Kerala

തിരുവനന്തപുരം: ആര്‍സിസിയില്‍ പോലീസ് പരിശോധന. ആർസിസിയിൽനിന്നു രക്തം സ്വീകരിച്ച കുട്ടിക്ക് എച്ച്ഐവി ബാധിച്ചതായ പരാതിയിലാണ് പരിശോധന. കഴിഞ്ഞ മാര്‍ച്ചിലാണ് ആര്‍സിസിയില്‍ നിന്ന് രക്തം സ്വീകരിച്ച കുട്ടിക്ക് എച്ച്‌ഐവി സ്ഥിതീകരിച്ചത്. മാതാപിതാക്കളുടെ പരാതിയെ തുടര്‍ന്നാണ് പോലീസ് കേസെടുത്ത് അന്വേഷണം നടത്തുന്നത്. സംഭവത്തില്‍ ആരോഗ്യവകുപ്പും അന്വേഷണം നടത്തിവരികയാണ്. ആരോഗ്യമന്ത്രിയുടെ നിര്‍ദ്ദേശപ്രകാരമാണ് അന്വേഷണം. കുട്ടിയുടെ രക്ഷിതാവിന്‍റെ പരാതിയിൽ ഉടൻതന്നെ പരിശോധിച്ച് റിപ്പോര്‍ട്ട് നല്‍കാനാണ് ആര്‍സിസി ഡയറക്ടറോട് ആരോഗ്യമന്ത്രി കെ.കെ. ശൈലജ ആവശ്യപ്പെട്ടിരിക്കുന്നത്.

കോട്ടയം:നടി ആക്രമിക്കപ്പെട്ട കേസിൽ ജെയിലിൽ കഴിയുന്ന നടൻ ദിലീപിനെ ബോധപൂർവ്വം കുടുക്കിയതാണെന്ന ആരോപണവുമായി വീണ്ടും പി.സി ജോർജ് രംഗത്ത്.ദിലീപിനെ കുടുക്കിയതിനു പിന്നിൽ സിപിഎം നേതാവിന്റെ മകനും എ ഡി ജി പി ബി.സന്ധ്യയും ദിലീപിന്റെ മുൻഭാര്യയും നടിയുമായ മഞ്ജു വാര്യരും ആണെന്ന് പി.സി ജോർജ് പറഞ്ഞു.ദിലീപിന് ഉടൻ തന്നെ ജാമ്യം നൽകണമെന്നും എന്തുകൊണ്ടാണ് ദിലീപിന് ജാമ്യം നിഷേധിക്കുന്നതെന്ന് കോടതി വ്യക്തമാക്കണമെന്നും പി.സി ജോർജ് ആവശ്യപ്പെട്ടു. ആക്രമിക്കപ്പെട്ട നടിയെ കുറിച്ച് നടത്തിയ പരാമർശങ്ങളിൽ ഉറച്ചു നിൽക്കുന്നുവെന്നും അദ്ദേഹം പറഞ്ഞു.ഇപ്പോൾ കേസന്വേഷിക്കുന്നത് വട്ടിളകിയ പോലീസുകാരാണ്.അവർ നാദിര്ഷയെ ഭീഷണിപ്പെടുത്തി മൊഴിയെടുക്കാൻ ശ്രമിക്കുകയാണ്.പൾസർ സുനി ഭീഷണിപ്പെടുത്തുന്നുവെന്നു നാദിർഷ നേരിട്ടുവന്നു പറഞ്ഞിരുന്നു.ദിലീപിന് ജാമ്യത്തിന് അർഹതയുണ്ട്.ആക്രമിക്കപ്പെട്ട നടിയെ അപമാനിക്കുന്ന വിധത്തിൽ സംസാരിച്ചു എന്ന പേരിൽ തനിക്കെതിരെ പോലീസ് കേസെടുത്തതായി അറിയില്ലെന്നും പി.സി ജോർജ് പറഞ്ഞു.

പാപ്പിനിശേരി: പോലീസിനെ വെട്ടിച്ചു രക്ഷപ്പെടാൻ ശ്രമിച്ച മണൽകടത്ത് ലോറി നിയന്ത്രണം വിട്ടു വൈദ്യുത തൂണിലിടിച്ചു വൈദ്യുത തൂൺ രണ്ടായി തകർന്നു നടുറോഡിലേക്കു വീണു. സമീപത്തെ മതിലും തകർന്ന നിലയിലാണ്. എന്നിട്ടും മുന്നോട്ടുനീങ്ങിയ ലോറി പോലീസ് പിന്തുടർന്നു പിടികൂടി. എന്നാൽ ലോറിയിൽ ഉണ്ടായിരുന്നവർ ഓടി രക്ഷപ്പെട്ടു. കഴിഞ്ഞദിവസം പുലർച്ചെ പാപ്പിനിശേരി പാറക്കൽ റോഡിലാണു സംഭവം.സംഭവത്തെ തുടർന്ന് ഈ ഭാഗത്തെ വൈദ്യുതി ബന്ധം വിച്ചേദിച്ചു.തൂൺ തകർന്ന ശബ്ദംകേട്ടെത്തിയ നാട്ടുകാരും പോലീസിനൊപ്പം ലോറി പിടികൂടാൻ പരക്കം പാഞ്ഞു. ഒടുവിൽ പാറക്കല്ലിനു സമീപം ജംഗ്ഷനിൽ വച്ചാണു ലോറി കസ്റ്റഡിയിലെടുത്തത്. വളപട്ടണം എസ്ഐ ശ്രീജിത്ത് കൊടേരിയുടെ നിർദേശപ്രകാരം എഎസ്ഐ.പ്രസാദ്, സിവിൽ പോലീസ് ഓഫീസർ വിനോദ് എന്നിവർ ചേർന്നാണു മണൽക്കടത്ത് ലോറി പിടികൂടിയത്. ലോറിയിൽ ഉണ്ടായിരുന്നവരെ കുറിച്ച് അന്വേഷണം നടത്തിവരികയാണെന്നു പോലീസ് പറഞ്ഞു

കൊച്ചി: കൊച്ചിയിൽ യുവനടി ആക്രമിക്കപ്പെട്ട കേസിൽ നടനും സംവിധായകനുമായ നാദിർഷ ചോദ്യം ചെയ്യലിനായി അന്വേഷണ സംഘത്തിനു മുന്നിൽ ഹാജരായി.ആലുവ പോലീസ് ക്ലബിലാണ് നാദിർഷയെ ചോദ്യം ചെയ്യുന്നത്.കേസിലെ പ്രധാന പ്രതിയായ പൾസർ സുനിക്ക് നാദിർഷ പണം കൈമാറിയതു സംബന്ധിച്ച് അന്വേഷണ സംഘം നേരത്തെതന്നെ കണ്ടെത്തിയിരുന്നുവെന്നാണു വിവരം. ഇതിനു സാക്ഷികളായവരെ സംബന്ധിച്ചുള്ള വിവരങ്ങളും അന്വേഷണ സംഘത്തിന്‍റെ പക്കലുണ്ട്. ദിലീപ് അറിയിച്ചതനുസരിച്ചാണെങ്കിലും പണം കൈമാറിയത് എന്തിനാണെന്നു നാദിർഷയ്ക്ക് അറിവുണ്ടായിരുന്നില്ലെന്നാണു സൂചന.ഇതിലെല്ലാം വ്യക്തതവരുത്തുന്നതിനായാണു സംഘം നാദിർഷയെ വീണ്ടും ചോദ്യം ചെയ്യുക. വീണ്ടും ചോദ്യം ചെയ്യലിനു ഹാജരാകാൻ സംഘം ആവശ്യപ്പെട്ടതിനെത്തുടർന്നു നാദിർഷ നൽകിയ മുൻകൂർ ജാമ്യാപേക്ഷ നേരത്തെ ഹൈക്കോടതി പരിഗണിച്ചിരുന്നു.ഇതിനു ശേഷം വെള്ളിയാഴ്ച ചോദ്യം ചെയ്യലിനായി അന്വേഷണ സംഘത്തിനു മുന്നിൽ ഹാജരാകാൻ കോടതി ഉത്തരവിടുകയായിരുന്നു. ചോദ്യം ചെയ്തതിനുശേഷം ഇതുസംബന്ധിച്ച റിപ്പോർട്ട് സംഘം ഹൈക്കോടതിയിൽ സമർപ്പിക്കും. നാദിർഷ ചോദ്യം ചെയ്യലിനോട് സഹകരിച്ചില്ലെങ്കിൽ അറസ്റ്റ് ചെയ്യണമെന്ന നിലപാടാകും സംഘം സ്വീകരിക്കുക. കേസിൽ സാക്ഷിയാകാൻ നാദിർഷ ഒരുങ്ങിയില്ലെങ്കിൽ പ്രതിയാക്കിയേക്കുമെന്നാണു വിവരം. എന്നാൽ, ഇതുസംബന്ധിച്ച് വ്യക്തത നൽകാൻ അന്വേഷണ സംഘം തയാറായിട്ടില്ല.ദിലീപിന്‍റെ ഉറ്റ സുഹൃത്തായ നാദിർഷ സാക്ഷിയായാൽ അതു കേസിന് ബലമേകുമെന്ന പ്രതീക്ഷയിലാണ് അന്വേഷണ സംഘം. ഇതിനാലാണു കേസിന്‍റെ അവസാനഘട്ടത്തിൽ നാദിർഷയെ വീണ്ടും ചോദ്യം ചെയ്യാൻ സംഘം ഒരുങ്ങുന്നത്. നാദിർഷ പണം നൽകിയതു സംബന്ധിച്ച സുനിയുടെ മൊഴി കഴിഞ്ഞ ദിവസമാണു പുറത്തുവന്നിരുന്നത്.