്യരുടെ വെളിപ്പെടുത്തൽ.നടി ആക്രമിക്കപ്പെട്ട സംഭവത്തിന് പിന്നിൽ ഗൂഢാലോചന ഉണ്ടെന്നു പറഞ്ഞത് സാധാരണക്കാർ ചിന്തിക്കുന്ന രീതിയിൽ ചിന്തിച്ചതുകൊണ്ടാണ്.ദിലീപേട്ടനുമായുള്ള വിവാഹത്തിന് ശേഷം ഞാൻ പൂർണ്ണമായും സിനിമ ഫീൽഡിൽ നിന്നും വിട്ടുനിൽക്കുകയായിരുന്നു.ഒരു ദിവസം ദിലീപേട്ടനും കാവ്യയുമായുള്ള മെസ്സേജുകൾ ദിലീപേട്ടന്റെ ഫോണിൽ നിന്നും കാണാനിടയായി.ഇതേപ്പറ്റി തന്റെ സുഹൃത്തുക്കളായ സംയുക്ത വർമ്മ,ഗീതു മോഹൻദാസ്,ആക്രമിക്കപ്പെട്ട നടി എന്നിവയുമായി സംസാരിച്ചു.ഇതിനെ തുടർന്ന് നടി അവൾക്കറിയാവുന്ന കാര്യങ്ങൾ എന്നോട് പറഞ്ഞു.അക്കാര്യങ്ങളെല്ലാം ദിലീപേട്ടനെ കുറിച്ചും കാവ്യയെ കുറിച്ചും താൻ അറിഞ്ഞ കാര്യങ്ങൾക്ക് ശക്തികൂട്ടുന്നവയായിരുന്നു. അറിഞ്ഞ കാര്യങ്ങളെ കുറിച്ച് താൻ ദിലീപേട്ടനോട് ചോദിച്ചു.അതേത്തുടർന്ന് വീട്ടിൽ വഴക്കുണ്ടായി.ഇതിന്റെ പേരിൽ ദിലീപേട്ടന് നടിയോട് ദേഷ്യമുണ്ടായി.ഞാനും സംയുക്തയും ഗീതുവും കൂടി നടിയുടെ വീട്ടിൽ പോയി.അവിടെ വെച്ച് അവളുടെ അച്ഛൻ അവളോട് നിനക്ക് ഇതെപ്പറ്റി എന്തെങ്കിലും അറിയാമെങ്കിൽ പറഞ്ഞുകൊടുക്കൂ എന്ന് പറഞ്ഞു.ദിലീപും കാവ്യയുമായുള്ള ബന്ധം റിമി ടോമിക്കും അറിയാമായിരുന്നെന്ന് നടി എന്നോട് പറഞ്ഞു.ഇതിനെ തുടർന്ന് റിമി ടോമിയെയും വിളിച്ചിരുന്നു.റിമിയും അതിനെ കുറിച്ച് എന്നോട് പറഞ്ഞിരുന്നു.പിന്നീട് 2013 ഏപ്രിൽ 17 നാണ് ഞാൻ ദിലീപേട്ടന്റെ വീട്ടിൽ നിന്നും എന്റെ വീട്ടിലേക്ക് വരുന്നത്.

മലപ്പുറം:വിദ്യാർത്ഥികൾക്ക് ലഹരി ഗുളിക വിതരണം ചെയ്തതിന് അറസ്റ്റിലായ പ്രതി പോലീസിന്റെ കണ്ണുവെട്ടിച്ച് രക്ഷപ്പെട്ടു.കേസിൽ അന്വേഷണ സംഘം അറസ്റ്റ് ചെയ്ത അന്യസംസ്ഥാനക്കാരനായ മുഹമ്മദ് റസലാണ് പോലീസിനെ വെട്ടിച്ചു രക്ഷപ്പെട്ടത്.അറസ്റ്റ് നടപടികൾ പൂർത്തിയാക്കി ഇയാളെ കോടതിയിൽ ഹാജരാക്കാനിരിക്കുകയായിരുന്നു.തിങ്കളാഴ്ച പുലർച്ചെ അരീക്കോട് സ്റ്റേഷനിലെ സെല്ലിൽ നിന്നും ഇയാൾ രക്ഷപ്പെട്ടതാകാമെന്നാണ് പോലീസ് പറയുന്നത്.വിദ്യാലയങ്ങളും കോളേജുകളും കേന്ദ്രീകരിച്ച് വിദ്യാർത്ഥികൾക്ക് ലഹരി ഗുളികകൾ വിതരണം ചെയ്യുന്ന സംഘത്തിലെ പ്രധാന കണ്ണിയാണ് ഇയാൾ.തമിഴ്‌നാട്ടിൽ നിന്നാണ് ഇവ കേരളത്തിൽ എത്തിച്ചു വിതരണം ചെയ്യുന്നത്.മലപ്പുറം ജില്ലാ പോലീസ് മേധാവി ദേപേഷ് കുമാർ ബെഹ്‌റയ്‌ക്ക് ലഭിച്ച രഹസ്യവിവരത്തിന്റെ അടിസ്ഥാനത്തിൽ ഡിവൈഎസ്പി ജലീൽ തോട്ടത്തിലിന്റെ നിർദേശപ്രകാരമാണ് ഇയാളെ അറസ്റ്റ് ചെയ്തത്.മാനസിക രോഗമുള്ളവർക്കും മറ്റും നൽകുന്ന നൈട്രോസൺ എന്ന് പേരുള്ള നൂറോളം ഗുളികകൾ അറസ്റ്റ് ചെയ്യുമ്പോൾ ഇയാളിൽ നിന്നും  പിടിച്ചെടുത്തിരുന്നു.ലഹരിക്ക് അടിമപ്പെട്ട യുവാക്കളിൽ ‘സൺ’ എന്ന പേരിലാണ് ഇത് അറിയപ്പെടുന്നത്.

തിരുവനന്തപുരം:സംസ്ഥാനത്തെ മെഡിക്കൽ കോളേജുകളിലെ ജൂനിയർ ഡോക്റ്റർമാർ സമരം തുടങ്ങി.ഡോക്റ്റർമാരുടെ പെൻഷൻ പ്രായം വർധിപ്പിക്കാനുള്ള തീരുമാനത്തിൽ പ്രതിഷേധിച്ചാണ് സമരം നടത്തുന്നത്.മെഡിക്കൽ സംയുക്ത സമര സമിതിയുടെ ആഭിമുഖ്യത്തിലാണ് സമരം.എന്ന് രാവിലെ എട്ടുമണി മുതൽ നാളെ രാവിലെ എട്ടുമണി വരെയാണ് പണിമുടക്ക്.അത്യാഹിത വിഭാഗം,തീവ്രപരിചരണ വിഭാഗം,പ്രസവ മുറികൾ എന്നിവയെ പണിമുടക്കിൽ നിന്നും ഒഴിവാക്കിയിട്ടുണ്ട്.സൂചന സമരമാണ് ഇന്ന് നടക്കുന്നത്.പെൻഷൻ പ്രായം കുറയ്ക്കാൻ തയ്യാറാകാത്ത പക്ഷം സമരം ശക്തമാക്കുമെന്ന് ജൂനിയർ ഡോക്റ്റർമാർ മുന്നറിയിപ്പ് നൽകിയിട്ടുണ്ട്.പെൻഷൻ പ്രായവർധന ഇവരുടെ തൊഴിൽ സാദ്ധ്യതകൾ ഇല്ലാതാക്കുമെന്ന് ജൂനിയർ ഡോക്റ്റർമാർ ചൂണ്ടിക്കാട്ടുന്നു.