Kerala

കൊച്ചി:നടി ആക്രമിക്കപ്പെട്ട കേസിൽ ദിലീപിന്റെ ജാമ്യാപേക്ഷയിൽ കോടതി നാളെ വിധി പറയും.ജാമ്യാപേക്ഷയിൽ ഇന്ന് പ്രതിഭാഗത്തിന്റെ വാദം പൂർത്തിയായി.ദിലീപിന് വേണ്ടി അഭിഭാഷകൻ ബി.രാമൻപിള്ളയാണ് ഹാജരായത്.കേസുമായി ബന്ധപ്പെട്ട വിവരങ്ങളൊന്നും പോലീസ് പ്രതിഭാഗത്തെ അറിയിക്കുന്നില്ല എന്നതായിരുന്നു പ്രതിഭാഗത്തിന്റെ പ്രധാന പരാതി.റിമാൻഡ് റിപ്പോർട്ടിൽ ഒരു വിവരവും ഉൾപ്പെട്ടുത്തുന്നില്ലെന്നും പ്രതിയുടെമേൽ ചുമത്തിയിരിക്കുന്ന കുറ്റങ്ങൾ എന്തൊക്കെയാണെന്ന് അറിയിക്കുന്നില്ലെന്നും പ്രതിഭാഗം ആരോപിച്ചു.തന്റെമേൽ ചുമത്തിയിരിക്കുന്ന കുറ്റങ്ങൾ എന്തൊക്കെയാണെന്ന് അറിയേണ്ടത് പ്രതിയുടെ അവകാശമാണെന്നും രാമൻപിള്ള കോടതിയിൽ പറഞ്ഞു.പൾസർ സുനി അന്വേഷണസംഘത്തിന് ദൈവമായി മാറിയിരിക്കുകയാണെന്നും ബി രാമൻ പിള്ള വിമർശിച്ചു.നാളെ പ്രോസിക്യൂഷൻ വാദമായിരിക്കും കോടതി കേൾക്കുക.ഇതിനു ശേഷമാണ് ഹർജിയിൽ വിധി പറയുക.

തലശേരി: ദിനേശ് ബീഡി മൂഴിക്കര ശാഖ അടച്ചുപൂട്ടാനൊരുങ്ങുന്നു.. ഈ മാസം 30ന് ശാഖ അടച്ചുപൂട്ടാനാണ് തീരുമാനം.ഇവിടുത്തെ തൊഴിലാളികളോട് ഈങ്ങയിൽപീടിക ശാഖയിലേക്ക് മാറാൻ നിർദേശം നൽകിയിട്ടുണ്ട്.എന്നാൽ വിരമിക്കൽ പ്രായമായവരെ ഒരു വർഷത്തേക്കെങ്കിലും സ്ഥലം മാറ്റരുതെന്ന ആവശ്യം തൊഴിലാളികൾ ഉന്നയിച്ചിരുന്നു.ഈ ആവശ്യം പരിഗണിക്കാത്തതിനെ തുടർന്ന് തൊഴിലാളികൾ പ്രതിഷേധ സമരം നടത്തുകയാണ്. ഇന്നലെ തൊഴിലാളികൾ തലശേരി ദിനേശ് ഭവന് മുന്നിൽ പ്രതിഷേധ സമരം നടത്തി.

തോട്ടട:ദേശീയപാതയിൽ ചിമ്മിണിയൻവളവിൽ ബസ്സുകൾ കൂട്ടിയിടിച്ച് 26 പേർക്ക് പരിക്ക്.ഇന്നലെ വൈകുന്നേരം അഞ്ചുമണിയോടെ കണ്ണൂരിൽ നിന്നും തലശ്ശേരിയിലേക്ക് പോവുകയായിരുന്ന സ്വകാര്യ ബസും കണ്ണൂരിലേക്ക് വരികയായിരുന്ന ടൂറിസ്റ്റു ബസ്സും കൂട്ടിയിടിക്കുകയായിരുന്നു.വൈകുന്നേരമായതിനാൽ വിദ്യാർത്ഥികളായിരുന്നു ബസ്സിൽ ഏറെയും.കോളേജിലെയും പോളിടെക്നിക്ക്,ഐ.ടി.ഐ എന്നിവിടങ്ങളിലെയും  വിദ്യാർത്ഥികളുൾപ്പെടെയുള്ളവർക്കാണ് പരിക്ക്.പരിക്കേറ്റ അക്ഷയയെ (20) തലശ്ശേരി സഹകരണ ആശുപത്രിയിൽ പ്രവേശിപ്പിച്ചു.ബാക്കിയുള്ളവർ കണ്ണൂരിലെ വിവിധ ആശുപത്രികളിൽ ചികിത്സ തേടി.അപകടത്തിൽ രണ്ടു ബസുകളുടെയും മുൻഭാഗം പൂർണ്ണമായും തകർന്നു.അപകടത്തെ തുടർന്ന് ദേശീയപാതയിൽ അൽപനേരം ഗതാഗതം സ്തംഭിച്ചു.

പയ്യന്നൂർ:പോലീസ് സ്റ്റേഷനിൽ കൊലക്കേസ് പ്രതിയുടെ അക്രമം.പയ്യന്നൂർ റെയിൽവേ സ്റ്റേഷനിൽ മാതമംഗലത്തെ സി.കെ ശ്രീധരനെ തലയ്ക്കടിച്ചു കൊന്ന കേസിലെ പ്രതി രാമന്തളിയിലെ നടവളപ്പിൽ ചന്ദ്രനാണ് ഇന്നലെ പയ്യന്നൂർ പോലീസ് സ്റ്റേഷനിൽ അക്രമം അഴിച്ചുവിട്ടത്.പോലീസ് സ്റ്റേഷനിൽ റൈറ്റർ ഇരിക്കുന്ന ക്യാമ്പിന്റെ ചില്ല് ഇയാൾ കൈകൊണ്ട് അടിച്ചു തകർത്തു.തുടർന്ന് ഇയാളെ സി.ഐ ഓഫീസിലെത്തിച്ചപ്പോൾ സിവിൽ പോലീസ് ഓഫീസറായ രാജേഷ് അരവഞ്ചാലിന്റെ പുതിയ സ്മാർട്ട് ഫോണും ഇയാൾ എറിഞ്ഞു തകർത്തു.ഓഗസ്റ്റ് 24 ന് പയ്യന്നൂർ റെയിൽവേ സ്റ്റേഷനിൽ വെച്ച്  കരിവെള്ളൂർ സ്വദേശിനിയും പാലക്കാട് ഗവ.ആശുപത്രിയിലെ ജീവനക്കാരിയുമായ രാധയുടെ പണവും രേഖകളുമടങ്ങിയ ബാഗ് മോഷ്ടിച്ച കേസിലും ഇയാളുടെ പേരിൽ കേസെടുത്തിട്ടുണ്ട്.മുണ്ടക്കയത്ത് കഞ്ചാവ് കൈവശം വെച്ചതിന് റിമാൻഡിലായ ചന്ദ്രനെ പയ്യന്നൂർ പോലീസ് അറസ്റ്റ് ചെയ്ത് കസ്റ്റഡിയിലെടുക്കുകയായിരുന്നു.കസ്റ്റഡി കാലാവധി കഴിഞ്ഞതോടെ ഇയാളെ ഇന്നലെ  കോടതിയിൽ ഹാജരാക്കി റിമാൻഡ് ചെയ്തു.